Peter Fabricius yahimbye ukuri ku kibazo cy’u Rwanda na Uganda mu buryo buciriritse

Yanditswe na Albert Rudatsimburwa
Kuya 2 Werurwe 2020 saa 10:19
Yasuwe :
0 0

Perezida Museveni akomeje kugendera ku buryo yishinja kubana n’abajenosideri ba FDLR, RUD Urunana na MRCD-FLN bayiyomoyeho, abakora iterabwoba ba RNC n’abo bakorana mu gutoteza inzirakarengane z’Abanyarwanda mu gucengeza amatwara ye mu bantu byoroshye guhindura.

Ku wa 27 Gashyantare, Peter Fabricius ukora muri Institute for Security Studies (ISS), bishoboka ko akorera Museveni, yanditse ko “Museveni yemeye kwirukana ku butaka bwa Uganda Abanyarwanda bakora iterabwoba”, ariko akaza kwibaza ati “Ariko se Perezida wa Uganda natabona uwo yirukana, bivuze ko umupaka w’u Rwanda na Uganda uzaguma ufunze?”

Gukorera Museveni bisa n’ibyahumye amaso abantu bamwe, ntibabashe guha umwanya itotezwa rikomeje gukorerwa Abanyarwanda b’inzirakarengane, bakareba ifungwa ry’umupaka gusa.

Fabricius asanga bitumvikana uburyo Perezida Kagame yavuganira isoko rusange rigamije gufungurira imipaka ubucuruzi muri Afurika, mu gihe umuyobozi w’u Rwanda aburira abaturage be kujya muri Uganda aho umutekano wabo utizewe.

Fabricius yirengagiza ko ubucuruzi bwambukiranya imipaka bukorwa n’abantu; ko hadashobora kubaho urujya n’uruza rw’ibicuruzwa na serivisi ku mipaka, mu gihe urujya n’uruza rw’abantu rubangamiwe.

Ubundi ahantu hose ubucuruzi busesuye ku Isi bushingira ku mibanire myiza y’abaturanyi. Igitangaje ni uko Uganda yanasinye amasezerano atandukanye yemera urujya n’uruza, ikomeje guhiga, gufata no gufungira ahatazwi, gukorera iyicarubozo Abanyarwanda, bamwe bakavanamo ubumuga, bakaburirwa irengero abandi bagapfa.

Niba Fabricius yarakoze ubushakashatsi, nk’uko urwego rwe rwakabaye rubivuga, yari kubona byoroshye ko guhiga Abanyarwanda no gutoteza inzirakarengane atari ibirego bipfa kubaho; ni ibimenyetso Uganda idahakana.

Kuva mu 2017 Abanyarwanda bakomeje gutabwa muri yombi ku maherere, bakorerwa iyicarubozo ndetse bagafungirwa ahantu hatazwi, ndetse bagahatirwa kujya mu mutwe wa Rwanda National Congress (RNC) n’indi mitwe y’iterabwoba yagize uruhare muri Jenoside yakorewe Abatutsi ubu bibumbiye muri FDLR n’indi mitwe byitandukanyije irimo RUD Urunana na MRCD-FLN. Uganda ikomeje gukoresha iyi mitwe yose mu guhungabanya umutekano w’u Rwanda.

Abemera kuyijyamo nk’uko Raporo y’Umuryango w’Abibumbye yasohotse mu Ukuboza 2018 ibigaragaza, boherezwa mu nkambi z’imyitozo muri RDC, ku bufasha bwa hafi bwa Guverinoma ya Uganda, intego ari ugukuraho ubuyobozi bw’u Rwanda.

Abanga kujyanwa muri iyo mitwe bo bagumishwa muri Uganda, bagakorerwa iyicarubozo ndetse bamwe bakicwa, mu gihe abandi bajugunywa ku mupaka w’u Rwanda, bazahaye bikomeye.

Tuzi neza ko Uganda itakibihakana kuko hari benshi yagiye yohereza mu Rwanda. Ubuhamya bwo mu nkiko kandi bw’abari abayobozi bwa FDLR - Col Jean-Pierre Nsekanabo uzwi nka Théophile Abega, wahoze ayoboye iperereza rya gisirikare na Ignace Nkaka alias La Forge Bazeye, wari umuvugizi wayo - bafatiwe ku mupaka wa Bunagana muri RDC bavuye mu nama mpuzabikorwa - na RNC - yabaye ku butumire bwa Museveni binyuze kuri Minisitiri Mateke, bwemeje ubufasha bw’icyo gihugu.

Gutekereza ko RNC ari “abanyamahoro” ni ukwibeshya, urebye uburyo “abo banyamahoro” batera grenade muri za gare no mu masoko bagamije kwica bantu benshi bashoboka. Hagati y’umwaka wa 2010 na 2014, “abanyamahoro” ba Kayumba Nyamwasa muri RNC bateye grenade mu bice bitandukanye by’u Rwanda bihuriramo abantu benshi, zica abantu 14 zikomeretsa abasaga 400.

Ibyo ni ayahe mahoro? Abo bantu bafatirwa ku gahato muri Uganda baba barimo gutozwa banashishikarizwa kujya mu myitozo y’imyigaragambyo y’amahoro na Uganda mu myitozo izabera mu Rwanda cyangwa muri RDC?

Umwanditsi noneho ashaka kuvuga ko inama ya kane yahuje ibihugu by’u Rwanda, Uganda ikanitabirwa n’abahuza nka Angola na RDC, yari igamije gufungura umupaka. Ariko akirengagiza ko ishyirwa mu bikorwa ry’amasezerano ya Luanda risaba Uganda kubanza gusenya ibikorwa bya RNC na RUD-Urunana muri Uganda; gufata no kohereza abanyamuryango bayo kugira ngo bagezwe imbere y’ubutabera mu Rwanda.

Rinasaba ko Guverinoma ya Museveni ihagarika ibikorwa byose bigamije guhungabanya umutekano w’u Rwanda no gukuraho ibintu byose bishobora gutuma bibaho. Fabricius asa n’utarabisomye. Akwiye kumva ikimwaro ndetse n’Ikigo Gishinzwe Amasomo mu by’Umutekano (ISS) gikwiye guhangayikishwa n’icyizere afitiwe.

Aho gusaba Uganda ngo yubahirize ibyo isabwa kugira ngo umupaka ufungurwe, ajya mu mikino ya Museveni yo kuvanga guhakana n’ibinyoma, nubwo yemera uruhare rwe mu bushotoranyi ku Rwanda bwakomeje kubera ku butaka bwa Uganda.

Umwanditsi asa n’utazi ko nubwo yemera uruhare rwe, Museveni abiherekeza n’ibisobanuro biyobya bigamije guhindura ibyo yemera. Ibyo ni ibintu abagize igihe cyo gukorana nawe bakomeje kubona ko bibangamye.

Uko kwivuguruza niko Fabricius yagakwiye gutindaho agaragariza abasomyi. Nyamara we yandika ko RNC muri Uganda ari “abanyamahoro”, na nyuma akaza kuvuga ko nta n’umwe uhari. Niba nta RNC iri muri Uganda, ni gute haza abo ba “banyamahoro bo muri RNC” umwanditsi avuga; barahari cyangwa ntibahari? Fabricius yaba ari umukozi wa Museveni, RNC cyangwa ISS?

Uganda yakomeje kuba igicumbi cya RNC. Yanamaze kuhagira intara, aho abayobozi bayo batoranywa n’umuyobozi wungirije w’Urwego rwa Gisirikare rushinzwe Iperereza (CMI) ushinzwe kurwanya iterabwoba, Col CK Asiimwe, nk’uko amakuru yizewe abihamya.

Umuhuzabikorwa wayo Pasiteri Deo Nyirigira, mu myaka myinshi – binyuze mu Itorero rye Agape rikorera i Mbarara – yakomeje kuba uw’imbere mu kwinjiza abarwanyi muri RNC ndetse itorero rye ryakomeje gukoreshwa nk’ahantu wo kwinjiriza abo barwanyi boherezwa mu myitozo y’imitwe yitwaje intwaro.

Hejuru y’ibyo, komite iyobora Intara ya RNC ya Uganda ikorana bya hafi na Sulah Nuwamanya na Prossy Bonabaana, batangije icyiswe Self-Worth Initiative (SWI), ingirwamuryango utegamiye kuri leta wigira nk’aho ufasha abakene, ariko mu kuri ni umutaka utwikiriye ibikorwa bya RNC.

Hari kandi mubyara wa Perezida Museveni, Dr Sam Ruvuma, wari ku mupaka wa Kikagati ubwo abarwanyibari bajyanwe muri RNC bafatwaga bagiye mu myitozo mu Minembwe muri RDC, banyuze i Bujumbura, mu Ukuboza 2017. Yaje gutabwa muri yombi ahita arekurwa kubera “amabwiriza aturutse hejuru.”

Mu kiganiro n’abanyamakuru cyakurikiye inama hagati ya Perezida Museveni na Perezida Kagame i Entebbe muri Werurwe 2018, yaje kwemera ko CMI yafashije abo bari bajyanwe muri RNC.

Museveni yabwiye abanyamakuru ati “Itsinda ry’Abanyarwanda ryari rijyanwe muri Congo rinyuze muri Tanzania no mu Burundi. Bavuze ko bagiye mu mirimo y’itorero, ariko ubwo bahatwaga ibibazo byaje kugaragara ko ibyari bibajyanye ntaho bihuriye n’itorero. Byari ikindi kintu.”

Fabricius nta na kimwe yitayeho. Ashishikajwe n’umupaka gusa. Amakuru namuha ni uko imyanzuro y’inama yabereye ku mupaka wa Gatuna/Katuna, yagaragaje neza ko imibanire myiza itazagaruka kugeza igihe Uganda izagenzurira ibirego by’u Rwanda ku bikorwa bibera ku butaka bwayo bigamije guhungabanya Kigali.

Nanone Fabricius akomeza avuga ko inama yahuje abakuru b’ibihugu bane n’urugendo rwose rurimo gukorwa, bisa n’umugambi wa Kagame wo kwikiza abanzi bose mu bijyanye na politiki, mu buryo bwose bushoboka.

Nubwo ashobora guhitamo igitekerezo yashyigikira, icyo byatwara cyose ku cyizere ISS ifitiwe nk’ikigo gikomeye gusa ibyo ntibizahagarika Guverinoma y’u Rwanda mu gufata ingamba zose mu kurengera abaturage bayo n’imipaka.

Ituze ry’Abanyarwanda n’umutekano n’ubusugire bw’igihugu ni ntayegayezwa. Ntabwo ari ibitekerezo by’umukozi wa ISS ukwirakwiza imvugo zisanzwe za Museveni uzahindura uko kwiyemeza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .