00:00:00 IGIHE NETWORK KN KINYARWANDA EN ENGLISH FR FRANCAIS

Nyarugenge: Cogebanque Plc yishyuriye Mituweli abaturage 500

Yanditswe na Igizeneza Jean Désiré
Kuya 24 Ugushyingo 2022 saa 05:58
Yasuwe :

Mu bufatanye isanzwe ifitanye n’Umujyi wa Kigali by’umwihariko Akarere ka Nyarugenge, Cogebanque Plc yishyuriye ubwishingizi bwo kwivuza abaturage 500, bafite amikoro make kurusha abandi.

Ni inkunga yatanzwe mu ntego banki y’ubucuruzi, Cogebanque yihaye yo gufasha abaturage ari na bo bafatanyabikorwa bayo b’imena izatuma babona serivisi z’ubuvuzi mu buryo bworoshye, binyuze mu kugabanya igiciro cyazo.

Mu muhango wo kwakira iyo nkunga wabaye kuri uyu wa Kane tariki 24 Ugushyingo 2022, Umuyobozi muri Cogebanque ushinzwe imenyekanishabikorwa, Antoine Iyamuremye yavuze ko impamvu yayo ari uko abayihawe ari bo bafatanyabikorwa ba mbere mu guteza imbere ubukungu bw’Igihugu.

Ati "Ntabwo twatanga serivisi ku bantu badafite amagara mazima. Iyi ni yo mpamvu tuba tugomba gufatanya kugira ngo bagire ubuzima bwiza. Iyi nkunga ni imwe mu ntego twihaye zo guhangana n’ibibazo bibangamiye umuryango Nyarwanda."

Yashimangiye ko iyi banki ifite gahunda yo guharanira no kugera ku iterambere rirambye nk’imwe mu ntego nyamukuru y’igihugu kandi izahoraho binyuze mu bufatanye butandukanye.”

Umuyobozi w’Imirimo rusange mu Karere ka Nyarugenge, Murebwayire Betty yashimiye Cogebanque kuri iyi nkunga yatanze, yemeza ko izafasha abadashoboye kwishyura bityo na bo babashe kubona serivisi z’ubuvuzi ku buryo bworoshye.

Ati "Hari abaturage baba bafite amikoro make ku buryo kubona amafaranga yo kwishyura biba bigoye. Iyo tubonye nk’aba bafatanyabikorwa, badufasha kubabonera uko bivuza. Ni umusanzu ukomeye cyane."

Murebwayire yatangaje ko mu guhitamo abahabwa iyi nkunga, bagendera ku makuru bahabwa n’inzego z’ibanze cyane ko baba bazwi hagendewe ku byiciro by’ubudehe.

Kugeza ubu imibare yakozwe n’Ikigo gishinzwe guteza imbere ibikorwa by’iterambere mu nzego z’ibanze, LODA hagendewe ku byiciro by’ubudehe, igaragaza ko Akarere ka Nyarugenge gafite abaturage 272 448, barimo abarenga ibihumbi 30 bafite ubundi bwishingizi.

Muri aba baturage kandi harimo abo mu cyiciro cya mbere bishyurirwa na Leta basaga ibihumbi 21, ukuyemo abo bose hasigara abaturage ibihumbi 244 baba bagomba kwishyura Mituweli.

Gusa hari 3.5% by’abaturage bongerwaho na RSSB, muri abo, abamaze kwishyura Mituweri byuzuye ni 88%, mu gihe ukuyeho bariya bongerwaho na RSSB, 93% ari bo bamaze kwishyura byuzuye.

Umwe mu bayobozi bashinzwe ubuzima mu Karere ka Nyarugenge, Nkunda Évariste, avuga ko mu gihe hasigaye ukwezi kumwe (Ukuboza) ari na ko guteganywa ko abaturage bose bagomba kuba basoje kwishyura, kuzarangira bazaba besheje umuhigo wo kuba abaturage bose bishyuye Mituweri.

Nkunda avuga ko impamvu y’iyi mibare ibura, ari uko bamwe bakunda kwivuriza mu bitaro byigenga, abandi bakaba bategereza kwishyura ari uko barwaye cyane ko ubu umuntu iyo akimara kwishyura aba yemerewe guhita yivuza nta nkomyi.

Uretse gufasha mu guteza imbere imibereho myiza y’abaturage, iyi banki yashinzwe mu 1999 ikorana n’ibigo binini ndetse na ba rwiyemezamirimo baciriritse n’abato mu kuzamura ubucuruzi bwabo, binyuze muri serivisi za banki bahabwa ku buryo bunoze.

Kugeza ubu ikorera mu gihugu hose aho ifite amashami 28, abayihagarariye (agents) bagera kuri 600, internet banking, mobile banking, amakarita ndetse n’ibyuma bitanga amafaranga (ATMs) 36 byose bigakorwa kugira ngo serivisi z’imari zigere kuri bose mu buryo bunoze.

Umuyobozi ushinzwe iyamamazabikorwa muri Cogebanque, Iyamuremye Antoine yavuze ko gutera inkunga abaturage ari yo ntego kuko bagomba guha serivisi abafite ubuzima buzira umuze
Umuyobozi w'imirimo rusange mu Karere ka Nyarugenge, Murebwayire Betty, yavuze ko iyi nkunga ari iy'agaciro gakomeye
Ubuyobozi bw'Akarere ka Nyarugenge ubwo bwashyikirizwaga inkunga yo kwishyurira abatishoboye ubwisungane mu kwivuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .