Oda Paccy yamaganiwe kure, abayobozi bamwe basaba ko ibihangano bye bihagarikwa

Yanditswe na IGIHE
Kuya 24 Ukwakira 2018 saa 11:00
Yasuwe :
0 0

Umuraperi Uzamberumwana Oda Paccy akomeje kwamaganwa nyuma y’ifoto yamamaza indirimbo ye Ibyatsi, ikoze mu buryo yabanje kwandika ‘IBYA’ maze ‘TSI’ akayishyira munsi kandi mu nyuguti nto, ibintu byateye benshi kwibaza impamvu.

Icyatunguranye ni uburyo ayo magambo yanditse ku ifoto y’ikibuno cy’umukobwa, ibintu byatumye kuri uyu wa Gatatu, Umuyobozi w’Itorero ry’Igihugu, Bamporiki Edouard, amwambura izina ry’ubutore ry’Indatabigwi.

Yasobanuye ko ari ukubera ko “imyitwarire ye inyuranye n’umuco w’ubutore yari yaratojwe ndetse ihabanye n’imihigo yagiranye n’abo bahuje izina ry’ubutore.”

Umunyamabanga Nshingwabikorwa w’Inteko Nyarwanda y’Umuco n’Ururimi, RALC, Dr Vuningoma James, yavuze ko imyitwarire ya Paccy ibayeho nyuma y’uko aheruka kwihanangirizwa ubwo yasohoraga indi foto yamenyekanye nk’ikoma.

Yavuze ko bashyigikiye ko yirukanwa mu Intore, kuko iyo akoze ibintu bakamugira inama ariko “ubutore bwe akabushyira muri biriya bibazo, nta kundi byagenda.”

Ahereye ku byabaye ubushize, Dr Vuningoma yagize ati “Twaramuhamagaye tuganira nawe, turabimwereka asaba n’imbabazi rwose, ariko twari tuzi ko atazongera kujya muri uwo murongo, ariko ni nko kuvuga ngo ntacyo yumvise.”

“Ubwo rero ibisigaye ni ukumwamagana kugira ngo ashake uburyo yikosora nk’umunyarwandakazi, naho ubundi ibyo akora ntabwo ari byo pe!”

Ingabire Marie Immaculée, umwe mu nararibonye ukunda gutanga ibitekerezo adaca ku ruhande, yahereye ku mwanzuro wa Komisiyo y’Itorero maze agira ati “Bakoze cyane!”

“Nawe ndebera iriya foto yashyizeho, ngo ni ifoto iherekeza indirimbo ye! Koko mwa bana mwe, turimo turarwana n’inda z’abangavu, turimo turarwana n’indangagaciro z’Abanyarwanda zatakaye, umuntu agasohora biriya bintu!”

“Njye nabibonye ndavuga ngo tugeze habi nk’abanyarwanda. Itorero rero ry’igihugu, bakoze cyane, amashyi menshi cyane kuri Bamporiki. Namwambure ubutore kuko ntabwo afite, nta ntore yitwara kuriya, biriya nta butore burimo.”

Yavuze ko kwamburwa ubutore ari igihano gikwiye gutuma Paccy ahindura imitekerereze, bitabaye yaba afite ikibazo gikomeye, ku buryo ari amategeko yakubahirizwa kuko atemera amashusho y’urukozasoni.

Yavuze ko Paccy yagiye mu itorero akabwirwa indangagaciro, umuco w’abanyarwanda n’uko bagomba kwifata.

Ati “Niba uyu munsi atabasha kubikora, ni amategeko akwiye kubahirizwa, n’abanyamakuru bose nta n’uwari ukwiye kongera gucuranga indirimbo ze ahubwo.”

Perezida w’Urugaga rw’Abahanzi, Intore Tuyisenge, nawe yashimangiye ko ibyo Paccy yakoze “bihabanye cyane n’indangagaciro twatorejwe mu itorero ry’igihugu zikwiriye kuranga umunyarwandakazi muri rusange.”

Yavuze ko nubwo hari ibyo abahanzi basaba leta kubafasha nabo bakwiye kuzirikana uruhare rwabo mu kubaka igihugu, anashimangira ko umuhanzi wakosheje bamuhwitura, nubwo akenshi bitajya ahagaragara.

Ati “Ariko iyo bibaye ikosa nka ririya rigaragarira abantu bose ndetse bikwiye no kugaragara kugira ngo uwarikoze nawe bibere icyitegererezo abandi, nabyo bizakorwa.”

Usibye aba bayobozi, ku mbuga nkoranyambaga abantu benshi basabye inzego zifite umuco mu nshingano, guhagurikira abahanzi batatira ibiwugize, ababirenzeho bakajya bahanwa.

Ingabire Immaculée yashimiye ko Oda Paccy yambuwe ubutore, ashimangira ko hakwiye ibihano ku bahanzi batubaha umuco nyarwanda
Dr James Vuningoma uyobora Inteko Nyarwanda y'Ururimi n'Umuco, yatangaje ko Paccy yari yarasabye imbabazi ariko kuba yongeye gusubira bigiye gutuma yamaganwa
Intore Tuyisenge yashimangiye ko Paccy asebeje abandi bahanzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza