Perezida Kagame yakiriye itsinda ry’Abayapani bifuza gushora imari mu Rwanda

Yanditswe na Mugabo Jean d’Amour
Kuya 25 Nyakanga 2018 saa 05:00
Yasuwe :
1 0

Perezida Paul Kagame yakiriye itsinda ry’abantu 57 baturutse mu Buyapani, barimo 43 bahagarariye ibigo bikomeye 28 by’abikorera muri icyo gihugu, bibarizwa mu nzego zinyuranye z’ishoramari.

Mu biganiro bagiranye kuri uyu wa Gatatu mu biro bye, Perezida Kagame yasobanuriye aba bashoramari b’Abayapani ko u Rwanda rwiyemeje kongera uruhare rw’abikorera mu iterambere ry’igihugu, kandi ko ikoranabuhanga ry’u Buyapani ari ingenzi cyane mu kugera kuri iyi ntego.

Yagize ati “Dusanzwe dufitanye umubano mwiza hagati y’u Buyapani n’u Rwanda. Ubu turi gukora ibishoboka kugira ngo tuzamure uruhare urwego rw’abikorera rugira mu gushyigikira intego z’abayobozi n’abaturage bacu kugira ngo tubashe kugera ku ntego z’iterambere.”

Perezida Kagame yashimangiye ko u Rwanda rwifuza kubyaza umusaruro ikoranabuhanga u Buyapani bufite aho bishoboka, kuko ari kimwe mu bihugu bikomeye kuri Isi muri uru rwego.

Minisitiri wungirije w’u Buyapani ushinzwe ububanyi n’amahanga akaba anayoboye iri tsinda, Manabu Horii yabwiye itangazamakuru ko bishimiye ibiganiro bagiranye na Perezida Kagame kandi ko abashoramari b’Abayapani babonye amahirwe menshi y’ishoramari mu Rwanda.

Yagize ati “Twabanje gukora inyigo itegura uru rugendo dusanga u Rwanda rubereye ishoramari ry’ibigo byo mu Buyapani. Turacyiga amahirwe y’ishoramari mu Rwanda kandi ibigo byacu byamaze kuhabona amahirwe atandukanye.”

Umuyobozi w’Ikigo cy’Iterambere (RDB), Clare Akamanzi yavuze ko u Buyapani kimwe n’ibindi bihugu biteye imbere, bwari busanzwe bubona Afurika nk’isoko ry’ibyo bukora ariko ubu iki gihugu kiri ku mwanya wa gatatu mu bikize ku isi gishyize imbere gushora imari muri Afurika.

Ibyo bikajyana n’uburyo ibigo by’u Buyapani bikomeje gufungura inganda no gufatanya n’ibigo bisanzwe muri Afurika no mu Rwanda by’umwihariko.

Yagize ati “U Rwanda nk’igihugu gifite ubukungu bukura vuba kandi rukaba ruyoboye Umuryango w’Afurika Yunze Ubumwe, mu biganiro bagiranye na Perezida, aba bashormari bamubajije ibibazo bigamije kumenya uburyo bashora imari muri Afurika no mu Rwanda by’umwihariko. Bagaragaje ubushake bwo gushora imari mu ikoranabuhanga cyane no mu bindi birimo gutangiza inganda, guteza imbere imijyi no gutunganya imyanda.”

Akamanzi yavuze ko abashoramari b’Abayapani biyongera mu Rwanda ku buryo bwihuse kuko ibigo bikomoka mu Buyapani byavuye kuri bitatu mu myaka itanu ishize ubu bikaba ari 20 harimo n’ikigo DMM Group giherutse kwinjira mu bufatanye n’ikigo cy’Abanyarwanda ‘AC Group’ gikora ikarita za ‘Tap&Go’ zikoreshwa mu kwishyura amafaranga ku modoka zitwara abagenzi.

Ibi bihugu kandi bifitanye ubufatanye nk’aho ku wa 9 Gicurasi uyu mwaka, u Rwanda rwagiranye amasezerano n’ibigo byo mu Buyapani, atuma impande zombi zinjira mu bikorwa nyirizina byo gutunganya icyogajuru, nka kimwe mu bikorwa u Rwanda ruhanze amaso mu rugendo rw’ikoranabuhanga.

Ku wa Kabiri iri tsinda ry’Abayapani ryanagiranye ibiganiro n’abantu batandatu bagize guverinoma babasobanurira amahirwe ari mu gushora imari mu Rwanda, maze bagaragaza ko biteguye kuhashira ibikorwa byabo.

Biteganyijwe ko kuri uyu wa Gatatu aba bashyitsi bagirana ibiganiro n’abandi bayobozi muri Guverinoma, abanyenganda basanzwe bakorera mu Rwanda n’ Urugaga rw’Abikorera (PSF).

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza