ACP Rutikanga avuga ko nta mayeri yandi akoreshwa mu kuba umujyi wa Kigali ufite umutekano, uretse umuhate polisi isanganwe mu kazi.

Yagize ati ʺImyaka 20 irashize hagaragara ibyaha n’ akajagari mu mujyi wa Kigali, muri iki gihe amategeko yarakajijwe n’ ibyaha byo mu mujyi biragabanuka.”

Avuga ko ibyaha bikigaragara birimo ubwambuzi bushukana, icuruzwa ry’ ibiyobyabwenge, gukora mu mifuka, ubujura bw’ imodoka, ubucuruzi bw’akajagari, n’ibindi.

ACP Rutikanga avuga ko nta cyaha cyoroshye nta n’ igikomeye kibaho.

Ati” Gushikuza amasakoshi abakobwa, kwiba ibikoresho by’ ikoranabuhanga, byose tubikurikirana mu buryo bumwe, iyo duhawe ikirego iperereza rihita ritangira gukorwa. ʺ

Akomeza avuga ko abapolisi batabera ahantu hose icyarimwe, akaba ari yo mpamvu hashyizweho urwego rwa gufatanya n’abaturage (Community policing) kugira ngo buri wese agire uruhare mu kurwanya ibyaha.

Umukuru wa Polisi mu Mujyi wa Kigali yasabye abaturage kwicara hamwe bakigira hamwe uko bakwirinda ubwabo n’ ibyabo, bityo ibyaha bikagabanuka.