Radio Salus, umusingi w’impinduka mu itangazamakuru rya none yizihije isabukuru y’imyaka 15

Yanditswe na Prudence Kwizera
Kuya 18 Ugushyingo 2020 saa 08:57
Yasuwe :
0 0

Radio Salus ifatwa nk’iyazanye impinduka mu itangazamakuru rigezweho mu Rwanda yizihije imyaka 15 imaze itangiye kuvugira ku mirongo ya FM kuko yasakaje amajwi bwa mbere tariki ya 18 Ugushyingo 2005.

Ni radio yatangiye ifite intego nyamukuru yo gufasha abanyeshuri biga itangazamakuru ndetse n’abandi babyifuza, kubona aho bimenyerereza kuzavamo abanyamwuga.

Bamwe mu banyamakuru batangiranye nayo bavuga ko icyo gihe bagerageje gushyiraho ibiganiro byihariye ugereranyije n’ibyatambukaga ku zindi radio nke zari mu gihugu.

Emma Claudine Ntirenganya wabaye uwa mbere mu kuvugira kuri micro zayo mu 2005 yemeza ko Radio Salus yazanye impinduka mu mwuga w’itangazamakuru mu Rwanda.

Ati “Nagize umugisha wo kuba umwe mu batekereje gahunda yayo duhereye ku busa, ikintu cyanejeje kurusha ibindi ni ukuba twarayitangije mu bihe hatari hakabayeho andi maradiyo yigenga menshi, (…) ikinshimisha ni uko yabaye radio yamenyekanye cyane igakundwa cyane ikaba intangarugero kubera ibiganiro bidasanzwe yakoraga.”

Ntirenganya yakoraga ikiganiro cyakunzwe cyane kigaruka ku buzima bw’imyororokere cyitwa ‘Imenye nawe’ avuga ko yagitekereje agamije gufasha abaturage kwiyitaho no kwita ku bana babo.

Avuga ko adashobora kwibagirwa uburyo ibyo yavugiraga muri icyo kiganiro byafashije benshi.

Ati “Urugero sinjya nibagirwa umubyeyi wanyandikiye anshimira ubwo nari namaze gukora ku kibazo cy’udusabo tw’intanga tw’umwana w’umuhungu, umwana we yari yaravukanye icyo kibazo, hanyuma yumvise ikiganiro kuri Radio Salus ajya kuvuza umwana we kandi birakosoka.”

Radio Salus kandi yanyuzeho abantu batandukanye bubatse amazina mu itangazamakuru ry’u Rwanda, bakarivana ku rwego rumwe, rikagera ku rundi.

Bisangwa Nganji Benjamin uzwi nka Ben Nganji yakoze kuri Radio Salus kuva mu 2007. Akihava yakomereje itangazamakuru ahandi ariko yubakiye ku kiganiro cyitwa Umuranga yakoraga kuri radio ya kaminuza yamuharuriye inzira.

Ati “Ku buryo n’ahandi hose nagiye nkora haba kuri Radio Isango Star no kuri KT radio, ikiganiro ‘Umuranga’ kirimo indirimbo z’imiranzi za kera nakoraga ni cyo nubakiyeho ibindi biganiro byose nagiye nkora, biramfasha bituma nkura mu mwuga w’itangazamakuru no mu buhanzi nkora.”

Kugeza ubu Radio Salus ifatwa nk’umubyeyi wareze benshi mu banyamakuru bamaze kumenyekana cyane mu Rwanda ndetse no ku Isi nzima.

Muri bo twavuga nka Nsengiyumva Prudent, Bagirishya Jean de Dieu (Jado Castar); Ally Soudy, Mike Karangwa, Karenzi Sam; Ingabire Egidie Bibio; Muhirwa Terence; Mushashi Aimée Beauté; Iradukunda Michelle (Michu); Gentil Gedeon; Bayingana David; Mutuyeyezu Oswald (Oswakim); Hakizimana Jean Claude (Eddy Claude Mudenge); Ngabirano Olivier; Alphonse Muhire Munana; Ferdinand Uwimana; Ismaél Mwanafunzi, Rukizangabo Shami Aloys, Ildephonse Sinabubariraga, Tuyishime Jado Fils n’abandi.

Aba banyamakuru babaye ibyamamare, bakiva kuri Radio Salus bahakuye ubumenyi bakomereza ku bindi bitangazamakuru, ndetse bahajyana impinduka mu biganiro byaho.

Hambere mu biganiro nk’Imyidagaduro n’Imikino wasangaga byarakorwaga n’amaradiyo make yari mu gihugu ariko hakivugirwa amakuru y’ibyabaye gusa nta gusesengura. Aho Radio Salus itangiriye gusakaza amajwi yazanye impinduka zirimo gukora ubusesenguzi no gutanga inama ku buryo n’abandi barebeyeho.

Micomyiza Jean Baptiste wakoze kuri Radio Salus mu 2008 mu biganiro birimo imyidagaduro yemeza ko aho we na bagenzi be bakoze nyuma yo kuyivaho, bahajyanye ibiganiro bakoraga babihindurira amazina.

Ati “Bariya banyamakuru mwumva benshi n’ibiganiro bagiye bahimba bagiye barebera kuri Radio Salus bakareba uko ikiganiro cyari giteye bakacyita irindi zina ariko ariyo mu by’ukuri barebeyeho. Niyo yabaye indorererwamo yo kwireberamo kubera ibiganiro twakoraga twabanje gukora ubushakashatsi.”

Emma Claudine Ntirenganya avuga ko Radio Salus yagize uruhare mu guteza imbere imyidagaduro mu Rwanda kuko abanyamakuru bayikoragaho bagize uruhare mu gushinga Ikirezi Group yashyizeho ibihembo bizwi nka ‘Salax Awards’ bihabwa abahanzi bitwaye neza kurusha abandi mu mwaka.

Umuyobozi wa Kaminuza y’u Rwanda, Ishami rya Huye, Dr Alphonse Mulefu, avuga ko Radio Salus bazakomeza kuyiha ingufu kugira ngo ibashe kumvikana mu gihugu hose ndetse ivugurure n’imikorere, kubera akamaro ifitiye abanyeshuri n’abaturage muri rusange.

Yagize ati “Kaminuza y’u Rwanda izakomeza guha ingufu Radio Salus kugira ngo irusheho kumvikana mu Rwanda hose kandi ivugurure imikorere yayo ikoresha ikoranabuhanga, (…) ariko cyane cyane kugira ngo ikomeze ihugure abanyeshuri biga itangazamakuru, kuba abanyeshuri b’umwuga basoza bafite indangagaciro n’uburere bwifurizwa umunyarwanda mu gihugu.”

Mu myaka 15 Radio Salus imaze, ubuyobozi bwayo bwishimira intambwe yagejeje ku itangazamakuru ryo mu Rwanda, ndetse n’iryo ku ruhando mpuzamahanga, n’ubwo iyi radiyo yagiye ihura n’ibibazo bitandukanye byanatumaga inyuzamo igahagarara.

Icyicaro cya Radio Salus mu Karere ka Huye igihe yatangizwaga mu 2005
Emma Claudine Ntirenganya ni we wavugiye bwa mbere kuri Radio Salus nk'umunyamakuru wayo mu 2005
Umuyobozi wa Kaminuza y’u Rwanda, Ishami rya Huye, Dr Alphonse Mulefu, avuga ko Radio Salus bazakomeza kuyiha ingufu kugira ngo ibashe kumvikana mu gihugu hose ndetse ivugurure n’imikorere
Umuyobozi wa Radio Salus, Mbaraga Paul, ubwo iyi radio yatambutsaga by'ako kanya [live] umuhango wo gutanga Impamyabumenyi ku banyeshuri ba Kaminuza yu Rwanda
Ben Nganji wubakiye izina kuri Radio Salus ubu ni umuhanzi akaba n'umwanditsi w'amakinamico
Eddie Claude Mudenge wamamaye kuri Radio Salus mu myaka ya 2012
Emma Claudine Ntirenganya ni we munyamakuru wa mbere wavugiye kuri micro za Radio Salus mu 2005 kandi yagize uruhare mu gutegura gahunda zayo
Gentil Gedeon wamenyekanye kuri Radio Salus ubu ni umunyamakuru ukomeye wa KT Radio
Hagabimana Eugène wayoboye Radio Salus igihe kirekire, ubu ni umukozi muri Kaminuza y'u Rwanda
Ismael Mwanafunzi wakoreye Radio Salus, ubu ni umunyamakuru wa Radio Rwanda
Mazimpaka Jean Pierre wakoreye Radio Salus mu myaka ya 2013
Micomyiza Jean Baptiste wamamaye kuri Radio Salus mu myaka ya za 2008
Muhirwa Terence umwe mu banyamakuru batangiranye na Radio Salus mu 2005 akayobora n'ibiganiro byayo igihe kirekire
Ngabirano Olivier wanyuze kuri Radio Salus mu myaka ya za 2011 ubu ni Umwanditsi Mukuru wa TV1
Bamwe mu bakora kuri Radio Salus muri iki gihe bari kumwe na bamwe mu bakozi ba UR Huye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .