Rubavu: Gitifu w’akagari yakubiswe n’abashumba banamufungirana mu nzu

Yanditswe na Mukwaya Olivier
Kuya 23 Nyakanga 2019 saa 09:19
Yasuwe :
0 0

Umunyamabanga Nshingwabikorwa w’Akagari ka Rwaza, Uwimana Faustin, mu Murenge wa Rugerero n’ushinzwe iterambere ry’akagari SEDO, Nshizirungu Edison, bakubiswe n’abashumba banabafungirana mu nzu batabarwa na Polisi. Umwe mu bashumba yahise afatwa akaba afunzwe.

Byatangiye ejo mu gitondo ubwo ushinzwe iterambere ry’akagari Nshizirungu, yari agiye gusura ibiti by’imbuto byatewe ku musozi wa Rubavu asanga haragiwemo ihene n’intama agize ngo azifate baramukubita ndetse baramukomeretsa ku kiganza no ku kuboko.

Abo bashumba bahise bajyana ayo matungo bayashyira mu nzu, Umunyamabanga Nshingwabikorwa w’akagari atabaye nawe bamufungirana mu gipangu hamwe n’ushinzwe iterambere ry’akagari ndetse bafata n’ibyuma aza gutabarwa n’abapolisi ba sitasiyo ya Rugerero.

Umunyamabanga Nshingwabikorwa w’Umurenge wa Rugerero Nkurunziza Faustin, yemeje aya makuru avuga ko umushumba umwe yamaze gufatwa abandi babiri bakaba barimo gushakiswa.

Ati “Ushinzwe iterambere ry’akagari ka Rwaza yari agiye gusura ibiti by’imbuto byatewe ku musozi wa Rubavu asanga haragiwemo ihene n’intama nuko ashaka kuzifata abashumba baramurwanya baramukomeretsa nuko bamanukanye amatungo yitabaza Gitifu w’akagari nawe ahageze baramufata bombi barabafungirana, polisi niyo yatabaye babiri bariruka hasigara nyir’igipangu wahise ajyanwa gufungwa”.

Uwafashwe yitwa Niyonzima akaba ari mu maboko ya RIB Rugerero abandi baratorotse ariko amatungo (ihene 27) yo yarafashwe kugira ngo ba nyirazo bazabanze kuryozwa ibyo bakoze.

Ingingo ya 230 y’itegeko riteganya ibyaha n’ibihano, ivuga ko umuntu wese urwanya ku buryo ubwo ari bwo bwose, unanirana bya kiboko, usagarira cyangwa ukoresha ibikangisho bikorewe abayobozi cyangwa abakozi ba Leta cyangwa abikorera, abashinzwe umutekano mu gihe bubahiriza amategeko, amabwiriza, ibyemezo by’ubutegetsi cyangwa ibyemezo by’urukiko, aba akoze icyaha cyo kwigomeka ku buyobozi.

Iyo abihamijwe n’urukiko, ahanishwa igifungo kitari munsi y’amezi atandatu ariko kitarenze umwaka umwe.

Iyo uwigometse ku buyobozi yari afite intwaro, igihano kiba igifungo kitari munsi y’imyaka ibiri ariko kitarenze imyaka itatu.

Iyo kwigomeka ku buyobozi byakozwe n’abantu benshi batari bafite intwaro kandi batabanje kubijyamo inama, igihano kiba igifungo kitari munsi y’umwaka umwe ariko kitageze ku myaka ibiri.

Iyo kwigomeka ku buyobozi byakozwe n’abantu benshi bitwaje intwaro kandi batabanje kubijyamo inama, igihano kiba igifungo kirenze imyaka itatu ariko kitarenze imyaka itanu. Ibihano bivugwa mu gika cya 2 n’icya 3 by’iyi ngingo, ntibihabwa umuntu waretse ibikorwa byo kwigomeka akimara kubisabwa n’ubuyobozi iyo nta ruhare yari afite mu buyobozi bw’ibyo bikorwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza