REG yakuriyeho abashaka kubaka inganda nini ikiguzi cyo kuzigezamo amashanyarazi

Yanditswe na Evariste Nsengimana
Kuya 5 Mutarama 2019 saa 10:54
Yasuwe :
0 0

Sosiyete y’u Rwanda Ishinzwe Ingufu (REG) yatangaje ko yakuriyeho abashoramari bashaka kubaka inganda nshya nini, amafaranga zacibwaga yo kuzigezamo amashanyarazi mu rwego rwo koroshya ishomari mu gihugu.

Guhera ku wa 1 Mutarama 2019, umushoramari ugiye gushinga uruganda runini mu Rwanda, agezweho amashanyarazi nta kiguzi na kimwe yatswe ariko akaba agomba kubisaba yifashishije ikoranabuhanga.

Amafaranga umushoramari yacibwaga kugira agerezwe amashanyarazi ku ruganda aratandukanye bitewe n’impamvu zirimo n’intera iri hagati yarwo n’aho umuyoboro w’amashanyarazi uherereye.

Urugero nk’ururi muri kilomotero imwe uvuye ku muyoboro bigera kuri miliyoni 40Frw habariwemo n’icyuma kiringaniza umuriro (Transformer).

Umuyobozi Mukuru wa REG, Ron Weiss, yavuze ko umwanzuro wo kuyatanga nta kiguzi, wafashwe mu gushyigikira gahunda ya Leta yo koroshya ishoramari.

Ati “Urabizi ko ku gihugu ari iby’ingenzi kuvugurura ishoramari. Igihugu cyashyizemo imbaraga nyinshi mu myaka ishize kugira ngo kigere ku mwanya mwiza, abantu baje hano, bagomba koroherwa n’ibintu byose mu gukora ishoramari.”

Raporo ya Banki y’Isi ya ‘Doing Business 2017’, yerekanye ko urwego rw’ingufu mu Rwanda rwavuye ku mwanya wa 119 mu mwaka wabanje rugera ku wa 68.

Iyi ni imwe mu nkingi za mwamba zatumye n’u Rwanda rwongera kuba igihugu cya kabiri muri Afurika yo munsi y’Ubutayu bwa Sahara cyorohereza abashoramari, rukaza ku mwanya wa 29 ku Isi ruvuye ku mwanya wa 41.

Iyo raporo yerekanye ko u Rwanda ari cyo gihugu cyakoze amavugurura menshi yorohereza abashoramari kurusha ibindi muri Afurika mu myaka 15 ishize.

Ron ati “Turashaka gukomeza kuvugurura. Dukomeza gukora amavugura menshi kugira ngo dutange umurongo mugari by’umwihariko dutanga serivisi inoze, kugira ngo tuzane inganda nyinshi mu gihugu.”

Ron yavuze ko kimwe mu bibazo byugarije iterambere ry’inganda harimo ikiguzi zitanga kugira ngo zibone umusaruro nko kugura ibikoresho zifashisha, guhemba abakozi, kwishyura amazi, amashanyarazi n’ibindi, agasanga kuzifasha kwegerezwa amashanyarazi nta kiguzi byazifasha gukora ishoramari rizoroheye.

Kureshya inganda nyinshi mu gihugu ni kimwe mu bigifasha kwihuta muri gahunda zacyo z’iterambere.

Abashoramari bafite inganda nshya bashaka kugezwaho amashanyarazi, basabwa kuzuza ifishi iboneka ku rubuga rwa REG (http://www.reg.rw/customer-service/request-a-new-connection/ ), gusaba hakoreshejwe iri koranabuhanga nicyo gisabwa kuko kutabyubahiriza bizatuma utazabikora we azajya yiyishyurira.

Inganda ebyiri nizo zari zimaze kuryiyandikishaho kugera ku wa 3 Mutarama 2019, ariko REG ikomeza gushishikariza abashoramari kubyaza umusaruro aya mahirwe.

Muri Kanama umwaka ushize, Urwego Ngenzuramikorere, RURA, rwakoze impinduka mu biciro by’amashanyarazi byatangiye gukoreshwa guhera ku wa Mbere tariki 13 Kanama 2018.

Inganda zashyizwe mu byiciro bitatu, icya mbere gishyirwamo inganda nto zikoresha umuriro utarenga kWh 22000 ku mwaka; ikindi gishyirwamo inganda ziciriritse zikoresha amashanyarazi ari hagati ya kWh 22000-66000, ikindi gishyirwamo izikoresha kWh guhera kuri 660000.

RURA yavuze ko inganda zizajya zishyuzwa amashanyarazi bitewe n’igihe cy’umunsi uruganda ruri kuyakoreshamo, niba ari mu gihe abantu batari kuyakoresha ari benshi zishyure ku giciro gito, naho mu gihe abaturage bari kuyakoresha nabo, zishyure amafaranga menshi.

U Rwanda rufite ubushobozi bwo gutunganya Megawatt (MW) zisaga 220. Ingo zirenga miliyoni 1,27 zifite amashanyarazi yaba akomoka ku zuba cyangwa ku muyoboro mugari.

REG yakuriyeho abashaka kubaka inganda nini nshya ikiguzi cyo kuzigezamo amashanyarazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza