00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: Abangirijwe n’iruka ry’ibirunga bararira ayo kwarika

Yanditswe na Muhire Desire
Kuya 30 Ugushyingo 2022 saa 11:31
Yasuwe :

Muri Gicurasi 2021 ni bwo ikirunga cya Nyiragongo cyarutse kigera mu Murenge wa Cyanzarwe cyangiza imirima y’abaturage, ariko kuri ubu ba nyiri iyo mirima barataka inzara.

Bavuga ko kuva ibyo biza byangiza amasambu ya bo Akarere ka Rubavu kabatereranye, nta bufasha kabahaye ahubwo iyo bagerageje gutakambira ubuyobozi bubabwira ko ’ubutaka bwangijwe ari ubwa Leta’.

Aba baturage bagera ku miryango 15 bavuga ko ubuzima bwabo bwahazahariye kuko aho bakubitaga isuka hahindutse amakoro, inzara n’ubukene bikaba bibazahaje.

Violette Mukasine utuye mu mudugudu wa Bisizi, Akagari ka Rukoko yabwiye IGIHE ati" Isambu yanjye yose yuzuye amabuye yavuye mu birunga, byanteye ubuzima bubi, ubu mbayeho nabi, abana bigaga ubu ntibacyiga kubera kubura ibyo mbagaburira. No kugira ngo mbone icyo abana bararira ni Imana ibikora."

Yavuze ko Isambu ye yayisaruragamo imifuka itatu y’ibishyimbo, akemeza ko mu mezi ane yabashaga kubona amafaranga hagati y’ibihumbi 300 na 350 Rwf.

Uyu mubyeyi usanzwe atunzwe n’ubuhinzi avuga ko ubuzima bumushaririye kuko Isambu ye ari yo yakuragamo mitiweli, ibyo kurya, amafaranga y’ishuri ry’abana n’ibindi bikenerwa mu buzima bwa buri munsi.
Ikimushengura kurushaho ngo nuko iyo bitabaje ubuyobozi bw’Akarere ka Rubavu, aho kubagoboka ahubwo bubabwira ko ubutaka bwagiye butari ubwabo ahubwo ari ubwa Leta.

Ati" Ubuyobozi bw’Akarere buraza bukareba ayo mabuye, no mu byumweru bibiri bishize meya yarahageze, iyo tubabwiye ikibazo baratubwira ngo ubutaka ni ubwa Leta, natwe tukababaza tutu ’ese twe ntituri aba Leta?"

Undi muturage utuye muri aka gace na we wangirijwe, yavuze ko isambu ye yari yarayihinzemo urutoki, imyumbati n’ibishyimbo ariko ubu bidashoboka kuko habaye amakoro.

Ati “ Inzego za Leta iyo zidusuye ziratubwira ngo ubutaka ni ubwa Leta si ubw’umuturage ariko bakirengagiza ko Leta na yo ibaho kuko ifite abaturage. Natwe turabizi ko ari ubwa Leta ariko bugomba gutunga abaturage bayo kuko tubufitiye ibyangombwa twahawe na Leta."

Umuyobozi w’Akarere ka Rubavu Kambogo Ildephonse yavuze ko ibyabaye ari ibiza byaje bidateguje, bityo ko ikibaye cyose abaturage batakagombye kwihutira kwaka ubufasha.

Ati" Biriya ni ibiza birumvikana, kandi bikimara kuba hari ubufasha bwatanzwe bw’ibiribwa, ariko twasanze abaturage bafite n’indi mirima bahinga. Ubufasha buramutse bubonetse ntabwo twatuma umuturage wacu abaho nabi, ariko na none akumva ko ikibazo cyabaye kitatewe n’ubuyobozi ahubwo ari insanganya."

Akomeza agira ati" Turagira ngo twigishe abaturage ko ikibazo kibaye cyose nta tegeko rihari ryo kugira ngo akarere kakwishyure, ahubwo ni ubufasha usaba bitewe n’ubuzima ubayemo."

Ikirunga cya Nyiragongo cyarutse muri Gicurasi 2021, cyangiza amasambu kagali ka Busigari, Umurenge wa Cyanzarwe, Akarere ka Rubavu.

Imirima yahingwaga yabaye amakoro, abaturage basaba ubufasha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .