RPPA yasabye abatanga amasoko ya leta korohereza abayapiganira kubera Coronavirus

Yanditswe na Twarabanye Venuste
Kuya 23 Mata 2020 saa 08:18
Yasuwe :
0 0

Ikigo cy’igihugu gishinzwe gutanga amasoko ya Leta (RPPA), cyasabye abatanga amasoko ya leta korohereza abayapiganira ku byangombwa bimwe na bimwe muri iki gihe cya Coronavirus.

RPPA yatangaje ko ibihe byo guhangana na Coronavirus, byagize ingaruka ku buryo amasoko ya Leta yatangwagamo, isaba abayatanga korohereza abapigana igihe basabwa ibyangombwa bitangwa n’ibigo bya leta.

Itangazo icyo kigo cyashyize hanze kuri uyu wa 21 Mata 2020 rivuga ko abatanze isoko bajya borohereza abaripiganira ku byangombwa bimwe na bimwe, aho byaba ngombwa ko babigaragaza ariko batarabibona bakerekana ko babisabye.

Rigira riti “Aho ibyangombwa bimwe na bimwe bisabwa, birimo ibitangwa n’ibigo by’imari cyangwa ibya leta, abapigana bagomba koroherezwa kuri ibyo byangombwa, aho bikenewe bagatanga ibigaragaza ko babisabye kuri internet.”

RPPA yanatangaje ko mu rwego rwo kubahiriza amahame agenga ipiganwa abatanga amasoko basabwa kwirinda ikimenyane basaba ibyangombwa bidakenewe (discriminatory criteria) mu masoko batanga.

Iki kigo cyavuze ko hari abasaba ibyangombwa by’ipiganwa bidakenewe ugereranyije n’isoko ryatanzwe, ndetse ko mu minsi iri imbere kizatangaza ingero z’amasoko yatanzwe agaragaramo icyo kibazo.

Ku mirimo yasubitswe kubera Coronavirus, uwatsindiye isoko n’uwaritanze basabwa kureba ingamba bafata kugira ngo birinde ibihombo byaterwa n’iryo subikwa. Abasoje ibikorwa nabo basabwa kubahiriza ibikubiye mu ngingo ya 117 y’Itegeko rigenga amasoko ya Leta.

Iyo ngingo ivuga ko iyo imirimo ihagaze by’agateganyo, uwatsindiye isoko agomba gufata ingamba za ngombwa zigamije kurinda no kwita ku mutekano w’ibimaze gukorwa n’uw’ibikoresho no kubirinda kononekara akoresheje amafaranga ye bwite.

Ingingo ya 116 yo ivuga ko guhagarika imirimo by’agateganyo bitagomba kurenza iminsi 30 ikurikirana; iyo birenze iminsi yavuzwe, amasezerano y’isoko ahita aseswa nta mpaka.

Icyakora, iyo urwego rutanga isoko rufashe icyemezo cyo guhagarika imirimo by’agateganyo mu gihe kirenze iminsi 30, impande zombi zumvikana ku ngamba zafatwa mu rwego rwo kwirinda igihombo cyaturuka kuri iryo hagarikwa.

Igihe cy’ihagarikwa ry’imirimo ry’agateganyo kigomba kongerwa ku cyo kurangiza imirimo giteganyijwe mu masezerano y’isoko igihe cyose kurangiza imirimo bidahuriranye n’igihe hafatiwe icyemezo cyo guhagarika imirimo by’agateganyo.

Mbere yuko ibikorwa bifunga hagahagarikwa ingendo zitari ngombwa kubera Coronavirus, RPPA yari mu bikorwa byo guhugura ba rwiyemezamirimo bashya babyifuza n’abasanzwe, ku gupiganira amasoko ya Leta bakoresheje urubuga rwa ’Umucyo e-procurement’.

Abapiganira amasoko basabwe kujya bashaka ibyangombwa hakiri kare mu rwego rwo kwirinda ibibazo bagira ku munota wa nyuma.

Abatanga amasoko ya leta basabwe korohereza abayapiganira kubera Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .