Pasiteri Rutayisire yagaragaje itandukaniro ry’umuyobozi usenga n’udasenga

Yanditswe na Hakizimana Jean Paul
Kuya 25 Werurwe 2019 saa 09:51
Yasuwe :
0 0

Umushumba w’Itorero Angilikani muri Paruwasi ya Remera, Pasiteri Antoine Rutayisire, yagaragaje ko umuyobozi usenga afashwa n’Imana mu gusohoza inshingano ze, bitandukanye n’iyo adasenga agashaka kwiringira imbaraha z’umubiri gusa.

Yabigaragaje kuri iki Cyumweru mu masengesho yateguwe ku bufatanye bw’amadini n’amatorero, inzego z’abikorera n’ubuyobozi bw’Intara y’Iburasirazuba.

Aya masengesho yabereye mu Karere ka Nyagatare, yari agamije gushimira Imana no gusengera igihugu hamwe n’abayobozi bacyo.

Pasiteri Rutayisire yatanze inyigisho zifite insanganyamatsiko igira iti ‘Imbaraga z’Umuyobozi usenga’ , avuga ko uwo muyoyobozi aba afite umwihariko kuko hari n’ibyo atinya gukora kubera ijisho ry’Imana.

Ati “Icyambere aba yemera yuko ibibazo ahura nabyo atabyishoboza wenyine, burya ikitujyana ku Mana ni uko hari ibyo tuba twemera ko biturenze. Umuyobozi rero ugiye kuyobora abaturage benshi kugira ngo azamenye ibibazo bya buri muturage, ibya buri mwana wese utuye aho n’ibya buri gace kose, ni Imana yonyine iba yabasha kugufasha kubimenya. Niyo mpamvu uyisenga abanza akayizera.”

“Naho wa wundi ubikora hatarimo Imana agendera ku mbaraga ze gusa, hari naho agera bikamunanira agakomeza akarwanya agahatiriza bikanga kuko aba atitabaje Imana”

Rutayisire yanavuze ko umuyobozi usenga yuzuza inshingano ze kuko hari byinshi adashobora gukora bitewe no kuba afite igitsure cy’Imana.

Ati “Umuntu ashobora gukwepa umukoresha we ariko ijisho ry’Imana ntabwo urikwepa, iyo Imana ikureba ugira isoni zo gukora ibibi ndetse hari n’ibyo utinya gukora kuko uba uvuga ko iri kukureba kandi ikuri hafi bikarangira bya bindi biteye isoni utabikoze.”

Guverineri w’intara y’iburasirazuba Mufulukye Fred yavuze ko bahuriye hamwe nk’abayobozi muri gahunda yo gusenga ndetse banibukiranya muri gahunda y’inshingano zabo muri rusange.

Ati “ Aya masengesho yatweretse ubufatanye buri hagati y’abayobozi ndetse n’amadini n’amatorero muri iyi ntara mu gukemura ibibazo bitandukanye cyane cyane za nsengero zitari zimeze neza twarafatanyije dukosora ibitaragendaga neza.”

“Abanyamadini rero tubitezeho gukomeza gufatanya mu gukemura ibibazo byugarije urubyiruko byiganjemo urugaragara mu biyobyabwenge, imirire mibi, abana baterwa inda zitateguwe n’ibindi byinshi abo rero nidufatanya tukabitaho turizera tuzakemura biriya bibazo.”

Mufulukye yanavuze ko impamvu amadini n’amatorero bakwiye gufatanya na leta mu gukemura ibi bibazo ari uko abenshi mu banyarwanda babarizwa mu madini n’amatorero atandukanye.

Ati “Nko mu ntara y’iburasirazuba abahatuye 97% babarizwa mu madini n’amatorero. Turamutse dufatanyije neza abo bahohotera bariya bana cyangwa na bariya bishora mu ngeso mbi babarizwa muri aya madini twabigisha bikagenda neza.

Yasabye abanyamadini gukomeza kwigisha ababagana kugira imico myiza no guha uburere abana babo mu rwego rwo gutegura urubyiruko rufite indangagaciro.

Alarm Ministries yasusurukije abitabiriye aya masengesho
Guverineri Mufulukye yasabye abanyamadini kugira uruhare mu guhindura imibereho y'abaturage
Aya masengesho yitabiriwe n'abayobozi mu nzego za leta, abanyamadini n'abikorera mu Ntara y'Iburasirazuba
Pasiteri Rutayisire yasabye abayobozi kujya baragiza Imana inshingano zabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza