00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yakiriye indahiro z’abaminisitiri babiri bashya: Uko umuhango wagenze (Amafoto na Video)

Yanditswe na Philbert Girinema
Kuya 2 August 2022 saa 03:10
Yasuwe :

Perezida Kagame yakiriye indahiro z’abayobozi babiri bashya muri Guverinoma; Minisitiri ushinzwe Ishoramari rya Leta, Eric Rwigamba n’Umunyamabanga wa Leta muri Minisiteri y’Ubuhinzi n’Ubworozi, Ildephonse Musafiri.

Bombi bashyizwe mu myanya n’Umukuru w’Igihugu ku wa Gatandatu, tariki ya 30 Nyakanga 2022. Ntabwo bari basanzwe muri Guverinoma.

Irahira ryabo ryabereye mu Ngoro y’Inteko Ishinga Amategeko ku Kimihurura, ryitabirwa n’abayobozi mu ngeri zinyuranye ndetse n’abahagarariye ibihugu byabo mu Rwanda.

Minisiteri y’Ishoramari rya Leta yahawe Eric Rwigamba ni nshya muri Guverinoma. Ishinzwe ikurikira iy’Ubumwe bw’Abanyarwanda yashinzwe muri Nyakanga 2021. Ubu u Rwanda rufite minisiteri 22.

Musafiri we yinjiye muri Guverinoma asimbuye Dr. Jean Chrysostome Ngabitsinze wagizwe Minisitiri w’Ubucuruzi n’Inganda.

Umuhango nk’uyu waherukaga muri Gashyantare uyu mwaka, ubwo Perezida Kagame yakiraga indahiro za Minisitiri w’Ibikorwaremezo, Dr Nsabimana Ernest n’Umunyamabanga wa Leta muri Minisiteri y’Ibikorwa remezo, Uwase Patricie.

Perezida Kagame yijeje ubufasha abayobozi bashya, avuga ko bari basanzwe mu mirimo mu zindi nzego za leta, bityo ko bagomba gukomeza gukorera igihugu nk’ibisanzwe.

Mu nshingano z’ibanze za Minisiteri y’Ishoramari, Perezida Kagame yavuze ko harimo kwegurira abikorera ibigo bikora ubucuruzi bya leta, kandi ko bigomba gukorwa mu gihe cya vuba.

Ni mu gihe kandi yasabye ko haba impinduka mu rwego rw’ubuhinzi n’ubworozi ku buryo u Rwanda rubasha guhangana n’ibibazo bibaho mu buryo bwa hato na hato ku Isi.

UKO UYU MUHANGO WAGENZE

14:00: Umuhango wo kwakira indahiro urahumuje

 Yasabye abayobozi gukorera hamwe, bagaharanira inyungu z’igihugu muri rusange.

Ati “ Inzego n’abayobozi twese tugomba gukorana, kuzuzanya, hanyuma ibikorwa nyine bidatubuka kandi tukibuka iteka ko dukorera abanyarwanda.”

 Perezida Kagame yavuze ko icyifuzo ari uko hakoreshwa neza amahirwe aboneka mu buhahirane n’ibindi bihugu bya Afurika binyuze mu isoko rusange rya Afurika.

Ati “Mu bijyanye n’ubucuruzi n’ibiribwa n’ibindi. Kugera kuri izi ntego bisaba buri wese, twese, ko habaho gukora ibyo dushinzwe kuri buri umwe ariko noneho na twese hamwe tukabikora mu buryo bwihuse bushoboka, tukanabikorana ubudakemwa. Ni bwo bigira inyungu zisumbuyeho.”

15:50: Umukuru w’Igihugu yasabye impinduka mu rwego rw’ubuhinzi

Perezida Kagame yasabye ko haba impinduka mu rwego rw’ubuhinzi n’ubworozi ku buryo igihugu kibasha kwihaza mu biribwa kikanahirana n’ibindi.

Yavuze ko ibyo bikwiriye kuba byumvikana kuri buri wese ku buryo abantu batajya babyibutswa n’uko habayeho ibibazo runaka.

 Perezida Kagame yavuze ku nshingano za Minisiteri nshya y’ishoramari

Ati “Icya mbere, Minisiteri nshya y’ishoramari rya leta, izareba uko ibigo bya leta bicunga neza ndetse amaherezo cyangwa se byihuse kuri bimwe, bikegurirwa abikorera. Hari ibigomba kwegurirwa abikorera vuba na bwangu.”

“Leta, guverinoma cyangwa inzego za leta, ubundi ntabwo akazi kacu ari ukujya mu bucuruzi n’ibintu bisa nk’ibyo ahubwo dufasha abikorera gucuruza kugira ngo bagere kuri byinshi. Ibyo ndwibwira ko byumvika.”


 "Akazi ni ugukorera igihugu cyacu”

Yavuze ko abayobozi bashya basanzwe ari abakozi, bakorera leta, bakorera igihugu.

Ati “Ndibwira ko hahindutse inshingano kuko imirimo ni ya yindi. Gukorera igihugu cyacu”

Ubucuruzi, ishoramari, ubuhinzi n’ubworozi ni inkingi z’ingenzi mu majyambere y’igihugu cyacu. Uko dukomeza kurwanya no guhashya icyorezo cya Covid-19, tuzahura ubukungu bw’igihugu cyacu ni nako bizakomeza ibyo navuze, kurushaho kuba ingenzi kugira ngo dukomeze ibyo tumaze kugeraho twongeraho n’ibindi byinshi.

15:45: Minisitiri Eric Rwigamba n’Umunyamabanga wa Leta muri Minisiteri y’Ubuhinzi n’Ubworozi, bamaze kurahira. Bashyize umukono kandi ku ndahiro zabo.

Perezida Kagame agiye kugeza ijambo ku bitabiriye uyu muhango.

15:40: Perezida Kagame amaze kugera mu cyumba cy’Inteko Ishinga Amategeko ku Kimihurura. Umuhango w’irahira uratangiye nyuma yo kuririmba indirimbo yubahiriza igihugu.

Mu yandi makuru

Mbere y’uyu muhango w’irahira, Perezida Kagame yakiriye muri Village Urugwiro, Umunyabanga Mukuru wa COMESA, Chileshe Kapwepwe.

COMESA ni Umuryango w’Isoko Rusange ry’Ibihugu bya Afurika y’Iburasirazuba n’Amajyepfo (COMESA).

Ugizwe n’ibihugu 19 watangiye mu 1994 ariko u Rwanda rwinjiyemo mu 2004.

Ibyo bihugu ni u Burundi, Ibirwa bya Comores, Repubulika Iharanira Demokarasi ya Congo, Djibouti, Misiri, Eritrea, Ethiopia, Kenya, Libya, Madagascar, Malawi, Ibirwa bya Maurice, Ibirwa bya Seychelles, Sudani, eSwatani, Uganda, Zambia, Zimbabwe n’u Rwanda.

 Ibyo wamenya ku bigenerwa Abaminisitiri

Abaminisitiri n’abandi bagize Guverinoma bashobora gushyirwaho na Perezida wa Repubulika bagenerwa buri wese umushahara mbumbe w’umurimo buri kwezi ungana 2.534.861 Frw.

Abanyamabanga ba Leta bagenerwa buri wese umushahara mbumbe w’umurimo buri kwezi ungana na 2.434.613 Frw.

Abaminisitiri n’abandi bagize Guverinoma bashobora gushyirwaho na Perezida wa Repubulika n’Abanyamabanga ba Leta, bagenerwa kandi amafaranga y’icumbi angana na 500 000 Frw buri kwezi, ayo kwakira abashyitsi 300 000 Frw, itumanaho ryo mu biro 100 000 Frw.

Banagenerwa kandi internet ngendanwa ya 40 000 Frw buri kwezi, itumanaho rya telefoni ngendanwa 150 000 Frw n’amafaranga yo kugura ibikoresho byo mu nzu angana na 5 000 000 atangwa rimwe.

Mbere banahabwaga uburinzi ariko ubu ntibakibuhabwa.

Eric Rwigamba winjiye muri Guverinoma, asanzwe afite ubunararibonye mu ishyirwa mu bikorwa rya gahunda zifitanye isano n’urwego rw’imari n'igenamigambi ry’imishinga

 Abayobozi mu nzego nkuru z’igihugu bitabiriye uyu muhango uhereye ku bagize Guverinoma, abayobozi b’ingabo, abagize Inteko Ishinga Amategeko, abayobozi b’ibigo bya leta n’abandi.

Dr. Jean Chrysostome Ngabitsinze yazamutse mu ntera, ava ku kuba Umunyamabanga wa Leta, agirwa Minisitiri
Umunyamabanga Mukuru wa RIB, Rtd Col Jeannot Ruhunga, ni umwe mu bayobozi bitabiriye irahira ry'abagize Guverinoma bashya
Umujyanama wa Perezida mu by'Umutekano, Gen James Kabarebe aganira n'Umugaba Mukuru w'Ingabo, Gen Jean Bosco Kazura
Minisitiri w'Ubuzima, Dr Ngamije Daniel, yitabiriye umuhango w'irahira rya bagenzi be bashya muri Guverinoma
Minisitiri w'Uburezi, Dr Uwamaliya Valentine, ari mu bitabiriye uyu muhango

15:15: Mu minota itarambiranye, Perezida Kagame araba ageze mu cyumba cy’Inteko Ishinga Amategeko ahagiye kubera uyu muhango. Nyuma yo kwakira indahiro, araza kugeza ubutumwa ku bitabiriye uyu muhango n’Abanyarwanda muri rusange

 Eric Rwigamba afite ubunararibonye mu ishyirwa mu bikorwa rya gahunda zifitanye isano n’urwego rw’imari, igenamigambi ry’imishinga n’ibindi.

Minisiteri yahawe ishinzwe ishoramari rya leta rigamije inyungu. Mu nshingano z’ayo harimo kwerekana aho leta yashora imari, gukurikirana uko imigabane leta yashoye mu bigo by’ubucuruzi ibyara inyungu no kugaragaza ishoramari rya leta rikwiye kwegurirwa abikorera.

Eric Rwigamba aheruka kugirwa Minisitiri w'ishoramari rya Leta

Rwigamba yabaye Umuyobozi Mukuru ushinzwe Urwego rw’Imari muri Minisiteri y’Imari n’Igenamigambi, Minecofin. Yanabaye Umuyobozi w’Agateganyo ushinzwe ibijyanye na tekinike muri Access to Finance Rwanda. Ni inshingano yari afite mu 2012.

Mbere yaho hagati ya 2008 na 2011 yabaye Umuyobozi Mukuru wa GroFiN Rwanda. Hagati ya 2001 na 2005 yabaye Umuyobozi ushinzwe Ubugenzuzi muri Ecobank Rwanda. Yanakoze muri Ernest & Young Uganda ashinzwe ubugenzuzi.

Rwigamba afite Impamyabumenyi ya Masters yakuye muri Kaminuza ya Gikirisitu ya Oklahoma (Oklahoma Christian University) mu bijyanye n’imari.

 Dr Ildephonse Musafiri yari asanzwe umuyobozi w’akanama gashinzwe ingamba na politiki za leta mu biro bya Perezida. Ni umwarimu muri Kaminuza y’u Rwanda, Ishami ry’ubukungu n’ubucuruzi, aho yigishije anaba umuyobozi w’agashami k’ubukungu.

Ubushakashatsi akora bwibanda ku iterambere ry’ubukungu na politiki za leta by’umwihariko ubusesenguzi kuri politiki zo kurandura ubukene n’ubusumbane, iterambere ry’ubuhinzi n’ibiribwa.

Dr Musafiri afite impamyabumenyi y’ikirenga mu bukungu bushingiye ku buhinzi yakuye muri Kaminuza ya Bonn mu Budage

Dr Musafiri afite impamyabumenyi y’ikirenga mu bukungu bushingiye ku buhinzi yakuye muri Kaminuza ya Bonn mu Budage. Icyiciro cya gatatu cya Kaminuza yacyize muri Kaminuza y’u Rwanda. Ni umwe mu bagize inama y’ubutegetsi ya Banki Nkuru y’u Rwanda.

Yasimbuye Dr. Jean Chrysostome Ngabitsinze wagizwe Minisitiri w’Ubucuruzi n’Inganda.

Komiseri Mukuru wa RCS, Juvenal Marizamunda, aganira n'Umukuru w'Urwego rw'Imiyoborere, Usta Kaitesi
Abahagarariye ibihugu byabo n'imiryango mpuzamahanga mu Rwanda bitabiriye uyu muhango
Uyu muhango witabiriwe na bamwe mu bagize Inteko ishinga amategeko
Senateri Nkusi Juvenal ni umwe mu bitabiriye uyu muhango
Komiseri Mukuru wa RCS, Juvenal Marizamunda, aganira n'Umunyamabanga Mukuru wa FPR Inkotanyi, François Ngarambe
Senateri Murangwa Ndangiza Hadidja aganira na Minisitiri w'Ubumwe bw'Abanyarwanda n'Inshingano mboneragihugu, Dr Bizimana Jean Damascene
Uyu muhango witabiriwe n'abagize Guverinoma
Ambasaderi w'u Buyapani mu Rwanda, Masahiro Imai, ni umwe mu bitabiriye uyu muhango

Urahira avuga izina rye, agakomeza agira ati Ndahiriye u Rwanda ku mugaragaro: ko ntazahemukira Repubulika y‟u Rwanda ; ko nzubahiriza Itegeko Nshinga n’andi mategeko; ko nzaharanira uburenganzira bwa muntu n`ibyagirira Abanyarwanda bose akamaro; ko nzaharanira ubumwe bw‟Abanyarwanda; ko nzakorana umurava imirimo nshinzwe; ko ntazakoresha ububasha mpawe mu nyungu zanjye bwite. Nintatira iyi ndahiro, nzabihanirwe n‟amategeko. Imana ibimfashemo.”

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .