REMA yaburiye inganda zangiza ibidukikije ko zishobora gufungwa

Yanditswe na HABIMANA James
Kuya 16 Ugushyingo 2018 saa 06:59
Yasuwe :
0 0

Ikigo cy’Igihugu gishinzwe kubungabunga ibidukikije, REMA, cyashimangiye ko umuntu wese ufite uruganda agomba kubahiriza itegeko rishya ryo kubugabunga ibidukikije, bitaba ibyo agahabwa ibihano birimo gucibwa amande agera kuri miliyoni 200Frw no gufungwa.

REMA ivuga ko nta kujenjeka kuri buri wese utazubahiriza amategeko, uko yaba ameze kose.

Ibi bikubiye mu nama yahuje REMA n’abanyenganda ndetse n’abandi bafite ibikorwa mu cyanya cyahariwe inganda cya Kigali kuri uyu wa Gatanu, hagamijwe kubamenyesha amategeko mashya arebana n’ibidukikije, bamenyeshwa n’umushinga baturanye uri mu gishanga cya Nyandungu.

Umuyobozi wungirije wa REMA, Munyazikwiye Faustin, yabwiye aba bikorera ko babwirijwe kubahiriza amategeko y’ibidukikije kuko ngo iyo bidakozwe neza bibangamira ubuzima bwa muntu n’ibidukukije muri rusange.

Yavuze ko nyuma yo y’itegeko ryo kubungabunga ibidukikije ryashyizweho mu 2005, basanze uyu mwaka rikwiye kuvugurwa kandi byamaze gukorwa.

Yavuze ko bijyanye no kurengera ibidukikije, uyu munsi hari ibibazo birebana n’umwanda uturuka mu bikoresho by’ikoranabuhanga, ariko mbere kugira ngo umuntu ahanwe byabanzaga kunyuzwa mu Rukiko, bikadindiza ishyirwa mu bikorwa ry’ibihano kuko ibimenyetso byaburaga.

"Ubu noneho umuntu wagiye gukora ubugenzuzi mu nganda azajya ahita aguca amande. Umuntu kandi ufite urunganda uzajya agira uruhare mu myanda y’uburozi ikangiza ahantu nk’inzuzi, ibiyaga n’ahandi, mu itegeko rya mbere yacibwaga amande ya milioni 5Frw no gufungwa umwaka umwe kugeza kuri ibiri, ariko mu itegeko rishya, umuntu ufite uruganda azajya afungwa kuva ku myaka 7 n’amande ava kuri miliyoni 100 kugeza kuri miliyoni 200.”

“Yego REMA ntabwo yifuza gufunga inganda ariko nk’uko itegeko ribiteganya, igihe wagiriwe inama ntuzikurikize, mu gihe wahawe amabwiriza agendanye n’itegeko ntuyakurikize, kuba wafungirwa ni kimwe mu bishora gukorwa.”

Bamwe mu bacuruzi bo bavuga ko ibi bihano bikomeye ku bucuruzi bwabo, ko ahubwo REMA yari gushyira imbere kubagira inama.

Umuyobozi Mukuru w’uruganda rwa Matelas Dodoma, Anand Moro, yagize ati “Nk’Urwego rugenzura iyangirika ry’ikirere, nk’uko kandi basanzwe baza mu nganda buri mezi atandatu kureba ibihabera rimwe na rimwe bakaduha n’ibitekerezo, nibyo byagombaga kuba byiza kurushaho, muzi ko n’u Rwanda rurimo gukangurira abashoramari kuza gushora imari mu Rwanda.”

Anand avuga ko abashoramari bamwe usanga batazi ibyo bintu bihumanya ikirere, bityo REMA ikwiye kuba urwego rutanga inama z’uko bakwirinda ibyo bihungabanya ikirere.

Bamwe mu bacuruzi banumvikanye bavuga ko miliyoni 200Frw zatuma abenshi bafunga inganda zabo burundu, mu gihe batanga imisoro myinshi mu gihugu ndetse bakanatanga akazi ku baturage batari bake.

Gusa REMA yo ivuga ko n’ubwo batanga imisoro cyangwa bagaha akazi abantu benshi, bitavanaho ko kubahiriza ubuzima bw’abaturage biza imbere kurusha ibindi byose abafite inganda batekereza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza