Rubavu: Abanyura ahatemewe batumye insengero zikomeza gufungwa

Yanditswe na Mukwaya Olivier
Kuya 10 Kanama 2020 saa 08:45
Yasuwe :
0 0

Insengero 18 mu Karere ka Rubavu ni zo byagaragaye ko zuzuje ibisabwa kugira ngo abantu baterane hubahirizwa amabwiriza yo kwirinda icyorezo cya COVID-19, gusa ubuyobozi bw’akarere na zo bwazisabye gukomeza gutegereza harebwa ko imibare y’abarwayi iboneka igabanuka.

Mu karere ka Rubavu hagiye haboneka abarwayi batandukanye ariko bose bakaba baraturukaga mu bigo byakira abacuruzi bajya muri Repuburika iharanira Demokarasi ya Congo.

Umuyobozi w’akarere ka Rubavu wungirije ushinzwe iterambere ry’ubukungu, Nzabonimpa Deogratias, avuga ko nyuma y’uko insengero zifunguwe, mu Karere ka Rubavu hagiye hagaragara abarwayi benshi ku buryo habonekaga 10 ku munsi, avuga ko iyo mibare ari yo yateye ubwoba insengero zirafungwa hirindwa ko hari abaza guterana bavuye i Goma baciye mu nzira zitemewe.

Ati “Nyuma yuko amabwiriza yemeje ko dushobora guterana tugasenga, hari uburwayi bwagiye bugaragara haba ari mu bigo dushyiramo abacuruzi bajya Congo imibare yariyongereye, tumaze iminsi irenga itatu tubona abantu barenze 10 ku munsi”.

Akomeza avuga ko “Havutse impungenge, twemeranya n’inzego zose ko twabanza tukitonda neza tutaza guhuza abantu harimo n’abavuye i Goma baje gusenga baciye mu nzira zitemewe n’amategeko tukaba dushobora kubona ubwandu bwihuse”.

Nzabonimpa yavuze ko hari insengero 18 zasuzumwe basanga zujuje ibisabwa kandi imibare ibaye myiza bahita baziha uburenganzira bwo gukora.

Sheikh Ngiruwonsanga Saidi, uyobora abayisilamu mu karere ka Rubavu, avuga ko nubwo bari bariteguye bashyigikiye icyemezo cy’Akarere ka Rubavu.

Ati “Twebwe nk’abayisilamu icyemezo turacyemera ntabwo natwe twashyigikira ko inserngero zifungurwa zikaba ikibazo, tuzakomeza kwihangana kugira ngo tubashe kuba twakwirinda iki cyorezo kandi twari twararangije kubaka ibisabwa ku misigiti dutegereje ko badusura bakareba uko duhagaze kandi ibyo twasabwaga twarabikoze, twaguze imiti, duhugura abantu’’.

Padiri Nzayisenga Theoneste, uyobora Paruwasi Gatolika ya Muhato, imwe mu nsengero 18 zujuje ibisabwa, avuga ko bashyigikiye icyemezo cy’akarere asaba ko bitatinda kuko iyobokamana ribuze byagira ingaruka ku mibereho.

Ati “Twebwe nta kibazo dufite niba leta ibona ko hari ikibazo kigihari kandi abakirisitu ni abaturage ba leta nta kindi twabikoraho. Icy’ingenzi ni ugufatanya na leta nibadusobanurira ko ari ikibazo tugomba natwe gufasha leta ubukangurambaga”.

Mu Karere ka Rubavu habarurirwa insengero 439 hakaba hategerejwe ibizamini birimo gukorwa, aho abaganga barimo gupima ibice byegeranye na Congo, ibisubizo bizavamo akazaba ari byo bitanga icyizere cy’uko insengero zafungurwa cyangwa zigakomeza gufungwa.

Paruwasi Gatolika ya Muhato iri mu nsengero zemerewe gukora ariko yasabwe kuba yihanganye
UEBR Paruwasi Gisenyi nayo yasabwe kuba yihanganye
Umuyobozi w’akarere ka Rubavu wungirije ushinzwe iterambere ry’ubukungu, Nzabonimpa Deogratias yavuze ko hagisuzumwa uko icyorezo gihagaze ngo hafungurwe insengero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .