Rubavu: Hafashwe ingamba nshya zo guhashya igwingira n’imirire mibi ku bana

Yanditswe na Mukwaya Olivier
Kuya 15 Mutarama 2020 saa 05:30
Yasuwe :
0 0

Ubuyobozi bw’Akarere ka Rubavu bwatangije gahunda idasanzwe, aho imiryango ifite abana bafite ikibazo cy’imirire mibi ihabwa indi miryango imeze neza ikabakurikirana mu rwego rwo kurwanya igwingira n’imirire mibi ku bana bato.

Uko iyi gahunda izakorwa, buri kigo nderabuzima gifite urutonde rw’abana bafite ikibazo cy’igwingira n’imirire mibi, imiryango yabo izajya ihabwa indi yifashije ibiteho kugeza umwana avuye muri uwo murongo.

Uwo muryango uzajya ubaba hafi umenye uko umwana yariye, uko yagejejweho ibyo leta imugenera nk’amata, ndetse ibyo kumugaburira byaba bidahari ugafasha umuryango w’umwana kubibona.

Ubwo iyi gahunda yatangizwaga ku mugaragaro ku Cyumweru, ku nshuro ya mbere abagore 34 bo mu Murenge wa Gisenyi bibumbiye mu muryango OFF Wisigara (Organisation Femme pour Familles) bahise bahabwa imiryango y’abana 34 bo mu Murenge wa Gisenyi bitaho.

Mukamana Marie Claire, ufite umwana uri mu mirire mibi, avuga ko ntako aba atagize ubushobozi bukabura, akemeza ko agiye kuzajya afatanya n’uwo bamuhaye mu kwita ku mwana.

Ati “Nari mfite ikibazo cy’ubushobozi bucye ntako mba ntagize njye n’umugabo. Dufite abana bane ntacyo tudakora ariko ubona ko biba byanze. Uyu muvandimwe ugiye kunyitaho nanjye nzamufasha sinzaterera iyo, mugihe adahari nzajya nita ku mwana mucire inshuro’’.

Uwimana Adelphine ashima abazanye iyi gahunda akavuga ko na bo bazabafasha mu kwita ku bana.

Ati “Imana izabafashe bazakomezanye umutima wo gufasha abameze nkatwe, natwe tuzababera abana beza, usibye imibereho natwe tubonye amafaranga make twabasha kwiyubaka tugacuruza’’.

Umuyobozi wa OFF Wisigara, Kantengwa Henriette, avuga ko ubushobozi buhari kuko akarere ka Rubavu, gafite ibiribwa ikibazo ari imyumvire, asaba abagore kubifata nk’ibyabo.

Ati “Twese uko turi 34 turi abacuruzi, bivuze ko n’ubushobozi buhari. Hano nta nzara ihari ikibazo ni imyumvire, dutangiye n’aba 34 nitumara kubazamura tuzafata abandi. Ndasaba ababyeyi kuzaboneka bakabifata nk’ibyabo kugira ngo tuzabigereho”.

Umuyobozi w’Akarere ka Rubavu wungirije ushinzwe imibereho myiza, Ishimwe Pacifique, avuga ko uretse Umurenge wa Gisenyi iki gikorwa kizakomereza no mu yindi mirenge, yizeza ubufatanye bw’akarere.

Ati “Uburyo bwa rusange butanga umusaruro mucye niyo mpamvu twahisemo ko umuntu akurikiranwa ku giti cye n’umushinzwe atange raporo aho bananirwa ubuyobozi turahari tuzajya dukomeza gufatanya’’.

Ubushakashatsi buheruka mu mwaka wa 2015 bwagaragaje ko mu Karere ka Rubavu hari abana 46.3% bari munsi y’imyaka itanu bagwingiye.

Ku birebana n’imirire mibi ubu Akarere ka Rubavu kabarizwamo abana 146 bafite ikibazo cy’imirire mibi.

Akarere kiyemeje ko iyi gahunda nigenda neza nk’uko iteguye uyu mwaka uzarangira nta mwana ukiri mu kibazo cy’imirire mibi n’igwingira.

Ababyeyi bafite ikibazo cy'imirire mibi bari bitabiriye iki gikorwa
Nyuma y'uko buri muryango uhawe uwo bafatanya bifotozanyije ifoto y'urwibutso
Bamwe mu babyeyi bazanye n'abana babo
Ubwo barimo gutombora abana bazajya bitaho
Buri mubyeyi yatomboye umwana azajya yitaho akava mu bafite imirire mibi
Kantengwa na Visi Meya ushinzwe imibereho myiza y'abaturage muri Rubavu, Ishimwe Pacifique ubwo hatangizwaga iki gikorwa
Buri mubyeyi yahaye impano umwana azitaho
Visi Meya Ishimwe yavuze ko bizera ko uyu mwaka uzashira nta mwana ukiri mu mirire mibi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .