Nyaruguru: Ku myaka 37 afite abana barindwi badahuje ba Se

Yanditswe na Prudence Kwizera
Kuya 22 Kanama 2019 saa 12:39
Yasuwe :
0 0

Nyiraneza (si ryo zina nyakuri) wo mu Murenge wa Ruramba mu Karere ka Nyaruguru, ni umwe mu bahamya b’ingaruka mbi z’uburaya kuko nubwo ubu atakibukora ndetse nta ndwara idakira yabwanduriyemo, abayeho nabi hamwe n’abana barindwi yabuvanyemo.

Uyu mugore w’imyaka 37 avuga ko yatangiye uburaya akiri umukobwa muto w’imyaka 19, abwinjiramo ashaka amafaranga atamuvunnye no kwinezeza.

Ubu amaze kubyara abana barindwi, umuto ni uruhinja rutaruzuza n’umwaka umwe! Umukuru muri bo ni umukobwa w’imyaka 19, nyina ntazi aho aherereye gusa ngo yumva ko yagiye gushakisha imibereho mu mujyi wa Huye.

Bitewe n’ubuzima ndetse n’imyaka agezeho Nyiraneza* byamuhatiye kureka uburaya, ibibazo bikamubana urusobe iyo yibutse ko mu bana barindwi afite atazi abagabo bababyaranye kuko, yagiye aryamana n’abo abonye bemeye kumwishyura.

Agaruka ku bana be yagize ati “Ntabwo wambaza ngo se ni uyu cyangwa ni uyu kuko twahuraga gutyo nyine nkora umwuga w’uburaya.” Yongeraho ko igihe waryamanye n’abagabo bane ku munsi, "biragoye kumenya uwaguteye inda."

Nyuma yo kureka uburaya, yagiye gutura mu nzu ihomesheje ibyondo, nta murimo agira umutunze ngo abonere abana be ibyangombwa nkenerwa nk’ubwisungane mu kwivuza, amafunguro na yo bayabona umunsi umwe bakirenza undi.

Ubu uwari umukobwa w’ikizungerezi abagabo bamuryoshyaryoshya, ni umugore wicaye imbere y’abana yabuze icyo abagaburira, usaba abagiraneza n’ubuyobozi ngo bafashe abana be kwiga, ngo hato batazagira ubuzima nk’ubwe.

Ati "Nta cyo kurya mfite cyo guha abana, baburaye baranabwirirwa. Inzu tubamo nayo uruhande rumwe yenda kutugwaho.” Mu nzu ya Nyiraneza n’abana be kandi, baryama ku byatsi.

Yakomeje ati “Ubu uburaya naraburetse, nabwikuyemo ariko aho naburekeye byatumye abana baburara bakanabwirirwa (…) mbonye umpa amafaranga nabusubiramo nkabukora bakabona icyo barya kuko barashonje.”

Umunyamabanga Nshingwabikorwa w’Umurenge wa Ruramba, Nibagwire Jeanne, avuga ko Nyiraneza bamuzi kandi hari ubufasha bagiye baha abana be, ndetse bazakomeza kumufasha ariko cyane cyane ku guhindura imyumvire ngo abashe gushaka ikindi cyatunga umuryango we.

Ati “Ni kenshi yataga abana akagenda tukabafata tukabitaho tukanabatangira mituweli. Na buriya mwamubonye imyumvire ye yarahindutse.”

Ubuyobozi bw’inzego z’ibanze mu Murenge wa Ruramba buvuga ko bugiye gukurikirana n’ikibazo cy’abana be batiga bagashyirwa mu ishuri.

Inzu Nyiraneza abanamo n'abana be
Ku byumba bakingishaho utwenda
Asaba ubuyobozi gufasha abana be ngo hato batazabaho nabi nka we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza