Nyamasheke: Minisitiri Shyaka yasabye abakobwa gucika ku muco wo guhonga abasore ngo bashyingiranwe

Yanditswe na Baryaherezahe Léonce
Kuya 29 Nzeri 2019 saa 04:06
Yasuwe :
0 0

Minisitiri w’ubutegetsi bw’igihugu Prof. Shyaka Anastase, yasabye abakobwa bo mu karere ka Nyamasheke gucika ku muco wo guhonga abasore utwabo ngo bashyingiranwe.

Yabitangaje kuri uyu wa Gatandatu mu muganda ngarukakwezi wo gutunganya ahazubakwa gereza nshya ya Nyamasheke mu murenge wa Macuba.

Mu turere tw’intara y’Iburengerazuba Nyamasheke ibarizwamo,hakunze kuvugwa iyo ngeso y’abakobwa bahonga abasore imitungo irimo amafaranga,inka, inzu n’ibindi ngo bashyingiranwe.

Hamwe na hamwe umukobwa wasuwe n’umuhungu agomba kumubagira isake nziza, ndetse ngo yamara no kumugaragariza imitungo afite bakabona gutangira umushinga wo gushyingirana.

Ibi rero Shyaka yabikomojeho, avuga ko ari umuco mubi kuko n’iyo babanye bahorana intonganya mu rugo.

Yagize ati “Mugomba kwigira mukikura mu bukene ,mukarwanya umwanda mugaca n’umuco mubi wa bamwe mu bakobwa wo guhonga abasore imitungo n’ibintu kugira ngo mushyingiranwe kuko urukundo rutagurwa.”

Minisitiri Shyaka yavuze ko abasore n’inkumi bagomba kubana babitekerejeho kandi bashimanye kugira ngo n’urugo bazashinga rurambe.

Yasabye abasore guharanira kwigira, ntibumve ko bazabeshwaho n’ibyo bavanye mu bakobwa bagiye gushyingiranwa.

Komiseri mukuru w’urwego rw’igihugu rushinzwe imfungwa n’abagororwa (RCS) , CGP George Rwigamba yabwiye abaturage bo mu murenge wa Macuba ko hagiye kubakwa gereza ariko abasaba kuzaba abaturanyi beza.

Ati “tugiye kubaka gereza mu murenge wanyu ariko turabasaba kuzaba abaturanyi beza mukirinda ibyaha byatuma muyifungirwamo” .

Ubutaka buzubakwaho iyo gereza bungana na hegitari 34 ,aho biteganyijwe ko icyo gikorwa cyo kubaka gereza ya Nyamasheke kizatangira hamaze kugera amazi n’amashanyarazi. Imirimo yo kubaka icyo gikorwa remezo izatwara amafaranga y’u Rwanda agera kuri miliyari eshanu.

Muri uyu muganda usibye gusiza ikibaza no gushinga imbago z’ahazubakwa gereza,abitabiriye umuganda banasije ibibanza bibiri bizubakwamo ibiro by’umudugudu wa Nyagahinga ndetse n’icy’inzu y’umuturage utishoboye.

Minisitiri Shyaka yifatanyije n'abatuye muri Nyamasheke mu muganda ngarukakwezi
Abaturage bari bitabiriye ku bwinshi
Minisitiri Shyaka yavuze ko abasore n’inkumi bagomba kubana babitekerejeho kandi bashimanye kugira ngo n’urugo bazashinga rurambe
Prof Shyaka yifatanyije n'abandi bayobozi hamwe n'abaturage gutunganya ahazubakwa gereza ya Nyamasheke

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza