Macron ubwo yageraga mu Rwanda, yakiriwe na Minisitiri w’Ububanyi n’Amahanga w’u Rwanda, Dr Vincent Biruta, akomereza muri Village Urugwiro abonana Perezida Kagame ahita ajya ku Rwibutso rwa Jenoside rwa Kigali ruherereye ku Gisozi.

Akigera ku Gisozi yakiriwe na Minisitiri w’Ubutabera, Johnston Busingye; Minisitiri w’Ububanyi n’Amahanga, Dr Vincent Biruta ndetse yari aherekejwe na Minisitiri w’Ububanyi n’Amahanga w’u Bufaransa, Jean-Yves Le Drian.

Mbere yo gushyira indabo ku mva yabanje gutambagizwa Urwibutso n’Umuyobozi w’Urwibutso rwa Jenoside rwa Kigali, Gatera Honoré, yerekwa ibice birugize, anasobanurirwa amateka yagejeje u Rwanda kuri Jenoside yakorewe Abatutsi.

Amaze gusura urwibutso, yanditse ubutumwa mu gitabo cy’abashyitsi ku rwibutso rwa Jenoside rwa Kigali.

Ati “Nzahora nibuka aya mazina, aya masura n’abo Jenoside yakorewe Abatutsi yambuye ahazaza. Igihe kirageze ngo twemeranywe ku mateka yacu, twemere ibyabaye twunamire abazize Jenoside kandi twumve akababaro k’abarokotse. Ni ishema ry’u Bufaransa kudaca ku ruhande aya mateka. Igihe kirageze ngo twubake ahazaza h’abana bacu.”

Perezida Macron yabaye uwa kabiri wayoboye u Bufaransa usuye urwo rwibutso nyuma ya Nicolas Sarkozy warusuye muri Gashyantare 2010. Icyo gihe yasabye imbabazi kubera ‘amakosa’ n’ubuhumyi’ bw’u Bufaransa muri Jenoside yakorewe Abatutsi mu 1994. Icyo gihe u Bufaransa nk’igihugu ntibwemeraga ko hari uruhare bwagize muri Jenoside.

Perezida w'u Bufaransa, Emmanuel Macron, ubwo yageraga ku Rwibutso rwa Kigali ku Gisozi

Ubwo Perezida Macron yasobanurirwaga mbere yo gutambagizwa ibice bigize urwibutso rwa Gisozi

Aha Perezida Macron yasobanurirwaga amateka y'itegurwa n'ishyirwa mu bikorwa rya Jenoside yakorewe Abatutsi

Umuyobozi w’Urwibutso rwa Jenoside rwa Kigali, Gatera Honoré niwe watambagije Perezida Macron ibice bigize urwibutso rwa Jenoside rwa Kigali

Macron yandika mu gitabo cy'abashyitsi ku rwibutso rwa Kigali

Perezida Macron yavuze ko abari bayoboye u Bufaransa ubwo Jenoside yategurwaga, birengagije ibimenyetso byose byababuriraga ko mu Rwanda hari gutegurwa Jenoside

Perezida Macron yavuze ko igihugu cye cyagize uruhare muri Jenoside yakorewe Abatutsi yahitanye ubuzima bw'inzirakarengane zisaga miliyoni

Perezida Macron yavuze ko igihugu cye gifite uruhare muri Jenoside yakorewe Abatutsi

Amafoto ya IGIHE: Niyonzima Moïse