Nyaruguru: Abayobozi babiri bafungiwe kunyereza amafaranga y’abahinzi b’icyayi

Yanditswe na Emma-Marie Umurerwa
Kuya 19 Mata 2019 saa 12:22
Yasuwe :
0 0

Ushinzwe gucunga umutungo hamwe n’umuyobozi wa koperative y’abahinzi b’icyayi ba Nyaruguru, Cootenya, bari mu maboko y’Ubugenzacyaha bacyekwaho kunyereza miliyoni hafi zirindwi z’amafaranga y’abanyamuryango.

Abatawe muri yombi ni ushinzwe umutungo hamwe na Perezida wa koperative Cootenya, ikorera mu Murenge wa Mata.

Umuyobozi w’Akarere ka Nyaruguru, Habitegeko François, yabwiye IGIHE ko bari baragejejweho ikibazo n’abanyamuryango b’iyi koperative ko umutungo wabo ucunzwe nabi.

Ati “Igenzura ryakozwe n’Ikigo cy’Igihugu gishinzwe amakoperative niryo ryagaragaje ko hari amafaranga yanyerejwe, ariko natwe abanyamuryango ba koperative bari baratugejejeho ikibazo cy’uko amafaranga yabo akoreshwa nabi.”

“Icyo twakwizeza abanyamuryango b’ayandi makoperative ni uko ubuyobozi buri maso, umutungo wabo ugomba gucungwa neza kandi uwakwiha kuwukoresha nabi akabibazwa.”

Umuvugizi w’Urwego rw’Igihugu rw’Ubugenzacyaha (RIB) Mbabazi Modeste, yabwiye IGIHE ko hamaze kugaragara 6,383, 698Frw abo bayobozi bacyekwaho kunyereza ndetse hari n’abandi barindwi bakirimo kubazwa.

Ati “Ubugenzuzi buracyakomeza ku buryo hari n’andi ashobora kuboneka, ndetse hashobora gufatwa n’abandi bigenda bigaragara ko hari amafaranga batwaye mu buryo budakurikije amategeko n’amabwiriza ya koperative. Ibi byakozwe ku bufatanye na RCA nyuma y’uko abaturage batanze amakuru ku mutungo wabo wanyerejwe.”

“Turakomeza gukangurira abaturarwanda kwirinda kwiba umutungo wa rubanda bashinzwe gucunga kuko bidindiza iterambere ryabo ndetse n’igihugu muri rusange. Turashimira kandi abaturage batanze amakuru kuri ibi bikorwa bibi dusaba n’abandi gutanga amakuru ku byo babona bitagenda neza kugira ngo bikumirwe hakiri kare.”

Itegeko riteganya ko umuyobozi cyangwa umukozi ukoresha mu nyungu ze cyangwa iz’undi, umutungo, amafaranga cyangwa inyandiko z’agaciro, yahawe cyangwa yashyikirijwe kubera imirimo akora cyangwa ukoresha mu nyungu ze abakozi ashinzwe ku bw’umurimo aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda yikubye inshuro kuva kuri eshatu (3) kugeza kuri eshanu (5) z’agaciro k’umutungo yanyereje.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza