00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yasabye impinduka mu miterere y’ubukungu bwa Commonwealth

Yanditswe na Philbert Girinema
Kuya 21 June 2022 saa 01:26
Yasuwe :

Perezida Paul Kagame yasabye ibihugu bigize Commonwealth guharanira ko iterambere rigera kuri bose, aho kuba bimwe byakomeza gutera imbere mu bukungu, ibindi bigasigara inyuma.

Ni ubutumwa yatanze mu nama y’Ihuriro ry’ibihugu bigize Commonwealth rigamije ubucuruzi, Commonwealth Business Forum, iteraniye i Kigali.

Perezida Kagame ni we wari umushyitsi mukuru muri iyi nama. Yitabiriwe kandi Minisitiri w’Intebe wa Bahamas, Philip Davis; Umunyamabanga Mukuru wa Commonwealth, Patricia Scotland n’Umuyobozi w’Akanama ka Commonwealth gashinzwe Inganda n’Ishoramari, Jonathan Marland.

Umuyobozi Mukuru w’Urwego rushinzwe kwihutisha Iterambere (RDB), Clare Akamanzi, yavuze ko mu minsi itatu iri imbere, abafite aho bahuriye n’ishoramari bazagirana ibiganiro bigamije kwiga ku hazaza h’umurimo, kuzahura ubukungu bwashegeshwe na Covid-19 n’ibindi.

Yavuze ko bazigira hamwe uko bakwifashisha ikoranabuhanga mu guhanga udushya bakemura ibibazo byibasiye Commonwealth n’Isi muri rusange.

Ati "Twategereje igihe kinini kubakira, ubu kigeze ku iherezo. Twishimiye ko muri hano imbonankubone, bigaragaza imbaraga n’uruhurirane rw’imico bya Commonwealth."

Umuryango wa Commonwealth ufite abaturage barenga miliyari 1,2. Akamanzi yavuze ko ari inshingano z’abayobozi bitabiriye iyi nama guharanira ko abaturage b’uyu muryango babona imirimo.

Umuyobozi w’Akanama ka Commonwealth gashinzwe Inganda n’Ishoramari, Jonathan Marland, yashimiye u Rwanda ku bw’umuhate waruranze mu gutegura iyi nama ikaba ibaye ntamakemwa.

Umunyamabanga Mukuru wa Commonwealth, Patricia Scotland, yavuze ko uyu muryango ufite amahirwe menshi cyane. Yagaragaje ko ishoramari rikorwa hagati y’ibihugu ryiyongereye ku kigero cya 27%, bingana n’ubwikube gatatu uhereye mu 2015.

Ni mu gihe umusaruro mbumbe w’ibihugu bigize uyu muryango ungana na miliyari ibihumbi 13,1$ ndetse byitezwe ko mu myaka itanu iri imbere uzazamuka ukagera kuri miliyari ibihumbi 19,5$ mu 2027.

Dr. Akinwumi Adesina uyobora Banki Nyafurika Itsura Amajyambere, yavuze ko icyerekezo kizima, kijyana n’imiyoborere myiza. Yatanze urugero rw’uburyo iyo buri gihe ageze mu Rwanda, ahasanga impinduka kandi zigaragarira amaso.

Yavuze ko ubukungu bw’ibihugu byo muri Commonwealth usanga bwihariwe n’ibihugu bitanu, ashimangira ko niba abantu bumva ko iterambere ry’ahazaza rigirwamo uruhare na buri wese, ubukungu bukwiriye kuba busangiwe.

Ati "Nk’uko Umunyamabanga Mukuru yabivuze, ingano y’ubukungu bw’ibihugu bya Commonwealth ni miliyari ibihumbi 13$, ariko burihariwe. Ibihugu bitanu nibyo bigenzura ubukungu. Ni u Bwongereza, Australia, Canada, u Buhinde na Nigeria. Bukwiriye gusaranganywa."

Perezida Kagame yagarutse ku ngingo y’uko Commonwealth ikwiriye kuba umuryango uhuriza hamwe ibihugu 54 biwubarizwamo mu buryo bungana, ku buryo byose bizamuka mu bukungu.

Ati "Commonwealth dufite ibintu byinshi duhuriyeho yaba ururimi, uburyo duhuriyeho budufasha gukora ishoramari. Hari intangiriro, ariko dukeneye kubinoza kurushaho, ku buryo niba tuvuze Commonwealth koko igisobanuro kiba kimwe, ntibibe bimwe kuri bamwe, ahubwo bibe bimwe ku bihugu 54."

Yavuze ko hakwiriye gushyirwamo imbaraga ku buryo nta munyamuryango usigara inyuma, yaba ibihugu bifite ubukungu buri hasi, ntihagire icyumva ko cyatereranwe.

Ati "Tuzamure buri wese [...] yaba mu bucurizi, ishoramari n’ibindi bibazo twavugaga. Dufite ubuzima, dufite ibibazo by’iki cyorezo, inkingo… umuvuduko ibintu bigendaho ukwiriye kwiyongera."

Perezida Kagame yavuze ko hari icyizere kandi gishingiye ku kuba abitabiriye iyi nama bumva neza ikigomba gukorwa, kugira ngo ibivugwa bidakomeza kuba nk’intero.

Yavuze ko mu gufasha urubyiruko, rukwiriye kugira uruhare mu byemezo bifatwa, kandi ko uko bikorwa ari byo bitanga umusaruro uboneye.

Ati "Dukwiriye gutekereza ibyo dukorana na bo ahubwo gutekereza ibyo tubakorera."

Iyi nama yahurije hamwe abayobozi muri Guverinoma, abayobozi b’ibigo bitandukanye, ab’inzego z’ubucuruzi zitandukanye baturutse mu bihugu bigize Commonwealth n’abandi.

Abantu bagera ku 1500 nibo bitabiriye iyi nama baturutse mu bihugu bibarizwa muri Commonwealth.

Ibigo bitandukanye bikora ishoramari byitabiriye iyi nama, bimurika ibikorwa byabyo. Ni ibikorwa bigamije gukemura ibibazo Isi ifite muri iki gihe, mu ngeri zitandukanye yaba mu ikoranabuhanga, kwihaza mu biribwa n’ibindi.

Abantu bakora mu nzego zitandukanye z'ubucuruzi n'ishoramari bari bitabiriye iyi nama
Ni inama yahurije hamwe abantu barenga 1500 baturutse mu bihugu bigize Commonwealth
Umuyobozi Mukuru wa Equity Bank, James Mwangi, afata ifoto y'urwibutso hamwe n'umwe mu bitabiriye iyi nama
Rica Rwigamba ukuriye Mastercard Foundation mu Rwanda aganira n'umwe mu bari bitabiriye iyi nama
Umuyobozi wa MTN Rwanda, Mitwa Ng'ambi (iburyo) aganira n'umwe mu bitabiriye iyi nama
Umuyobozi Mukuru wa RSSB, Regis Rugemanshuro, aganira n'umwe mu bitabiriye iyi nama
Perezida Kagame aganira n'Umuyobozi w’Ikigega cya Banki y’Isi gitera inkunga imishinga y’abikorera, IFC, Makhtar Diop
Perezida Kagame yavuze ko urubyiruko rukwiriye kugira uruhare mu birukorerwa
Umuyobozi Mukuru wa RDB, Clare Akamanzi, yahaye ikaze abitabiriye iyi nama, abasaba kubyaza umusaruro amahirwe y'ishoramari ari mu Rwanda
Umunyamabanga Mukuru wa Commonwealth, Patricia Scotland, yagaragaje ko hari intambwe ikomeje guterwa mu kongera ubukungu bw'uyu muryango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .