Ibi byavuzwe kuri uyu wa Gatandatu ubwo hakorwaga umuganda ngarukana kwezi wo kubakira abatishoboye mu murenge wa Rubavu,akagari ka Murambi.
Umuyobozi w’akarere ka Rubavu, Habyarimana Gilbert yavuze ko abagenda batera inda bamaze gukorerwa urutonde, bakaba bagiye gufatwa.
Ati “Ni ikibazo gikomeye cyane kandi tugiye gushyiramo imbaraga. Ubu imibare turayifite, ni ukujya ku muntu dufatanije n’inzego z’umutekano, buri muntu wese akorerwe dosiye, avuge uwayimuteye, byagenze gute kugira ngo bakurikiranwe abo bagabo bagenda batera inda hirya no hino.”
Minisitiri w’ingabo, Gen Major Murasira Albert yavuze ko bagiye gutangira no gushakisha bagabo bata ingo bakagenda babyara aho bageze hose.
Yavuze ko ari bo batuma hakomeza kugaragara ibibazo by’abana badafite ubitaho, bikadindiza iterambere.
Ati “ Tugomba gushyira ingufu ku bagabo bariya bapfa kubyara barangiza bakajya ahandi. Tugomba gutangira kubashakisha ntabwo tuzajya twemera ko umuntu aza yagera ahantu agatera inda yabona ko byakomeye umugore akamuta akagenda.”
Murasira yavuze ko abagabo bagomba kumenya inshingano zo kurera abana babyaye kuko umwana warezwe nabi atakubaka u Rwanda.
Mu karere ka Rubavu hakunze kugaragara icyo abaturage bise ‘Ndongora Nitunge’, bishatse kuvuga abagore bashaka abagabo bagatunga ingo mu gihe abagabo baba biyicariye.
Umuco wiswe ‘Ndongora nitunge’, ukomoka cyane muri Congo, aho usanga abagore bambuka umupaka bajya gushaka ibicuruzwa mu Mujyi wa Rubavu, mu gihe abagabo babo baba biyicariye.
Uretse abakuru akarere ka Rubavu kaje ku isonga mu kugira umubare munini w’abangavu batewe inda mu Ntara y’Uburengerazuba, aho abagera kuri 630 bamaze guterwa inda mu mezi icyenda ya 2019 bituma bagera ku 3035 mu myaka itatu.
Imibare itangwa n’Akarere ka Rubavu igaragaza ko kugeza ubu abana 282 bafite ibibazo by’imirire mibi, harimo 49 bameze nabi cyane, ni ukuvuga bari mu ibara ry’umutuku.
TANGA IGITEKEREZO