Bahuye nyuma yo kwitabira inama ya 37 y’Umuryango wa Afurika Yunze Ubumwe (AU) yabereye ku cyicaro cyawo i Addis Abeba muri Ethiopie.

Ibiro bya Perezida w’u Rwanda, Village Urugwiro, byemeje aya makuru, bigira biti “Perezida Kagame yahuye na Minisitiri w’Intebe Abiy Ahmed wa Ethiopie, Perezida João Lourenço wa Angola na Perezida Hakainde Hichilema wa Zambia aho yitabiriye inama ya 37 ya AU.”

Perezida Kagame yageze muri Ethiopie kuri uyu wa 16 Gashyantare, abanza kwitabira inama yamuhuje n’abandi bakuru b’ibihugu byo mu Karere ka Afurika y’Iburasirazuba, baganira ku mirwano iri kubera muri Repubulika Iharanira Demokarasi ya Congo.

Mu gitondo cyo kuri uyu wa 17 Gashyantare, Perezida Kagame n’abandi bakuru b’ibihugu bitabiriye umuhango wo gutangiza inama ya 37 ya AU, yabereyemo ibikorwa birimo guhererekanya ububasha hagati y’Umuyobozi Mukuru w’uyu muryango ucyuye igihe n’uwamusimbuye.

Perezida Kagame yashyikirije kandi mugenzi we wa Kenya, Dr William Samoei Ruto inshingano yari afite kuva mu 2016 zo kuyobora amavugurura muri AU.

Perezida Kagame yahuye na Hichilema uyobora Zambia

Perezida Kagame yahuye na mugenzi we uyobora Angola

Perezida Kagame na Minisitiri w'Intebe wa Ethiopie, Abiy Ahmed

Mu gitondo Perezida Kagame yitabiriye inama ya 37 ya AU