00:00:00 IGIHE NETWORK KN KINYARWANDA EN ENGLISH FR FRANCAIS

Nyanza: Yatemye umugore we, umwana n’inka abaziza imitungo

Yanditswe na Prudence Kwizera
Kuya 17 May 2022 saa 03:08
Yasuwe :

Umugabo wo mu Murenge wa Kigoma mu Karere ka Nyanza akurikiranyweho gutema umugore we n’umwana ndetse n’inka yari iri mu rugo.

Byabaye mu gitondo cyo kuri uyu wa Kabiri tariki ya 17 Gicurasi 2022 mu Mudugudu wa Butara mu Kagari ka Butara.

Uwo mugabo w’imyaka 50 n’umugore we w’imyaka 46 bari barasezeranye mu buryo bwemewe n’amategeko ndetse bari bamaze kubyarana abana batanu.

Amakuru aturuka muri uwo murenge avuga ko uwo mugabo n’umugore we bagiranye amakimbirane ashingiye ku mitungo no gucana inyuma mu myaka ine ishize, ubuyobozi bubafasha gutandukana mu buryo butemewe n’amategeko.

Umugore yasigaye mu rugo n’abana batanu bari bafitanye naho umugabo ajya kuba mu nzu bari bafite mu isantere y’ubucuruzi.

Bivugwa ko uwo mugabo yahoraga avuga ko adashimishijwe no kuba umugore we amurira imitungo akayisangira n’abandi bagabo baza kuryamana na we.

Umuyobozi w’Akarere ka Nyanza Ntazinda Erasime, yabwiye IGIHE ko mu gitondo cyo kuri uyu wa Kabiri aribwo mugabo yateye urugo umugore n’abana babamo atangira kubatema.

Ati “Yatemye umugore akaboko aragaca atema mu mutwe n’umwana we w’umuhungu w’imyaka 14 ndetse n’inka yari iri mu rugo ayitema mu mugongo.”

Abaturanyi batabaye uwo mugore n’umwana babajyana kwa muganga ku Bitaro bya Nyanza naho uwo mugabo ahita afatwa ashyikirizwa Polisi kugira ngo inzego z’ubugenzacyaha zimukorere dosiye.

Ntazinda yasabye abaturage kwirinda amakimbirane kandi igihe bafitanye ibibazo bakiyambaza ubuyobozi bukabafasha kubikemura aho kwihanira.

Ibiro by'Umurenge wa Kigoma mu Karere ka Nyanza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .