Rubavu: Abaturage ntibagoheka kubera urusaku ruva mu tubyiniro

Yanditswe na Mukwaya Olivier
Kuya 18 Mutarama 2020 saa 02:15
Yasuwe :
0 0

Umujyi wa Rubavu umaze gutera imbere mu bijyanye n’ubukerarugendo, nk’igice gisurwa n’abantu benshi baba Abanyarwanda baturutse hirya no hino bajyanwe no kwishimira ibyiza bihaba nk’umucanga wo ku Kiyaga cya Kivu, cyangwa Abanye-Congo bahasohokera.

Ni umujyi umaze gutera imbere mu bucuruzi bw’ijoro nk’utubari n’utubyiniro, ibintu binagira uruhare mu kubangamira abaturage, kuko ba nyirabyo batashoye imari mu gukumira urusaku ruturuka muri bene izi nzu.

Bamwe mu baturage bo mu Murenge wa Gisenyi mu gace kazwi nka La Bamba, bavuga ko babangamiwe n’inzu z’urubyiniro zirara zicuranga bigatuma badasinzira, bagasaba ubuyobozi kubafasha urwo rusaku rugakumirwa.

Uwitwa Habineza Saidi yabwiye IGIHE ko batajya basinzira bitewe n’urusaku rwinshi.

Ati “Nkatwe tuhaturiye ntabwo dusinzira, twabwiye ubuyobozi ariko bwaradutereranye, igiteye inkeke ni imiziki myinshi, turasaba ko abayobozi bamanuka bakaza bakareba kuko ibyo tuvuga ntabwo bumva uburemere, ariko bahageze bakumva ukuntu twababaye.”

Nizeyimana Abdul we avuga ko bagejeje iki kibazo ku buyobozi, ariko magingo aya batarabona igisubizo.

Ati ”Nkatwe duturiye La Bamba ni agace kagaragaramo utubyiniro tugira umuziki mu ijoro kandi hari abantu bahatuye barimo n’abasaza bakuze ugasanga babangamiwe, icyo dusaba ubuyobozi ni uko badufasha umuziki ntusohoke, banaducungire umutekano kuko usanga abahanywera harimo n’ibirara.”

Mberabagabo Innocent ufite akabyiniro ka GIBSON Pub, avuga ko we yamaze gufunga urusaku, agasaba ubuyobozi kureba abasakuriza abaturage.

Ati “Njyewe maze imyaka ibiri mfunze, nta rusaku rusohoka ahubwo abanyegereye nibo batabifite, gusa ubuyobozi bwadusura bakareba abatabyubahirije, ariko utubyiniro hano tuvuka buri munsi mu mayira ntaho utabona akabyiniro, bazagenzure barebe abateza urusaku bireke kwitirirwa twese.”

Umuyobozi wungirije w’Akarere ka Rubavu ushinzwe imibereho myiza, Ishimwe Pacifique, avuga ko babahaye ibyumweru bibiri ngo babe bakumiriye urusaku, abatazabikora bakazafungirwa.

Ati “Hari agace ka La Bamba karimo utubyiniro twinshi tubangamiye abaturage, ariko nk’ubuyobozi ntabwo turebera, hari icyo twabikozeho. Twabahaye igihe, twabasabye ko batarenza saa yine z’ijoro kugira ngo batabangamira abaturage, ariko byagaragaye ko batabyubahirije."

"Ubu hafashwe ingamba z’uko bashyiramo ibibuza urusaku gusohoka, twabahaye ibyumweru bibiri nibatabikora tuzabafungira bajye gukorera ahatari abaturage.”

Aka gace gahuriwemo n’utugari twa Bugoyi na Nengo kamaze kwamamara cyane bitewe n’utubyiniro tuvuka buri munsi kandi dukora iminsi yose.

Umwaka ushize Akarere ka Rubavu nabwo kafashe icyemezo cyo gufunga amacumbi 27 afite ikibazo cy’umwanda no gukora nta byangombwa bisabwa. Gusa mu mikorere y’aka gace, ibikorwa bimwe bifungwa hahita havuka ibindi byinshi.

Igitabo cy’amategeko ahana giteganya ko umuntu wese utera urusaku ku buryo bihungabanya umutuzo w’abaturage nta mpamvu igaragara cyangwa atabiherewe uburenganzira, aba akoze icyaha.

Iyo abihamijwe n’urukiko, ahanishwa ihazabu y’amafaranga y’u Rwanda atari munsi ya 500.000 Frw ariko atarenze 1.000.000 Frw.

Iyo habaye isubiracyaha, ibihano biba igifungo kitari munsi y’iminsi umunani ariko kitarenze ukwezi kumwe n’ihazabu y’amafaranga y’u Rwanda arenze miliyoni imwe ariko atarenze miliyoni ebyiri cyangwa kimwe gusa muri ibyo bihano.

Utubyiniro twinshi muri uyu mujyi ntabwo twahawe ubushobozi bwo gukumira urusaku
Abaturage begeranye cyane n'utubari n'utubyiniro
Abaturage bavuga ko babangamiwe n'urusaku ruva mu tubyiniro
Tumwe mu tubyiniro turi hagati mu baturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .