Nyaruguru: Gitifu w’Akarere na Division Manager baherutse gufungwa bahagaritswe

Yanditswe na Prudence Kwizera
Kuya 14 Kamena 2020 saa 11:20
Yasuwe :
0 0

Inama Njyanama y’Akarere ka Nyaruguru yahagaritse by’agateganyo uwari Umunyambanga Nshingwabikorwa w’akarere, Ruzima Serge, na Nsengiyumva Innocent wari Umuyobozi ushinzwe Ibikorwa rusange (Division Manager) muri ako gace, kubera ibyaha bakurikiranyweho birimo ruswa, gutanga amasoko binyuranye n’amategeko no kunyereza umutungo wa Leta.

Ni nyuma y’uko ku wa Gatanu tariki ya 12 Kamena 2020 batawe muri yombi n’Urwego rw’Igihugu rw’Ubugenzacyaha, RIB, bakurikiranyweho ibyo byaha.

Umuyobozi w’Akarere ka Nyaruguru akaba n’umwe mu bagize Inama Njyanama, Habitegeko François, abinyujije kuri Twitter yatangaje ko abo bayobozi bahagaritswe hashingiwe ku ngingo ya 40 ya sitati rusange y’abakozi ba Leta.

Yagize ati ‘‘Bashingiye ku ngingo ya 40 ya sitati rusange y’abakozi ba Leta; Njyanama ihagaritse by’agateganyo Ruzima Serge Umunyamabanga Nshingwabikorwa w’Akarere ka Nyaruguru kubera gukekwaho ruswa; gutanga amasoko binyuranyije n’amategeko no kunyereza umutungo wa Leta.’’

Yakomeje avuga ko hahagaritswe by’agateganyo na Nsengiyumva Innocent wari Ushinzwe Ibikorwa rusange mu Karere ka Nyaruguru.

Bakimara gufatwa, RIB yatangaje ko abakekwa ibyo byaha bafungiye kuri Sitasiyo ya RIB ya Kibeho mu gihe iperereza rikomeje kugira ngo hakorwe dosiye ishyikirizwe Ubushinjacyaha.

Yaboneyeho umwanya wo kwibutsa ko umutungo wa Leta ari ntavogerwa kandi itazihanganira umuntu wese uzawukoresha nabi.

Ingingo ya 188 mu itegeko rigenga amasoko ya leta ivuga ko uhamijwe icyaha cyo gutanga isoko rya Leta mu buryo bunyuranyije n’amategeko ahanishwa igifungo kitari munsi y’imyaka itanu ariko kitarenze imyaka irindwi n’ihazabu y’amafaranga y’u Rwanda atari munsi ya miliyoni 2 Frw ariko atarenze miliyoni 5 Frw.

Itegeko ryerekeye kurwanya ruswa mu ngingo ya cumi, ryo rivuga ko umuntu uhamijwe icyaha cyo kunyereza umutungo wa Leta ahanishwa igifungo kitari munsi y’imyaka irindwi ariko kitarenze imyaka icumi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’umutungo yanyereje.

Igitabo cy’amategeko ateganya ibyaha n’ibihano mu ngingo ya 276 cyo kivuga ko iyo guhimba inyandiko byakozwe n’umukozi wa Leta mu murimo ashinzwe cyangwa n’undi ushinzwe umurimo w’igihugu, igihano kiba igifungo kitari munsi y’imyaka irindwi ariko kitarenze imyaka icumi n’ihazabu y’amafaranga y’u Rwanda atari munsi ya miliyoni ebyiri 2 Frw ariko atarenze miliyoni 3 Frw cyangwa kimwe gusa muri ibyo bihano.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .