Perezida Kagame yagenewe igihembo cy’umuyobozi ushyigikira gahunda zo kugeza ubuvuzi kuri bose

Yanditswe na Evariste Nsengimana
Kuya 5 Werurwe 2019 saa 03:39
Yasuwe :
0 0

Perezida w’u Rwanda, Paul Kagame, yagenewe igihembo cy’umuyobozi w’igihugu wagize uruhare rukomeye mu gushyigikira gahunda n’ibikorwa bigamije kugeza ubuvuzi kuri bose muri Afurika (Universal Health Coverage Presidential Champion Award).

Minisitiri w’Ubuzima Dr. Diane Gashumba niwe washyikirijwe iki gihembo kuri uyu wa kabiri n’umuryango Nyafurika ugamije kugeza ubuvuzi burambye kuri bose ‘Amref Health Africa’.

Iki gihembo yagishyikirijwe mu muhango wo gufungura inama Nyafurika iteraniye i Kigali igamije gusuzuma uko gahunda zo kugeza ubuvuzi kuri bose zarushaho kunozwa.

Iyi nama ihurije hamwe abakora n’abayobora muri za minisiteri z’ubuzima, impuguke, abarimu, abashakashatsi, urubyiruko n’abandi bagera ku 1500 baturutse mu bihugu bisaga 47 byo muri Afurika n’ahandi.

Umuyobozi wa Amref Health Africa, Dr. Githinji Gitahi, yabwiye abanyamakuru ko mu bikorwa uwo muryango ugira harimo no gushimira abantu bagira uruhare rufatika muri gahunda zo kugeza ubuvuzi kuri bose.

Ati “Twashimiye Nyakubahwa Paul Kagame. Ni igihembo cy’umuntu wabaye indashyikirwa muri gahunda zo kugeza ubuvuzi kuri bose (UHC Presidential Champion). Ni mu rwego rwo kumushimira gahunda ze z’imiyoborere no kugira ibye, gahunda zo kugeza ubuvuzi kuri bose mu Rwanda.”

Minisitiri w’Ubuzima, Dr. Diane Gashumba, yashimiye Amref Health for Africa ku gaciro uhaye ibikorwa Perezida Kagame akorera abo ayobora, avuga ko bigiye kongerera imbaraga abakozi b’ibitaro, amavuriro, ibigo nderabuzima n’abandi zo gukora bivuye inyuma.

Dr. Gashumba yavuze ko u Rwanda hari byinshi rwakoze mu kugeza ubuvuzi kuri bose kandi ko bizakomeza.

Ati “Twaranduye imbasa, uyu munsi abana bacu barakingirwa kugera kuri 93%, abana b’abakobwa babona urukingo rwa kanseri y’inkondo y’umura, abagore 91% babyarira kwa muganga.”

Mu bindi byakozwe harimo gushyiraho, guhugura no kongerera ubushobozi abajyanama b’ubuzima kuri ubu bagera 58 286, batangira serivisi z’ubuvuzi ku rwego rw’umudugudu. Ubu babasha gusuzuma, kuvura no gutanga imiti ya malaria, kwita ku babyeyi batwite, gutanga inama kuri gahunda mbonezamikurire z’abana n’ibindi.

Hari kandi kuzamura umubare w’abanyarwanda bafite ubwishingizi bw’ubuzima, imwe muri gahunda ituma abarwayi batiganyira kujya kwivuza kuko bitabasaba amafaranga y’umurengera.

Aha Minisitiri Gashumba yavuze ko abanyarwanda bafite ubwishingizi bw’ubuzima barenga 9o%, barimo abakoresha ubwisungane mu kwivuza n’ubundi bwishingizi abakozi bahabwa n’ibigo bakorera.

Mu bindi Guverinoma y’u Rwanda yakoze mu kwegereza ubuvuzi abaturage harimo kongera umubare w’ibikorwa remezo birimo ibitaro, ibigo nderabuzima n’amavuriro yo ku rwego rw’Akagaro (Health Post) n’ibindi.

Umwaka wa 2016 warangiye mu Rwanda habarirwa amavuriro ya Leta n’ayigenga 1,311. Mu 2017, Guverinoma yiyemeje ko bitarenze 2024 buri Kagari kazaba gafite ivuriro, ndetse nk’Akarere ka Nyanza gasigaje amavuriro yo ku rwego rw’Akagari abiri.

Minisitiri Dr Diane Gashumba niwe wakiriye igihembo cyagenewe Perezida Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza