Nyamasheke: Ntawera Francine yaretse uburaya, agirirwa icyizere ayobora umudugudu

Yanditswe na Sitio Ndoli
Kuya 7 Mutarama 2020 saa 07:25
Yasuwe :
0 0

Inzira z’Imana zirenze igihumbi! Niyo ihindura amateka y’umuntu ikayagira mashya, iby’ubuzima bwe bwa kera bikaba amateka y’ahahise. Mu babonye ukuboko kw’Imana gukora ku buzima bwabo barimo na Ntawera Francine, wahoze mu buraya akabuvamo agirirwa icyizere cyo kuba umuyobozi.

Ntawera mu buhamya bwe avuga ko yakoze uburaya afite imyaka 18 akaza kubureka akagirirwa icyizere cyo kuba Umuyobozi w’Umudugudu wa Nyenyeri mu Kagari ka Kibogora mu Murenge wa Kanjongo, ari naho avuka.

Ntawera yemeza ko uburaya yabukoreye i Kagugu mu Mujyi wa Kigali mu gihe cy’imyaka ine, yananyuze mu Kirambo no mu Ityazo mu Karere ka Nyamasheke.

Mu buhamya bwe avuga ko impamvu yamuteye kujya mu buraya ari umugabo wamufashe ku ngufu bikaza guhumira ku mirari nyuma y’urupfu rw’umubyeyi we.

Yagize ati “Nakoze uburaya mfite imyaka 18 nyuma yaho umugabo amfatiye ku ngufu n’umubyeyi wanjye (Papa) apfuye nderura ndabukora. Nabonyemo ibibi gusa, guhura n’abagabo batandukanye udakunda bakagukorera ibyo bashaka kubera uba ushaka amafaranga, nakuyemo n’abana batatu.”

Ntawera avuga ko hari ibyo atazibagirwa mu buzima bw’uburaya yamazemo imyaka irindwi.

Avuga ko yigeze kuryamana n’umugabo maze akamwiba ndetse akanamwima ayo bari bumvikanye.

Yagize ati “Hari umuntu wigeze kuntwara ibihumbi 50 Frw ndetse na 15 000 Frw yanyemereye ntiyayampa, sinzi ukuntu byagenze ubundi nishyuzaga mbere, umenya yari yazanye imiti.”

Uyu mubyeyi yaje gufata icyemezo cyo kureka uburaya, abugendera kure ahubwo atangira ubucuruzi bwa butike.

Ntawera w’imyaka 33 kuri ubu yagiriwe icyizere cyo kuyobora Umudugudu wa Nyenyeri. Avuga ko yagiriwe icyizere n’abaturage ibyo asanga atari kugeraho akiri mu buraya.

Ati “Bararebye babona imyitwarire mfite nkwiriye kubayobora, butike yanjye ibamo amavuta, umuceri n’ibindi. Ubu mfite intego yo kugura moto ikamfasha n’umuryango wanjye.”

Umunyamabanga Nshingwabikorwa w’Akagari ka Kibogora, Uwihoreye Providence, yavuze ko Ntawera ari umuyobozi witwara neza.

Yagize ati “Ni umuyobozi nk’abandi, mbona nta kibazo akora neza, ni yo tugenzura abayobozi b’imidugudu aza ku mwanya wa mbere, mbona nta kibazo.”

Ntawera uri mu kigero cy’urubyiruko yashishikarije abana bose kwitabira ishuri kuko ngo iyo yiga ntaba yarabayeho mu buzima yanyuzemo.

Ati “Nashishikariza abana bose kwitabira kwiga kuko iyo niga nubwo meze gutya ntabwo ariko mba meze. Iyo umwana avuye mu ishuri akajya gukora ibintu bidakorwa nka biriya aba ari kwidindiriza amahirwe, bakwiga byabananira bagashaka ibindi bakora batagiye mu buraya.”

Ntawera afite umugabo bamaranye imyaka irenga ibiri kuko bakoze ubukwe mu 2017. Mu buhamya bwe yemeza ko amafaranga yabonye mbere mu buraya harimo ayo yifashishije mu kugura ikibanza no kwiyubakira inzu.

Nyamasheke: Ntawera Francine yaretse uburaya, agirirwa icyizere cyo kuba Umuyobozi w'Umudugudu ufatwa nk'intangarugero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza