Rubavu: Agatsiko kiyise "Abareyo’’ kazengereje abaturage

Yanditswe na Mukwaya Olivier
Kuya 2 Ukuboza 2020 saa 07:30
Yasuwe :
0 0

Abaturage bo mu Murenge wa Nyamyumba mu kagali ka Busoro batangaje ko bahangayikishijwe n’agatsiko kiyise Abareyo kabahohotera kakanabarandurira imyaka.

Aba baturage bo mu mudugudu wa Bujenje, Akagari ka Busoro mu Murenge wa Nyamyumba, bavuga ko ntako batagize ngo batange amakuru ariko bababazwa no kuba ntakirakorwa.

Umuturage witwa Nyirabaziruwiha basenyeye inzu bakanamurandurira imyaka, yavuze ko bitabaje ubuyobozi bugasaba abaturage kwandika abakora uru rugoma ariko kugeza ubu nta n’umwe urafatwa.

Ati ‘Njye batangiye bavuga ko mfite ibitana (amarozi) n’uko baraza badusenyera inzu n’ejo bundi baraje baturandurira imyaka twiyambaje ubuyobozi gitifu w’umurenge na polisi badukoresha inama basaba abaturage kwandika abo bantu bakora ibyo turabandika impapuro barazijyanye n’ubu ntacyakozwe.’’

Musabyimana Cyprien ushinzwe umutekano mu mudugudu wa Bujenje mu Kagari ka Busoro mu Murenge wa Nyamyumba, yavuze ko abiyise Abareyo bashyira hamwe amafaranga akazajya abafasha igihe bafashwe.

Ati “Hano muri uyu mudugudu dufite ikibazo cy’abantu biyise ngo ni Abareyo ngo bashyira hamwe amafaranga kugira ngo nibajya bakora amakosa ajye abarengera noneho bakora icyaha bakayasuka mu bayobozi noneho bagera ku kibazo cyawe bakakirengagiza na gitifu w’akagari dufite tubona abatinya bamubitsemo ubwoba.’’

Umunyamabanga Nshingwabikorwa w’Umurenge wa Nyamyumba, Murenzi Augustin, yahumirije aba baturage ko hari ingamba zafashwe hamwe n’inzego z’umutekano abasaba kwihangana kuko biri mu nzira zo gukemuka.

Ati “Twaraje dukoresha inama y’umutekano igamije guhashya ako gatsiko gahungabanya umutekano. Icyo kibazo barakitubwiye ndabahumuriza ntikirenza icyumweru kidacyemutse kuko hari ingamba zafashwe ku bufatanye n’inzego z’umutekano baraza kubona impinduka.’’

Umurenge wa Nyamyumba ukunze kugaragaramo urugomo ndetse unafatwa nk’umurenge ugoranye kuyobora. Mu 2007 wigeze kuvukamo agatsiko kakoraga urugomo kari kariyise ‘Abazimbabwe.’

Abagize aka gatsiko barangwaga n’imyitwarire irimo ubugizi bwa nabi, ubujura, gukubita no gukomeretsa, kwigomeka ku buyobozi no gufata abagore ku ngufu mu masaha y’umugoroba.

Nsabimana Jean Marie Vianney mu murima we baheruka kuranduramo ibishyimbo
Abaturage bo mu mudugudu wa Bujenje mu Kagari ka Busoro bavuga ko ntako batagize ngo batange amakuru ariko bababazwa no kuba nta kirakorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .