Polisi igiye kwinjira mu kurwanya inda ziterwa abangavu binyuze mu bukangurambaga budasanzwe

Yanditswe na Evariste Nsengimana
Kuya 3 Mutarama 2020 saa 08:46
Yasuwe :
0 0

Polisi y’Igihugu yatangaje ko igiye gutangiza ubukangurambaga bushya bugamije gukumira ibintu bibangamira uburenganzira bw’umwana birimo inda ziterwa abangavu zikomeje kwiyongera umunsi ku wundi.

Byatangajwe kuri uyu wa 3 Mutarama 2020 n’Umuvugizi wa Polisi y’Igihugu, CP Jean Bosco Kabera, mu kiganiro Polisi yagiranye n’abanyamakuru kigaruka ku migendekere y’umutekano mu mwaka wa 2019 n’ibiteganyijwe mu 2020.

CP Kabera yavuze ko ubukangurambaga bwiswe ‘Rengera Umwana’ hari gutegurwa uko buzakorwa, bukunganira gahunda ya ‘Gerayo amahoro’ imaze igihe itangijwe.

Ati “Muri uyu mwaka wa 2020 Polisi y’u Rwanda igiye gutangiza ubukangurambaga bwitwa Rengera Umwana, tukaba turimo gukorana inama n’abafatanyabikorwa batandukanye kugira ngo twigire hamwe uburyo bwatangizwa dufatanyije n’indi miryango ifite mu nshingano kurengera abana.’’

Ubu bukangurambaga polisi izabufatanya n’imiryango itari iya Leta bwunganire “Gerayo Amahoro” imaze ibyumweru bisaga 32 muri 52 iteganyijwe.

Ati “Gerayo Amahoro ntabwo izahagararara, uko turi kubikora ni uko umunsi twatangije ubwo bukangurambaga tuzabahamagara, kandi turabizeza ko butazayikoma mu nkokora.’’

Ubu bukangurambaga buzagira uruhare mu kugaragaza ibibazo byugarije abana no kubishakira umuti. Bimwe muri ibyo harimo icy’abangavu baterwa inda gikomeje gufata indi ntera, abana bakoreshwa imirimo ivunanye, guta ishuri, icuruzwa ry’abantu, cyane cyane irikorerwa abana, gukoresha ibiyobyabwenge n’ibindi.

Ati “Icyatumye tubutekereza bishingiye ku mibare y’igihe cyashize murabizi ko itari myiza. Ntabwo ari ubukangurambaga buzamara umunsi umwe cyangwa ibiri, cyangwa ukwezi, turatekereza ko nabyo bizatanga umusaruro kuko tumaze kubona ko aho dutangirije Gerayo amahoro birasa n’aho aricyo cyabaye ikiganiro hagati y’abantu.”

Yakomeje agira ati “Iki kibazo cyagiye kigaragara ko kibangamiye abana kiri mu ihohotera nidushyiraho ubukangurambaga buhoraho, bwitwa Rengera Umwana tukareba ibijyanye n’uburenganzira bwabo, ababatera inda, uruhare rw’imiryango yabo, uruhare rw’abana n’abarimu, ni bande babateye inda kugira ngo polisi ibe yabahiga bukware, turatekereza ko hari ikizagerwaho.”

Minisiteri y’Uburinganire n’Iterambere ry’Umuryango (Migeprof) igaragaza ko ikibazo cyo gusambanya abana no kubatera inda gikomeje gufata indi ntera, igasaba inzego zitandukanye, by’umwihariko abagabo gufatanya mu gukumira iki kibazo kigira ingaruka zikomeye ku muryango nyarwanda.

Imibare igaragaza ko mu mwaka wa 2016, abangavu basambanyijwe bakabyarira kwa muganga bari ibihumbi 17 849, mu 2017 bagabanutseho gake bagera kuri 17337. Gusa iyi mibare yongeye kuzamuka mu mwaka wa 2018 igera kuri 19 832 mu gihe guhera muri Mutarama 2019 kugera muri Kanama imibare yabo yari imaze kugera kuri 15 596. Bivuze ko bose hamwe ari 70 614 guhera mu 2016.

Nubwo imibare y’abangavu basambanywa bakanaterwa inda ikomeza kwiyongera, igiteye inkeke ni uko abagabo n’abasore babasambanya badafatwa ngo bashyikirizwe ubutabera uko bikwiye, rimwe na rimwe bitewe no kubahishira bigirwamo uruhare n’inzego zitandukanye.

Imibare y’Ubushinjacyaha bw’u Rwanda igaragaza ko mu mwaka wa 2018/19, abagabo bakekwagaho ibyaha byo gusambanya abangavu byari 3320, mu 2017/18 bari 2926 naho mu mwaka wawubanjirije bari 2030. Abagore bakekwagaho gusambanya abana bavuye kuri 62 mu 2016/17 bagera kuri 75 mu 2017/18 naho mu 2018/19 bagera kuri 97.

Umuvugizi wa Polisi y’Igihugu, CP Jean Bosco Kabera n'Umuyobozi wa Polisi w'Ishami rishinzwe Umutekano wo mu muhanda, CP Mujiji Rafiki baganira n'abanyamakuru

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .