Rubavu: Abayobozi b’ibigo byigenga bafashe ingamba zihariye mu guhangana n’ingaruka za COVID-19

Yanditswe na Mukwaya Olivier
Kuya 4 Ugushyingo 2020 saa 06:00
Yasuwe :
0 0

Mu gihe amashuri arimo kongera gufungura, abayobozi b’ibigo by’amashuri bibumbiye mu ihuriro baratangaza ko hari ingamba bafashe bitewe n’ingaruka bagizweho n’icyorezo cya COVID-19 zirimo ko nta munyeshuri uzajya ku kindi kigo atitwaje icyemezo cyerekana ko nta deni yasize cyangwa ngo mwarimu yimuke atarangije amasezerano.

Izi ngamba zafashwe by’umwihariko n’amashuri yigenga akorera mu Karere ka Rubavu mu Burengerazuba bw’u Rwanda.

Umuyobozi wa Ubumwe Community Center ifite Ikigo House of Children, Dusingizimana Zacharie, avuga ko ibyatumye bishyira hamwe ari ugushaka ibisubizo ku bibazo bahuraga na byo birimo n’cy’ababyeyi bambura ibigo bakimurira abana ku bindi.

Ati “Nta shuri ryigenga rwakwishimira ko abana baba batarishyuye bagakwepera ku bindi cyangwa ngo abarimu bigishaga neza undi aza akabakujyana. Twishyuzaga cyane abana bagiye mu bizamini, twasanze amashuri yose afite amadeni ya miliyoni 7 Frw kuzamura. Twasanze hari ababyeyi batwambura umwaka warangira bakajyana abana ahandi kandi bakamwakira no kubakurikirana bikagorana.’’

Yakomeje avuga ko n’ikibazo cy’abarimu babatubahiriza amasezerano bakigira mu bindi bigo kiri mu byatumye bishyira hamwe.

Ati “Abarimu naho mu mashuri yigenga hari ingeso aho umwarimu yazaga ukamubaza aho avuye akakubwira ikigo ugasanga cyigisha neza ukamwakira ariko ugasanga aho avuye yari afite amasezerano, harimo no kugura abarimu ku bindi bigo ukamuzamura ku mushahara ugasanga usenye ikigo.’’

Umuyobozi w’Ishuri rya La Promise, Mukamwiza Antoinette, avuga ko bishyize hamwe kugira ngo bahuze gahunda y’imyishyurire ku buryo nta mwana uzakirwa akirimo ideni ry’aho avuye.

Ati “Amafaranga abeshaho ikigo ni ayo ababyeyi bishyura, tworoshyaga ibintu ababyeyi bakishyura mu bice rimwe na rimwe umwaka ukarangira batarishyura. Twishyize hamwe kugira ngo ibyemezo bibe bimwe; twemeje yuko umwaka utaha umwana wese agomba kuba afite inyemezabwishyu.’’

Yasobanuye ko hari ababyeyi bazifuza kwimura abana ariko ubu kubera ihuriro bazajya bitwaza ifishi yerekana ko bishyuye nta deni bafitiye aho bavuye.

Ati “Hari n’abazifuza ko umwana yakwimuka kandi ubu ntibyakunda yarize igihembwe kimwe, iyo fishi izadufasha no kumenya umwaka umwana yigagamo.’’

Mukamwiza yavuze ko mu byo bagiye guhindura harimo abarimu bagenda batubahirije amasezerano.

Ati “Abarimu bacu bameze nk’abakinnyi b’umupira kandi uburezi ni ubuzima bwacu, iyo umusezereye usanga hari ibyo umugomba ariko bo wumva ngo yagiye hariya ukabyihorera ukanga gushwana na mugenzi wawe, nitwe twenyine twisenya.’’

Yasabye leta ko yabafasha bakagira ubuvugizi nabo bagahabwa ibitabo kuko abana bigisha ari ab’u Rwanda.

Leta iteganya gufasha ibigo bitandukanye birimo n’amashuri yigenga kubona inguzanyo yo gutunga abarimu babyo, inyujijwe mu kigega cyo kuzahura ubukungu bwazahajwe n’icyorezo COVID-19.

Umuyobozi w'Ishuri rya La Promise, Mukamwiza Antoinette
Umuyobozi wa Ubumwe Community Center ifite Ikigo House of Children, Dusingizimana Zacharie na Mukamwiza Antoinette ni bo bahagarariye amashuri yigenga
Nshimiyimana Justin nk'impuguke mu burezi yavuze ko bikenewe ko amashuri yigenga yishyira hamwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .