00:00:00 IGIHE NETWORK KN KINYARWANDA EN ENGLISH FR FRANCAIS

Robert Nyamvumba yavuye muri gereza

Yanditswe na Ntabareshya Jean de Dieu
Kuya 19 September 2022 saa 12:14
Yasuwe :

Nyamvumba Robert wahoze ari umukozi wa Minisiteri y’Ibikorwaremezo akaza guhamywa icyaha cyo gusaba no kwakira indonke, yafunguwe nyuma yo gusoza igihano yari yarakatiwe.

Nyamvumba yari umukozi wa Minisiteri y’Ibikorwaremezo ashinzwe Ishami ry’Ingufu. Yari afungiye icyaha cyo gusaba indonke kugira ngo hakorwe ikinyuranyije n’amategeko.

Umuvugizi w’Urwego rushinzwe Imfungwa n’Abagororwa, RCS, SSP Pelly Uwera Gakwaya, yemeje ko Nyamvumba yafunguwe ku wa Gatandatu, tariki ya 17 Nzeri 2022, asoje igihano.

Ati "Yatashye ku wa Gatandatu arangije igihano."

Icyaha Nyamvumba yahamijwe yari agikurikiranyweho biturutse ku kirego cyatanzwe n’uwitwa Javier Elizalde ufite ubwenegihugu bwa Espagne.

Javier yapiganiye isoko muri EDCL akoresheje sosiyete yitwa Salvi Istanbul Electric Ware & Patronics afatanyije n’indi yitwa Loyal Trust Company.

Iryo soko ryaje kugabanywa uburebure bw’ibilometero byagombaga kubakwaho ayo matara, maze n’igiciro kiragabanuka kiba miliyari 48,4 Frw.

Uwo Munya-Espagne yaje gusabwa kujya mu mishyikirano yo gusinya amasezerano, asaba ko igice kimwe yazishyurwa mu ma-euro, ikindi akishyurwa mu manyarwanda bityo biza gutinda cyane kuko byari binyuranyije n’amategeko.

Tariki ya 23 Mutarama 2020, bivugwa ko Nyamvumba yahamagaye Elizalde watsindiye isoko amusaba kuza mu Rwanda bakavugana kuri dosiye y’isoko yatsindiye, maze tariki ya 26 Mutarama 2020 undi agera i Kigali.

Nyamvumba ngo yamusanze muri hoteli ku Kimihurura aho yari acumbitse, amubwira ko yashakaga ko baganira kuri dosiye ye yari muri Minecofin, icyo gihe kuko ariyo yigaga uburyo bwo kuzamwishyura, amusaba ko yamuha komisiyo ya 10%.

Nyamvumba yaje gutabwa muri yombi muri Werurwe 2020, akurikiranyweho icyaha cyo kwakira indoke.

Mu maburana ya mbere Nyamvumba yabanje gusa n’uhakana iki cyaha byanatumye abanza gukatirwa igifungo cy’imyaka itandatu n’ihazabu ya miliyari 21,6 Frw.

Mu ntangiriro za Mutarama 2020 yarajuriye atakambira urukiko anahindura imvugo ndetse asaba imbabazi ku byo yakoze.

Icyo gihe yabwiye abacamanza ko yagirirwa impuhwe, ko ihazabu yaciwe adashobora kuyibona. Yasabye imbabazi Umukuru w’Igihugu n’izindi nzego zirimo ubugenzacyaha hamwe n’Abanyarwanda.

Tariki 7 Gashyantare 2022 Urukiko rwasomye umwanzuro ku bujurire bwe, rufata umwanzuro wo kumugabanyiriza igihano, ku bwo kwemera icyaha nubwo Ubushinjacyaha bwari bwasabye ko icyo yahawe mbere kigumishwaho.

Yahawe gufungwa imyaka ibiri n’igice, akanatanga ihazabu ya miliyoni 50 Frw.

Nyamvumba yatangiye gukurikiranwa muri Gashyantare 2020 ariko atabwa muri yombi muri Werurwe uwo mwaka.

Nyamvumba yarekuwe kuri uyu wa Gatandatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .