00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yagaragaje impungenge ku mudepite w’u Rwanda wabaswe n’ubusinzi

Yanditswe na Iradukunda Serge
Kuya 12 Ugushyingo 2022 saa 11:46
Yasuwe :

Perezida Paul Kagame yagaragaje ko hari umwe mu bagize Inteko Ishinga Amategeko y’u Rwanda umaze iminsi agaragaza ingeso yo gutwara imodoka yasinze ku buryo hari impungenge z’uko umunsi umwe azateza impanuka ishobora kumuhitana cyangwa igahitana abandi mu gihe hatagira igikorwa mu maguru mashya.

Ibi Perezida Kagame yabigarutseho mu mugoroba wo kuri uyu wa Gatandatu tariki 12 Ugushyingo 2022, ubwo yasozaga Ihuriro rya 15 ry’Umuryango Unity Club Intwararumuri.

Ni umuhango waranzwe no kugaruka ku mateka igihugu cyanyuzemo, aho kigeze cyiyubaka, ibibazo bigihari ndetse n’ingamba zishobora gufatwa.

Perezida Kagame yavuze ko nubwo u Rwanda rwavuye kure ndetse uyu munsi hakaba hari ibibazo rumaze kurenga hakiri inzitizi zijyanye n’imyitwarire ya bamwe mu rubyiruko barangwa n’ubusinzi bukabije ndetse no kunywa ibiyobyabwenge.

Yavuze ko iki kibazo usanga ahanini giterwa n’ababyeyi ndetse n’abandi bagakwiriye kuba bareberera uru rubyiruko bumvise nabi amajyambere n’ibigezweho.

Ati “Abakuru rero cyangwa se ababyeyi hari urujijo rwo kwitiranya amajyambere, bakajya mu majyambere bikaba bivuze ko urekera iyo, ari mu mico ari mu mibereho ari mu mvugo ari muri politike byose bikaba ibintu biri aho byambaye ubusa, bitagira aho biva n’aho bijya ngo ni amajyambere. Ibyo ni ukwibeshya.”

Yakomeje avuga ko nta majyambere cyangwa icyiza kiri mu kureka abana bakishora mu ngeso mbi.

Ati “Nimumbwire icyiza cyaba kiri mu kureka abana bacu, abana b’u Rwanda, abana b’imiryango yacu. Icya mbere ntabwo uzategereza undi muntu ngo ave hanze aze akubwirire umwana ngo imyifatire yawe ni iyi ngiyi.”

Perezida Kagame yavuze ko ibijyanye n’uburere bw’abana na Leta itagakwiriye kuba ibyinjiramo kuko ari ibintu bireba ababyeyi n’umuryango.

Mu rwego rwo guhashya iki kibazo, imwe mu myanzuro yafatiwe muri iri huriro rya 15 rya Unity Club ni uko imyaka yo kwemerera umuntu gutangira kunywa inzoga yava kuri 18 ikagera kuri 21.

Ku bijyanye n’iki cyemezo Perezida Kagame yavuze ko nibasanga ari byo bikwiriye bizashyirwa mu bikorwa ariko agaragaza ko ikizatanga igisubizo kirambye ari ukwigisha abantu ububi bw’izi ngeso ndetse hakongerwa imbaraga mu guhana abarenga ku mategeko akumira ibikorwa nk’ibi.

Yifashishije ingero yagaragaje ko hari aho mu bihugu by’amahanga umuntu ajya kwinjira mu kabari cyangwa mu kabyiniro bakabanza kumusaba indangamuntu kugira ngo barebe ko yujuje imyaka y’ubukure. Yagaragaje ko iyo bigeze mu Rwanda usanga hakiri icyuho mu kugenzura ko amategeko nk’aya yubahirizwa.

Hari umwe mu bagize Inteko Ishinga Amategeko umaze iminsi afatwa yasinze

Perezida Kagame yagaragaje ko ikibazo cyo kunywa inzoga n’ubusinzi kitari mu rubyiruko gusa ko ahubwo hari n’abantu bakuru barimo n’abayobozi bagaragaza izi ngeso.

Yavuze ko mu minsi ishize ubwo yasomaga raporo zitandukanye za Polisi y’u Rwanda yaje gutungurwa no kubona ko hari umwe mu bagize Inteko Ishinga Amategeko y’u Rwanda wasaritswe n’ingeso yo gutwara imodoka yanyoye inzoga.

Ati “Hari raporo naraye nsomye ariko abapolisi nabo nari mbamereye nabi. Bakoze raporo y’umuntu bafashe, ni umwe mu bagize Inteko Ishinga Amategeko yacu. Bamufashe yanyoye, bamupimye igipimo cyari kigiye guturika kubera inzoga yanyoye hanyuma baza no gusanga mu makuru bafite bamufashe nk’inshuro eshanu, ubwo bwari ubwa gatandatu, babona imodoka igenda mu nzira ikubita hirya no hino, amahirwe agira ngira ngo nta muntu arica ariko ni yo maherezo, aziyica cyangwa yice undi muntu.”

Perezida Kagame yakomeje avuga ko akimara kubona ayo makuru yahamagaye umuyobozi wa Polisi kugira ngo arusheho kugira ishusho yagutse y’iki kibazo.

Kimwe mu bintu byatunguye Perezida Kagame ngo ni uko uwo muntu nta bihano yigeze afatirwa kuko afite ubudahangarwa.

Ati “Ikibazo nagize ubwo abapolisi izo raporo barazitanga, bakavuga ko bamufashe ibipimo biri hejuru y’ibisanzwe, ubanza atari yazinyoye gusa ahubwo yari yaguyemo. Baravuga ngo ariko abagize Inteko Ishinga Amategeko bafite ubudahangarwa, ngo ubwo bamuretse aragenda.”

Perezida Kagame yavuze ko uko yumva ibintu nubwo umuntu yaba afite ubudahangarwa bitavuze ko ashobora gukora ikosa nk’iryo inshuro nyinshi nta byemezo bimufatirwa.

Yavuze ko yabwiye umuyobozi wa Polisi ko bimwe mu bihano uyu muntu ashobora gufatirwa harimo kumwambura uruhushya rwo gutwara ibinyabiziga kandi imyitwarire ikamenyeshwa Inteko Ishinga Amategeko byaba ngombwa akamburwa ubudahangarwa kugira ngo aryozwe ayo makosa.

Perezida Kagame yagaragaje impungenge ku Mudepite w’u Rwanda wabaswe n’ubusinzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .