00:00:00 IGIHE NETWORK KN KINYARWANDA EN ENGLISH FR FRANCAIS

Nyamasheke: Ukuri ku byavuzwe kuri Gitifu ushinjwa kubiba amacakubiri mu bakozi

Yanditswe na Sitio Ndoli
Kuya 26 Werurwe 2021 saa 06:06
Yasuwe :
0 0

Mu cyumweru gishize ni bwo hagaragaye ibaruwa ishinja Ndanga Janvier, Umunyamabanga Nshingwabikorwa w’Umurenge wa Cyato kubiba amacakubiri mu bakozi ayoboye.

Iyo baruwa IGIHE ifitiye kopi yasinyweho n’abakozi 13 b’Umurenge wa Cyato, aho bamushinjaga guteranya abakozi, kubayoboza igitugu, kubatuka, guhunga inshingano, kudaha abakozi ibyo bemerewe no guteranya abakozi n’abaturage.

Iyi baruwa aba bakozi bayandikiye Umunyamabanga Nshingwabikorwa w’Akarere ka Nyamasheke, bamenyesha Umuyobozi w’Akarere n’abamwungirije n’abandi barimo Umunyamabanga Nshingwabikorwa w’Umurenge wa Cyato.

Aba bakozi bavugaga ko ibyo bibazo bafitanye na gitifu bituma batuzuza inshingano zabo no kwesa imihigo kandi ko babigejeje ku Muyobozi w’Akarere wungirije ushinzwe Ubukungu akabagira inama ariko ngo bakaza kubona nta mpinduka.

Amakuru IGIHE ifitiye gihamya, ni uko bamwe muri aba bakozi bimuriwe mu yindi mirenge itandukanye nyuma y’inama y’umutekano itaguye yateranye hamwe n’aba bakozi.

Umunyamabanga Nshingwabikorwa w’Umurenge wa Cyato , Ndanga Janvier, ntiyigeze ashaka kugira icyo avuga ku byo bamurega byose.

Mu kiganiro gito yahaye IGIHE Umuyobozi w’Akarere ka Nyamasheke, Mukamasabo Appolonie, yavuze ko basanze ari abakozi bane bagumuye bagenzi babo.

Ati “Twabimenye bigeze mu itangazamakuru turabatumira. Mu busesenguzi twakoze, twasanze nta kibazo bafite ahubwo twasanze ari abakozi bane bafite imikorere itanoze, mu kubabaza imikorere yabo bakangurira abandi kwandika iriya baruwa. Twabonye iyo mikorere y’abantu bane itanoze. Icyo twakoze twabashyize mu yindi mirenge ariko ubusesenguzi bwo buracyakomeje kugira ngo tumenye impamvu bihuje kuriya batamenyesheje akarere.”

Yakomeje agira ati “Nihagira ugaragarwaho amakosa azabihanirwa kuko iyo bagira ikibazo bari kubimenyesha akarere badakwirakwije ibintu kuriya.”

Umurenge wa Cyato ni umwe muri 15 igize Akarere ka Nyamasheke ukaba ukora ku Ishyamba rya Nyungwe.

Ibiro by'Akarere ka Nyamasheke mu Ntara y'Iburengerazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .