PSF yegereye abanyenganda ikusanya ibikoresho byo kubakira inzu abarokotse Jenoside batishoboye

Yanditswe na Tombola Felicie
Kuya 10 Mata 2018 saa 06:56
Yasuwe :
0 0

Urugaga rw’Abikorera mu Rwanda (PSF) rwatangaje ko rwatangiye gukorana n’abanyamuryango barwo bafite inganda ngo buri wese atange ku byo akora, bubakire abarokotse Jenoside yakorewe Abatutsi batishoboye bo mu Mudugudu wa Rugerero, Akarere ka Rubavu.

Ni igikorwa cyo kubaka inzu 32 ziherereye mu Murenge wa Rugerero watujwemo imiryango ijana y’abarokotse Jenoside batishoboye.

Uwo mudugudu ugizwe n’inzu 50, utuwemo n’abasaga 100, inzu imwe ba ituwemo n’imiryango ibiri. Akarere kamaze kuzuza inzu 18, hakaba hasigaye 32 ngo bose bimurwe muri izo nzu zishaje.

Inganda zirimo kwegerwa ni izikora amabati, sima, imisumari, inzugi, ibirahuri, amarangi n’ibindi bikenerwa mu bwubatsi, buri rwose rukazatanga ikijyanye n’icyo rukora mu gufata mu mu mugongo abo batishoboye.

Umuyobozi ushinzwe Abakozi muri PSF, Mutagoma Felix, yavuze ko ku wa 12 Mata 2018 aribwo inzu ya mbere izatangira kubakwa.

Yagize ati “Kuko abikorera bashishikajwe no kubaka igihugu ndetse no gufata mu mugongo abayirokotse, tariki ya 12 Mata ibikorwa byo kubaka bizatangira kandi turashaka ko abikorera babigira ibyabo yose tukazayubaka.”

Yakomeje agira ati “Twatangiye kwegera abanyenganda bamwe bakora amarangi, amabati, imisumari, inzugi kugira ngo babigire ibyabo kandi turimo kubona bigenda neza ku buryo inzu tuziyemeza kubaka, zizaba zarangiye muri iyi minsi 100 yo kwibuka.”

Biteganyijwe ko inzu imwe mu zizubaka izajya iba ifite agaciro k’amafaranga y’u Rwanda abarirwa muri miliyoni 22 Frw.

Abandi banyamuryango ba PSF batari abanyenganda nabo bazakomeza ibikorwa byo kwibuka, birimo ko muri buri ntara bazasura urwibutso hagamijwe kuganirizwa ku mateka ya Jenoside, bakagira umusanzu bahasiga wo kurusigasira.

Uretse ibyo, PSF yanavuze ko hari abarokotse jenoside bazaremerwa bagahabwa inka n’ubundi bufasha butandukanye ku batishoboye.

PSF yatangiriye ibikorwa byo kwibuka mu Mujyi wa Kigali, ku wa 9 Mata 2018; abikorera bakoze urugendo rwo kwibuka bagenzi babo bazize Jenoside yakorewe Abatutsi mu 1994, banasura Urwibutso rwa Jenoside rwa Kigali.

Inzu zishaje abarokotse Jenoside babamo mu mudugudu wa Rugerero
Imiterere y'inzu izaba ituwemo n'imiryango ibiri mu mudugudu wa Rugerero

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .