Nyamasheke: Hari abagikomeye ku muco wo guha abasore isake

Yanditswe na Sitio Ndoli
Kuya 12 Mutarama 2020 saa 03:39
Yasuwe :
0 0

Burya ngo buri gahugu kagira umuco wako! Ku bakobwa bo mu Murenge wa Nyabitekeri mu Karere ka Rusizi, ushaka umugabo afite byinshi agomba kubahiriza birimo ko niba umusore agiye kumurambagiza, agomba kumuha icyubahiro akamwakiriza inyama nziza y’isake undi nawe agahera aho avuga ati umugore ni uyu, ubwo utabikoze agahera ku ishyiga imyaka ikihirika.

Mu bakobwa bo muri ako gace, bimaze kuba umuco kandi bubaha cyane keretse wenda ushaka kuzajya kwiha Imana hamwe badashyingirwa naho abandi bazi ko bakeneye abagabo ni ihame ntakuka kubikora.

Ku ruhande rw’abasore, nabo ngo barabigendera ku buryo usuye umukobwa ntiyakirizwe isake abifata nko gucirwa mu maso cyangwa se gusuzurwa mu buryo ndengakamere.

Twagiramariya Ange yagize ati “Nkanjye nakuze ntafite umuryango, ubu maze kugira imyaka 30. Kuko nta sake mfite kubona umugabo biragoye, abasore bashaka ababaha isake ndetse ukanisaba ukanikwa.”

Nyiransabimana Athanasie yagize ati “Njyewe mbona ntacyo bitwaye kuko ni ukugira ngo tumufate neza kandi burya umukwe arakomeye cyane cyane hano mu za Gafunzo.”

Nyamara nubwo aba bavuga ibi hari, ababyeyi bagaragaza ko kuba isake igitangwa byagabanutse bitakiri nka mbere kuko byarwanyijwe ariko ngo uracyatizwa umurindi na bamwe mu basore badashaka icyo bakora.

Umuyobozi w’Akarere ka Nyamasheke wungirije ushinzwe imibereho myiza y’abaturage, Mukamana Claudette, avuga ko nubwo uwo muco utacitse, abawukora basigaye babikora bihishe kandi bafite isoni.

Ati “Twari twashyizeho gahunda ya ‘Rwanya isake’ ndetse ku buryo nuyitanga n’iyo yayitanga yumva ko ari ibintu bitari byo kandi afite isoni, twe tubona byaracitse uretse abayitanga bihishe.

Umuco w’isake wagaragaye cyane mu murenge wa Nyabitekeri wegeranye no ku Kirwa cya Idjwi kiri mu kiyaga cya Kivu mu gice cya Repubulika Ihanaranira Demokarasi ya Congo.

Umuco wo gutekera abasore isake uracyagaragara mu bice bya Nyamasheke

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .