RRA iberewemo ibirarane by’imisoro bya miliyari zisaga 200 Frw

Yanditswe na Dufitumukiza Salathiel
Kuya 23 Nzeri 2020 saa 04:12
Yasuwe :
0 0

Abayobozi mu Kigo cy’Igihugu cy’Imisoro n’Amahoro (RRA) babwiye Abadepite bagize Komisiyo ishinzwe gukurikirana Imikoreshereze y’Imari n’Umutungo by’Igihugu (PAC) ko imwe mu mbogamizi bagihura nayo mu kwishyuza ibirarane by’imisoro harimo n’iy’abantu bandikisha imitungo yabo ku bandi bashaka guhunga imisoro.

Iki kigo cyitabye PAC ku wa 22 Nzeri ngo cyisobanure ku birarane by’imisoro ingana na miliyari 270 Frw yagaragaye muri raporo y’Umugenzuzi Mukuru w’Imari ya Leta ya 2018/2019.

Imbere ya PAC, abayobozi b’Ikigo cy’Imisoro n’Amahoro batanze ibisobanuro hifashishijwe ikoranabuhanga ry’amashusho mu kwirinda COVID-19 bavuze ko ibirarane by’imisoro byiganje mu nzego za Leta n’ibigo bicukura amabuye y’agaciro.

Iyi raporo igaragaza ko ibirarane by’imisoro itishyurwa byiyongereho 40% biva kuri miliyari 161 mu 2017 bigera kuri miliyari 270 Frw mu 2019, muri byo kandi ibingana na 87% byari bimaze igihe kirenga umwaka.

Umugenzuzi Mukuru agaragaza ko ibirarane by’imisoro bitatanzwe bingana na 20% y’ibyo Guverinoma yinjije binyuze muri RRA mu mwaka w’ingengo y’imari wasojwe ku wa 30 Kamena 2019.

Umuyobozi wa RRA Pascal Bizimana Ruganintwali yasobanuye ko ibirarane bigaragara muri iyi raporo ahanini biri mu mu bigo bya Leta n’ ibikora ubucuruzi bw’amabuye y’agaciro bitarishyura.

Yagize ati “Guverinoma iturimo ibirarane by’imisoro ingana na miliyari 90 Frw, bihwanye na kimwe cya gatatu cy’igiteranyo. Twabandikiye amabaruwa tubasaba kutwishyura, ndetse tugasaba ko ibyo bigo biteganya ingengo y’imari igenewe ibyo.’’

“Hari kandi miliyari 78 Frw z’imisoro tuberewemo n’ibigo bikora ubucuruzi bw’amabuye y’agaciro.”

Muri miliyari 270 Frw zagaragajwe muri raporo y’Umugenzuzi Mukuru ya 2018/2019, RRA yakusanyije miliyari 66 Frw nyuma y’uko iyo raporo ishyikirizwa PAC, hakaba hasigaye ibirarane bya miliyari 204 Frw.

RRA ivuga ko yanagiye ihura n’ibibazo bya bamwe mu bayifitiye ibirarane bagiye bapfa, abagiye bakena ku buryo batagishoboye kuyishyura, abandikisha imitungo yabo ku bandi bantu kugira ngo batishyura imisoro n’abagiye hanze y’igihugu.

Icyakora itegeko riteganya ko iyo bigenze bityo, iki kigo gitegura neza inyandiko igaragaza ko umuntu yapfuye cyangwa atakiba mu gihugu.

Ruganintwali yavuze ko “hagitegerejwe kubona ibimenyetso, maze inyandiko zigakorwa. Ndetse ko twasabye RIB ngo idufasha gukurikirana abantu tutabasha kubona aho baherereye kugira ngo bishyure.”

RRA ivuga ko yamaze kubona imitungo ingana na miliyari 13 Frw y’abatarishyura imisoro, ku buryo ishobora kuyiteza cyamunara cyangwa ba nyirayo bakishyura kugira ngo bayisubirane.

Umuyobozi wa PAC, Valens Muhakwa, yasabye RRA gukora raporo y’ibyo birarane n’abatari bishyura igashyikirizwa Komisiyo y’Abadepite ishinzwe gukurikirana Imikoreshereze y’imari n’umutungo by’igihugu.

Ni mu gihe Depite Marie Alice Kayumba Uwera uri mu bagize iyi Komisiyo, we yasabye RRA kugaragariza abadepite kopi z’inyandiko yagiye yoherereza ibigo ibyishyuza ibirarane kugira ngo iyifashe gukora ubuvugizi.

Abakozi ba RRA bafite umukoro wo kwishyuza ibirarane by'imisoro by'asaga miliyari 200 bimaze igihe bitarishyurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .