Prof. Sam Rugege wayoboye Urukiko rw’Ikirenga yagizwe Umuyobozi w’Akanama Ngishwanama k’Abahuza mu manza

Yanditswe na Ndahayo Emmanuel
Kuya 31 Kanama 2020 saa 10:00
Yasuwe :
0 0

Prof. Sam Rugege wigeze kuba Perezida w’Urukiko rw’Ikirenga, yatorewe kuyobora Akanama Ngishwanama k’Abahuza mu manza zaregewe inkiko kazareberera urwego rw’abahuza 51 bigenga, bazajya bifashishwa mu gihe ababuranyi bifuje gukemura ibibazo mu bwumvikane.

Amatora ashyiraho aka kanama yabaye kuri uyu wa Mbere, tariki ya 31 Kanama 2020.

Ni akanama gafite inshingano zo gushaka uburyo ubuhuza mu nkiko bwatera imbere, bukarushaho gukorwa kinyamwuga ndetse bugatanga umusaruro ugaragara.

Aka kanama kazaba gashinzwe gutanga ubujyanama mu byo guhuza abantu, gukurikirana imikorere y’abahuza bigenga no kubagira inama no gufata ingamba zarushaho guteza imbere urwego rw’ubwunzi muri rusange.

Urwego rw’abahuza ruzajya rwunga imanza mbonezamubano, iz’ubucuruzi, iz’ubutegetsi n’iz’umurimo. Izi manza zikazajya zigomba kuba zageze ku rwego rw’inkiko.

Usibye Prof. Rugege watorewe kuyobora ako kanama, Dr. Aimé Kalimunda, Perezida w’Urukiko rw’Ubujurire, yatorewe kumwungiriza (Vice-Chairperson) mu gihe Bernadette Uwicyeza yabaye Umwanditsi.

Prof. Sam Rugege yavuze ko urwego rw’ubwunzi rukwiye gutezwa imbere mu Rwanda, hashingiwe ku buryo iki gikorwa gifite imizi mu muco Nyarwanda ndetse n’akamaro kacyo mu butabera muri rusange.

Yongeyeho ati “Ndizera ko Urwego rw’ubwunzi ruzaba icyambu cyo gucyemuriramo amakimbirane.”

Prof. Rugege yavuze ko inzego zose zikwiriye kwigishwa akamaro k’abahuza, kuva ku baturage ndetse n’abasanzwe bakora mu nzego z’ubutabera.

Yasabye ko abanyamategeko basanzwe batagomba kumva ko urwego rw’ubwunzi ruje kubatwara akazi, avuga ko bashobora gukomeza kwinjiza amafaranga nk’uko byari bisanzwe ariko binyuze mu bwunzi aho kuba mu nkiko.

Umuvugizi w’Inkiko z’u Rwanda, Harrison Mutabazi, yavuze ko uru rwego ruzagira umumaro ufatika ku butabera bw’u Rwanda, runagabanye igitutu cy’imanza nyinshi ku nkiko z’u Rwanda.

Yagize ati “Bizafasha cyane kwihutisha imanza. Nk’uko mubizi imanza zisanzwe hari igihe zitinda kubera ko niba umuntu aburanye ku rwego rwa mbere, hari igihe bisaba ko umuntu ajurira bikagera ku rwego rwa kabiri. Ariko iyo urubanza rurangirijwe mu bunzi, ruba rurangiye burundu, bivuze ko imanza zihuta kandi abari bafitanye amakimbirane bakongera bakunga ubumwe.”

Perezida w’Urukiko rw’Ikirenga, Dr. Faustin Nteziryayo, yavuze ko ibikorwa byo kwigisha abahuza bizakomeza.

Yagize ati “Twagaragaje urutonde rw’abahuza 50 bazafasha abacamanza n’abanditsi b’inkiko mu kunga imanza ziri mu nkiko kandi tuzakomeza kwigisha abanyamwuga mu bijyanye no kunga ndetse no gukomeza gukora ubuvugizi [kugira ngo abantu] bumve imikorere y’ubwunzi”.

Muri rusange, mu mwaka w’ubucamanza wa 2018 – 2019, inkiko z’u Rwanda zakiriye imanza 75 419, hacibwa 72 648. Mu manza zaciwe, izigera ku 14 914 zanyuze mu ntegurarubanza, mu gihe 610, bingana na 3%, ari zo zarangijwe bitanyuze mu iburanisha.

Ni umubare ukiri hasi cyane ugereranyije n’ibihugu byateye imbere, aho ikigero cy’imanza zakemuwe hifashishijwe ubwunzi gishobora kugera kuri 90%.

Prof. Sam Rugege yatorewe kuyobora Akanama Ngishwanama k'Abahuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .