Perezida Kagame yagarutse ku bibazo muri EAC, ubufatanye mu kurwanya Covid-19 n’amatora muri ibi bihe

Yanditswe na Ndahayo Emmanuel
Kuya 2 Kanama 2020 saa 07:46
Yasuwe :
0 0

Perezida Paul Kagame asanga ubufatanye hagati y’ibihugu bigize Umuryango wa Afurika y’Iburasirazuba (EAC), ari yo nzira yonyine yafasha aka karere guhangana n’icyorezo cya Coronavirus, n’ingaruka kizazisaga inyuma.

Ibi yabigarutseho mu gihe EAC iri guhangana na COVID-19 nk’uko bimeze n’ahandi ku Isi. Perezida Kagame yavuze ko n’ubwo ibihugu byakoresha uburyo butandukanye mu guhangana n’iki cyorezo, bikwiye ko akarere kagira ‘ubufatanye no guhanahana amakuru’, kandi ko ibibazo byacyo bizakemuka bishingiye ‘ku makuru ya gihanga aho kuba politike’.

Mu minsi ishize hagiye hagaragara ukutumvikana mu bihugu by’akarere. Abashoferi b’amakamyo ava Tanzania na Kenya bashinjwe gukwirakwiza icyorezo cya Coronavirus mu bindi bihugu, hanafatwa ingamba zo gukemura icyo kibazo.

Ibi byatumye umwuka mubi ututumba mu karere, ndetse habaho inama zo ku rwego rwo hejuru zigamije gukumira ko ibyo bibazo byakwiyongera.

Perezida Kagame yasobanuye ko na mbere ya Coronavirus, EAC yari isanganywe ibibazo by’urujya n’uruza rw’ibintu, bityo ko icyorezo cyongereye ibibazo byari bihari.

Yagize ati “Abantu bashobora kubona ibibazo mu buryo butandukanye. Bamwe bashobora gukora ibintu neza kurusha abandi, ariko na mbere y’icyorezo, twakomeje kurwana no koroshya urujya n’uruza rw’abantu n’ibintu mu karere”.

“Ariko nanone uzasanga mu gihugu kimwe harimo imbogamizi nyinshi kurusha ahandi cyangwa se usange hamwe ibintu bikorwa byihuse kurusha ahandi. Ibi ntaho bihuriye n’icyorezo. Bifitanye isano no kugira imikorere myiza cyangwa kutayigira, kandi ibi bigira ingaruka ku bindi bice by’ubuzima busanzwe. Icyorezo rero cyakomeje ibibazo”.

Muri icyo kiganiro yagiranaga n’Ikinyamakuru The EastAfrican, Perezida Kagame yavuze ko ibyo bibazo byakemurwa n’ibiganiro hagati y’ibihugu bigize Umuryango.

Ati “Ndatekereza ko buri gihe kuganira bizana inyungu nziza. Twaraganiriye hagati yacu [nk’abakuru b’ibihugu] cyangwa se twese hamwe nk’inama iheruka muri Gicurasi. Abayobozi batandukanye [ku zindi nzego] na bo bagiranye ibiganiro byinshi. Abaminisitiri n’Abanyamabanga bihariye n’abandi bayobozi bagiranye ibiganiro byinshi, mu kurebera hamwe igikwiriye gukorwa kandi ndatekereza ko hari intambwe yatewe”.

Perezida Kagame yongeyeho ko inama ya Gicurasi yahuje abayobozi b’ibihugu byo mu karere yayitumije nk’uyoboye Umuryango muri uyu mwaka, kugira ngo ibihugu birebere hamwe icyakorwa mu rwego rwo gukumira ikwirakwira rya Coronavirus mu karere.

Ifungurwa ry’imipaka

Kuri uyu wa 1 Kanama, u Rwanda na Kenya byafunguye ikirere cyabyo ku ndege mpuzamahanga, nyuma y’igihe kinini ibibuga by’indege byarafunzwe ku ndege zitwara abagenzi mu rwego rwo kwirinda ikwirakwira rya Coronavirus.

Perezida Kagame yavuze ko kuba ibihugu biri gukorera ku muvuduko utandukanye mu gufungura ubukungu bwabyo, bidateye ubwoba mu gihe ibihugu by’akarere byahitamo gufatanya.

Yagize ati “Dufite amahirwe, amahirwe meza cyane yo kwivana muri ibi bibazo, kandi tuzagaruka mu buzima busanzwe, ubukungu bwongere bugaruke ndetse n’ubuzima busanzwe [buzagaruka], nidukorera hamwe. Kwikorana ntawe byafasha kuko nubwo waba ufite amahirwe runaka, amwe yaje nta ruhare wabigizemo (nko kugira icyambu gikora ku nyanja), hari ibyo uba udafite kandi undi abifite”.

Yongeyeho ko nk’u Rwanda, icyorezo cyakebuye ubuyobozi ku mutwaro bufite wo kuruteza imbere ndetse n’imbogamizi rufite zidafitwe n’abandi.

Ati “Icyorezo cyatwibukije ko buri gihe ubufatanye ari ngombwa. Bamwe muri twe twibukijwe ko tunafite inshingano nini kurusha abandi. Nk’urugero ku bigendanye no kuba igihugu kidakora ku nyanja, Kenya ifite amahirwe yo gukora ku nyanja y’u Buhinde, Tanzania ni uko. U Rwanda ruri kure cyane y’inyanja kandi dukeneye gukorana n’Isi muri rusange”.

Perezida Kagame yavuze ko n’ubwo bimeze gutyo, u Rwanda rushobora kungukira mu bufatanye n’ibindi bihugu bigize Umuryango.

Amatora mu Karere

Muri Gicurusi, mu Burundi habaye amatora ya Perezida wa Repubulika yabanjirijwe n’ibikorwa byo kwiyamamaza byahuruje imbaga mu makoraniro yanyuze mu gihugu cyose.

Ibi byakuruye impaka ndetse benshi banenga ubuyobozi bwa Pierre Nkurunziza wayoboraga icyo gihe, kwirengagiza inama zatanzwe n’Ishami ry’Umuryango w’Abibumbye ryita ku Buzima (OMS) zo kwirinda amakoraniro manini, kuko ari imwe mu nzira zikwirakwiza icyorezo cya Coronavirus.

Ni mu gihe kandi Uganda nayo iri kwitegura amatora y’Umukuru w’Igihugu ateganyijwe umwaka utaha. Bivugwa ko ashobora kuzaba muri Gashyantare.

Nubwo inzobere mu buzima zifite icyizere cy’uko urukingo rwa Coronavirus rushobora kuboneka mbere y’uko umwaka urangira, hari impungenge z’uko kurukwirakwiza bizatwara ikindi gihe kinini, ku buryo ibikorwa by’amakoraniro manini byagashyizwe mu mpera z’umwaka utaha kuko ari bwo hari icyizere cy’uko icyorezo cyazaba cyashize.

Perezida Kagame asanga ibikorwa nk’amatora bikwiriye gushingira ku mahitamo ya buri gihugu, bigendanye n’uko kibona cyiteguye gukora ibintu mu buryo bukibereye.

Yagize ati “Ibihugu bigomba kwihitiramo, niba ibyo bagiye gukora mu kwiyamamaza no mu matora bijyanye n’ingamba bafashe cyangwa se bagiye gufata zo guhangana n’icyorezo, ubwo ibyo kwemeza ibibakwiriye ni bo bireba. Sinshobora kugira uwo mpa amabwiriza yo kugira icyo akora. Buri kimwe kirahari…. ntacyo tutazi cyangwa tutabona, ubwo rero abantu bazifatira icyemezo”.

Perezida Kagame kandi yanagarutse ku zindi ngingo, avuga ko EAC ikwiriye gukorera hamwe mu gukemura ibibazo birimo gushaka ingengo y’imari y’umuryango, iba igomba guturuka mu bihugu binyamuryango.

Yavuze ko ashyigikiye umwanzuro w’Urukiko rw’Umuryango wa Afrika y’Iburasirazuba wo guhagarika u Burundi na Sudan y’Epfo igihe ibyo bihugu byananirwa kwishyura imisanzu bigombwa.

Yagize ati “Nshyigikiye ko twese tujya ku mujyo umwe mu bijyanye no kwishyura. Ntitwakoresha umuryango uduhuriza hamwe tutishyura ibyo tugombwa, ibyo ni ihame”.

Yanagarutse ku ngaruka Coronavirus izagira ku itangizwa ry’Isoko Rusange rya Afrika (AfCFTA), ibiganiro byo kuzahura umubano w’u Rwanda na Uganda n’izindi ngingo zitandukanye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .