PIASS igiye kubera igisubizo abanyamadini bari kugongwa n’itegeko rishya rigenga amatorero

Yanditswe na Mukaneza M.Ange
Kuya 15 Nzeri 2018 saa 08:35
Yasuwe :
0 0

Mu gihe abanyamadini bari bahangayikishijwe no kuba bagongwa n’itegeko rishya riteganya ko umuntu ushaka kuba umwigisha agomba kuba afite impamyabumenyi ya Kaminuza mu by’Iyobokamana (Tewolojiya), Kaminuza y’Abaporotesintati, PIASS igiye kubohereza kwiga aya masomo.

Muri Nyakanga 2018 nibwo Inteko Ishinga Amategeko yatoye Itegeko rigena imitunganyirize n’imikorere y’Imiryango ishingiye ku myemerere.

Iri tegeko riteganya ko umwigisha agomba kuba afite impamyabumenyi ya kaminuza mu by’iyobokamana (Tewolojiya), cyangwa indi mpamyabumenyi ya kaminuza hiyongeraho impamyabushobozi yemewe mu byerekeye iyobokamana yatanzwe n’ishuri ryemewe.

Mu nama yateranye ku wa 14 Nzeri, Ubuyobozi bwa PIASS iteganya guhindura izina ikitwa PUR (Protestant University of Rwanda), butangaza ko bugiye gutangiza amasomo azatuma abapasiteri bo mu matorera y’abaporotesitanti batagongwa n’iri tegeko.

Umuyobozi Mukuru wa PIASS, Prof Rev. Pasteur Elisee Musemakweli yagize ati “Ubu PIASS yamaze gufungura icyiciro cya gatatu muri Tewolojiya kizatangira mu Ugushyingo. Turacyakomeza kandi kwakira ab’icyiciro cya kabiri cya kaminuza. Umwaka utaha tuzatangira kwakira n’abize ibindi bifuza guhugurwa muri Tewolojia”.

Yakomeje avuga ko bahisemo kuganira n’abayobozi b’amatorera atandukanye kugira ngo babereke ko kwiga Tewolojiya bidahabanye n’ivugabutumwa, kuko n’intumwa ubwazo zatangiye kubwiriza nyuma y’imyaka itatu zigira kuri Yesu.

Ati “ N’ubwo nta kaminuza zariho ariko barize. Icya kabiri, abavuguruye Itorero icyo bashyizemo imbaraga ni ukwiga kugira ngo basobanure Bibiliya bazi icyo bavuga, kuko Bibiliya ni igitabo gikomeye ntabwo wajya kuyisobanura utarabyize neza.”

Bamwe mu bitabiriye iyi nama bahamya ko iki ari igisubizo kandi bashyigikiye ko abakozi b’Imana bagomba kwiga kugira ngo babashe gusubiza ibibazo by’abakirisitu bayobora bafite ubumenyi butandukanye bavanye muri kaminuza.

Musenyeri wa EAR Kibungo, Ntazinda Emmanuel yagize ati ” Tugomba kwiga kuko isi dukoreramo, abo dukorana n’abo bakeneye kuyoborwa n’ubabwira ibyo asobanukiwe kugirango ibyo bakora birusheho kugenda neza”.

Rev Pasteur Nyiraneza Albertine wa EPR Rubengera we yavuze ko kwiga bizatuma bigisha abantu ibyo nabo ubwabo basobanukiwe, kandi babasha gusesengura.

PIASS ni ishuri ry’abaporotesitanti rikorera mu karere ka Huye riri ku rwego rwa kaminuza, ryatangiye mu 1970 ryigisha abapasiteri mu matorero yarishinze.

Mu 1990 ryahindutse ishami rya Tewolojiya ku rwego rwa Kaminuza maze mu 2010 hongerwamo ishami ry’uburezi n’iry’Iterambere , kugeza ubu rimaze gusohora abashumba 394.

Umuyobozi Mukuru wa PIASS, Prof Rev. Pasteur Elisee Musemakweli avuga ko iyi Kaminuza ari igisubizo ku banyamadini bifuza kubona impamyabumenyi muri Tewolojiya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza