00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yashyikirijwe ubutumwa bwa Colonel Doumbouya wa Guinea

Yanditswe na Iradukunda Serge
Kuya 26 Ukwakira 2022 saa 09:15
Yasuwe :

Perezida Paul Kagame yakiriye mu biro bye, Minisitiri w’Ikoranabuhanga wa Guinea, Ousmane Gaoual Diallo woherejwe nk’intumwa yihariye ya Perezida w’iki gihugu w’inzibacyuho, Colonel Mamadi Doumbouya.

Amakuru dukesha Village Urugwiro avuga ko kuri uyu wa Gatatu tariki 26 Ukwakira aribwo Perezida Kagame yakiriye Minisitiri Ousmane Gaoual Diallo wamushyikirije ubutumwa bwa Perezida Doumbouya, gusa ntihatangajwe ibyari bikubiyemo.

Ibiganiro Perezida Kagame yagiranye na Minisitiri Gaoual Diallo n’itsinda bari kumwe byanitabiriwe na Minisitiri w’Ububanyi n’Amahanga w’u Rwanda, Dr Vincent Biruta.

Mbere y’ihirikwa rya Alpha Conde wayoboraga Guinea iki gihugu ni kimwe mu byari bibanye neza n’u Rwanda. Ibi byatumye mu 2016 Perezida Kagame ahabwa umudali w’ishimwe kubera ko yateje imbere umubano ushingiye ku butwererane n’ubucuti hagati y’ibihugu byombi.

Muri Nzeri 2022 nibwo Colonel Doumbouya yahiritse ubutegetsi bwa Alpha Conde.

Nubwo nta kimenyetso cy’umubano udasanzwe cyari cyagaragara hagati y’u Rwanda na Guinea kuva Col Doumbouya yajya ku butegetsi, muri Mata 2022 uyu mugabo yakiriye impapuro zemerera Zaina Nyiramatama guhagararira u Rwanda mu gihugu cye.

Col. Mamadi Doumbouya yahaye ikaze Ambasaderi Nyiramatama, ashima umubano mwiza usanzwe hagati y’u Rwanda na Guinée.

Yagaragaje ko igihugu cye cyiteguye gukorana n’u Rwanda rufatwa nk’icyitegererezo mu iterambere kubera imiyoborere ya Perezida Paul Kagame.

Doumbouya yahoze mu ishami ry’ingabo z’u Bufaransa rikunze kujyamo abanyamahanga, rizwi nka legionnaire. Yakuwe muri izi ngabo mu 2018 ubwo muri Guinée hashyirwagaho umutwe w’ingabo zidasanzwe, ahita ahabwa no kuwuyobora.

Perezida Kagame yashyikirijwe ubutumwa bwa Colonel Doumbouya wa Guinea

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .