00:00:00 IGIHE NETWORK KN KINYARWANDA EN ENGLISH FR FRANCAIS

Rotary Club Kigali Virunga mu rugendo rwo gutuma u Rwanda ruba Akarere ka Rotary International

Yanditswe na Igizeneza Jean Désiré
Kuya 31 Ukwakira 2022 saa 09:54
Yasuwe :

Umuryango Rotary Club Kigali Virunga wungutse abanyamuryango bashya 11, bituma baba Club ya mbere ku Isi yinjije abanyamuryango benshi mu gihe gito, kuko uyu muryango wari uherutse kwinjiza abandi 15 umwaka wa Rotary ugitangira. Abari abanyamuryango 34 mu mezi ane ashize, ubu ni 60.

Ni igikorwa cyabaye ku wa Gatanu tariki ya 28 Ukwakira 2022, cyahujwe na gahunda uyu muryango ukora yo gusura buri munyamuryango, hagamijwe kumenyana byimbitse. Kuri iyi nshuro bateraniye ku mubitsi mukuru wabo, Rotarian D.P. Singh utuye Mu Kiyovu.

Cyari ikigorwa cyatumiwemo abayobozi batandukanye barimo Ambasaderi wa Israel mu Rwanda, Dr Ron Adam, wanagenewe gihembo, cyakirwa na Perezida wa Rotary club Mount Jali, Ambasaderi Habyarimana Jean Baptiste.

Hari hatumiwe kandi na Perezida wa Rotary Club Gasabo, Victor Nkindi, na Perezida wa Rotary Club Doyen, Kayitare Florent.

Uyu muvuduko mu kwinjiza abanyamuryango bashya benshi uri muri gahunda ubuyobozi bwa Rotary Club Kigali Virunga bufatanyije n’izindi Club za Rotary uko ari icumi zo mu gihugu, bwiyemeje mu gushaka ko u Rwanda ubwarwo rwaba akarere ka Rotary kihariye.

Ibi bizatuma amafararanga yose agenerwa akarere yose ahabwa u Rwanda, bikazafasha mu kuzamura imibereho myiza y’Abanyarwanda cyane ko ari yo ntego ya Rotary.

Ubusanzwe muri Rotary, Akarere u Rwanda ruherereyemo kagizwe n’ibihugu icumi, bivuze ko amafaranga Rotary ku rwego rw’Isi igenera aka karere asaranganywa muri ibi bihugu, akajya gufasha imishinga bafite.

Kuri iyi nshuro, ubuyobozi bwa Rotary Club mu Rwanda burashaka ko u Rwanda ubwarwo ruba Akarere, rugatadukana n’ibindi bihugu, ariko kugira ngo bikunde rukaba rusabwa Club 80.

Umuyobozi muri Rotary Club Kigali Virunga ushinzwe gukurikirana isomero rya Kigali, Paul Birungi uzwi nka Masterjerb, avuga ko we na bagenzi be baganiriye n’Umuyobozi mukuru wa Rotary ku rwego rw’Isi, akabemerera ko nibageza kuri za Club 40 bazagirwa Akarere.

Uyu muyobozi wacyuye igihe nk’Umuyobozi Mukuru wungirije w’Akarere ka Rotary 9150 ariho u Rwanda rubarizwa, yatangaje ko Umuyobozi wa Rotary mu Isi yanabasezeranyije ko nibikunda azagaruka kubemeza ku mugaragaro.

Ati "Kugira ngo bitangire ugomba kwerekana ko bishoboka. Ubu twafashe gahunda ko uyu mwaka u Rwanda rwonyine rugomba kuba Akarere."

Birungi akomeza avuga ko Club yabo umwaka ushize yabyaye izindi ebyiri, Rotary Club Kalisimbi na Rotary Club Senior, buri imwe ikaba igizwe n’abanyamuryango barenze 30.

Ati "Tugiye kubyara indi muri iyi minsi ya Rotary Club Kigali Golf. Dufite intego ko mu mpera z’umwaka wa Rotary urangira mu kwa Gatandatu, tuzaba twuzuye abanyamuryango nibura 100."

Yemeza ko hari gahunda y’uko buri karere ko mu Rwanda kagira Club ya Rotary, zakwiyongera ho icumi ubundi umuhigo wo kugeza kuri club 40 ukaba ureshejwe.

Ku ruhande rw’abanyamuryango bashya binjiye mu muryango wa Rotary Club Kigali Virunga, bavuga ko bigendanye n’uko Rotary muri rusange iharanira impinduka nziza muri sosiyete, ari yo mpamvu nyamukuru yatumye binjira muri uyu muryango.

Rotarian Immy Mulekatete yagize ati "Rotary nyikundira ko buri gihe abayirimo bahora batekereza ku mibereho myiza ya bagenzi babo, ugahora utekereza icyo wakorera abandi kugira ngo ubuzima bwabo bugire aho bugera nk’uko Leta yacu yifuriza umunyarwanda wese kubaho neza."

Ni ingingo itajya kure y’iya Rotarian Gahigi Moses na we winjiye muri uyu muryango, aho avuga ko "kuba mu muryango wa Rotary bituma urenga kwitekerezaho, ahubwo ugatekereza n’uruhare wagira mu guteza imbere imibereho y’abandi".

Iyo akarere kagizwe n’ibihugu bitandukanye, imyanzuro igomba gufatwa n’ibyo bihugu byose bigomba kubyemeranyaho, ibyatandukana n’uko u Rwanda rwaba akarere ubwarwo, kuko byose byajya bikorerwa mu Rwanda nta kujya gusaba uburenganzira ahandi, intego Rotary y’u Rwanda ishyize imbere.

Amafaranga yo gufasha umushinga umwe muri Rotary ntajya munsi y’ibihumbi 200$ mu gihe umushinga wa menshi wemerewe miliyoni 1.2$ bijyana n’uko buri karere muri Rotary kemerewe imishinga ine yose igamije kujya mu Iterambere ry’Ibihugu.

Paul Birungi ati "Ayo mafaranga yose agomba kuza hano mu Rwanda." Ashishikariza abanyarwanda bumva bafite umutima wo kwita kuri bagenzi babo ko baba abanyamuryango ba Rotary, bagafatanya muri utu rugendo.

Rotary Club Kigali Virunga isanzwe ikora ibikorwa bitandukanye byo guteza imbere imibereho myiza y’abaturage binyuze mu nguni zitandukanye, kuko ari nabo bubatse isomero rya Kigali (Kigali Public Library) bafatanyije na Leta yu Rwanda n’abandi bafatanyabikorwa.

Basannye kandi inzu icumbikira abarwayi ba kanseri mu gihe bategereje kuvurwa.

Kuri iyi nshuro bahuye banakusanyije amafaranga agera kuri miliyoni 2,3 Frw, zo gufasha aba barwayi mu ngendo bakora bava kuri iyo nzu bubakiwe bajyanwa mu bitaro bya Kanombe kugira ngo bakomeze bakurikirwanwe.

Buri munyamuryango mushya yavugaga akamuri ku mutima bijyanye n'icyatumye yiyemeza kwinjira muri Rotary Club Kigali Virunga
Buri munyamuryango yakirwaga n'umubyeyi ushinzwe kumureberera no kumumenyereza ubuzima bwo muri Rotary Club Kigali Virunga
Rotary Club Kigali Virunga ikomeje kunguka abanyamuryango
Immy Mulekatete (hagati) avuga ko akunda ko buri gihe abo muri Rotary Club Kigali Virunga batekereza ku mibereho myiza y'abaturage
Iyo abanyamuryango ba Rotary Club Kigali Virunga basuye mugenzi wabo, barasabana
Paul Birungi yakira umwe mu banyamuryango bashya binjiye muri Rotary Club Kigali Virunga
Birungi yemeza ko bafatanije, Umwaka wa Rotary ugomba kuzarangira u Rwanda rubaye Akarere kihariye
PADG Paul Birungi afata ifoto y'urwibutso na Ambasaderi Jean Baptiste Habyarimana
Perezida wa Rotary Club Kigali Doyen, Kayitare Florent, na we yari mu batumiwe
Umunyamuryango wa Rotary Club Kigali Virunga yatanze inkunga ya $600 mu gufasha abarwayi ba kanseri bajya kwivuriza i Kanombe
Rotarian Gahigi Moses ni umwe mu banyamuryango bashya
Umusangiza w'amagambo yari Rotarian Andrew Kulayigye
Hizihijwe isabukuru za bamwe mu banyamuryango ba Rotary Club Kigali Virunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .