RSSB igiye kubakira abanyamuryango bayo inzu zijyanye n’amikoro yabo

Yanditswe na Ishimwe Alain
Kuya 5 Nzeri 2020 saa 07:47
Yasuwe :
0 0

Ikigo cy’gihugu cy’ubwiteganyirize (RSSB) cyatangaje ko mu mwaka w’ingengo y’imari 2020/2021, kizatangiza umushinga wo kubaka inzu zigera ku bihumbi 10 zizubakirwa abanyamuryango bacyo bigendanye n’ubushobozi bafite.

Uyu mushinga uzashyirwa mu bikorwa mu bibanza bya RSSB itarakoreshwa cyane cyane mu kagari ka Murama, Umurenge wa Kinyinya mu Karere ka Gasabo.

Umuyobozi mukuru wa RSSB, Régis Rugemanshuro yatangaje ko uyu mushinga uzatangira mu mwaka w’ingengo y’imari wa 2020/2021.

Umushinga wo kubaka aya nzu wari gutangira muri Kamena 2019 nkuko uwari umuyobozi wa RSSB icyo gihe Tushabe Richard yabitangarije itangazamakuru ubwo batangazaga ibyo bagezeho guhera muri Kamena 2018 kugeza mu Ukuboza 2018.

Icyo gihe yagize ati “Mu bibazo dufite nk’igihugu ni ubwubatsi cyane inzu zo guturamo. RSSB nk’uko mubizi kuva mu 2003, muzi nk’Umudugudu wa Kagugu, uwa Vision 2020 n’indi kandi dukomeje iyo nzira kugira ngo tuzibe icyuho kiri mu macumbi.”

Yakomeje agira ati “Dufite undi mushinga wo kubaka inzu ziciriritse cyane, turimo kuganira n’abafatanyabikorwa ku buryo dushaka kuzubaka ahantu hitwa ku Ijuru rya Gasogi. Turashaka kuhubaka inzu ibihumbi birindwi ku giciro cyoroheye abafatabuguzi bacu, turashaka ko inzu ikabije yaba miliyoni 10 Frw kugera kuri 20 Frw.”

Kugeza ubu i Gasogi, Kinyinya na Rusororo niho hantu hagomba kwitabwaho mu ishyirwa mu bikorwa ry’umushinga wa RSSB.

Amakuru yo kubaka inzu ziciriritse muri rusange yakiriwe neza n’abanyamuryango ba RSSB ariko bamwe bifuza ko uyu mushinga wazibanda cyane ku banyamuryango bafite umushahara ugereranyije.

RSSB yizeza ko muri uyu mushinga kimwe no mu y’indi igamije imibereho myiza y’abanyamuryango bayo, buri cyiciro kizitabwaho. By’umwihariko uyu mushinga uzashyirwa mu bikorwa mu byiciro bitandukanye no mu turere dutandukanye tw’igihugu aho iki kigo gifite imitungo.

RSSB isanzwe yubakira abantu inzu bitewe n’amikoro bafite, urugero ni nk’umudugudu wa Vision City uherereye mu karere ka Gasabo wuzuye utwaye asaga miliyoni 150 z’amadolari.

RSSB igiye kubakira abanyamuryango bayo inzu zijyanye n’amikoro yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .