Nyamasheke: Abaturage batakambye kubera sosiyete ikora imihanda imaze amezi arindwi itarabahemba

Yanditswe na Sitio Ndoli
Kuya 26 Gicurasi 2020 saa 02:46
Yasuwe :
0 0

Abaturage 170 bakoreye Sosiyete yubaka imihanda mu Karere ka Nyamasheke ya Pyramide bagaragaje ko bamaze amezi arindwi badahembwa ndetse byagize ingaruka ku mibereho yabo.

Aba baturage bakoraga imirimo itandukanye y’ubwubatsi ku mihanda iyi sosiyete yatsindiye gukora mu Mirenge ya Macuba, Kanjongo na Kagano muri Nyamasheke.

Babwiye IGIHE ko kuva mu kwezi kwa 10 umwaka ushize kugeza bahagaritswe muri Mata uyu mwaka ubwo bahagarikwaga kubera ingamba zo kwirinda ikwirakwira rya Coronavirus batarahembwa.

Mbonyeyabo Gérald yagize ati “Nahereye mu kwa Cumi amafaranga yanjye sinigeze nyabona kugeza n’ubu. Nagiye mfata amadeni y’abantu kubera nta kazi, bampagaritse muri iki gihe cya Coronavirus. Inzara imereye nabi kandi narakoze.”

Nsengumuremyi Bonaventure uturuka mu Karere ka Rusizi avuga ko yabuze uko asubira mu rugo.

Yagize ati “Banze kumpemba kandi kuva Coronavirus yaza imibereho yarahungabanye. Nkanjye uturuka muri Nyakabuye mu Karere ka Rusizi ni ikibazo cyumvikana. Turifuza ko baturenganura kuko njyewe ndi mu icumbi, bandimo amafaranga arenga ibihumbi 70 Frw.”

Aba baturage bavuga ko atari ubwa mbere bambuwe ndetse ikabahemba bamaze kwiyambaza inzego z’akarere n’iz’umutekano.
Nshimiyumurwa Ezechiel ukomoka mu Murenge wa Rangiro yavuze ko amaze amezi arindwi adahinga.

Yagize ati “Bibaye inshuro eshatu, turifuza ko ubuyobozi bwatwishyuriza aya mafaranga. Inzara yaratwishe n’abana kandi narakoze nk’umufundi, si ubwa mbere rwose baduhemba ari uko duteye amahane. Bamfitiye ibihumbi birenga 120 Frw.”

Umuyobozi ushinzwe Imari muri Pyramide, Nyandwi Nadjibu, utagize byinshi atangariza IGIHE yavuze ko ‘twaganiriye n’ubuyobozi bw’akarere ka Nyamasheke kuri iki kibazo.’

Umuyobozi Wungirije w’Akarere ka Nyamasheke ushinzwe Iterambere ry’Ubukungu, Ntaganira Josué Michel, yavuze ko habayeho kutubahiriza amasezerano ariko ko abaturage bazishyurwa.

Ati “Ntibabeshya, iyo sosiyete hagati yayo n’akarere hari amasezerano yo gukora uwo muhanda ukarangira ariko nyuma y’aho amasezerano ntiyubahirijwe bituma adakomeza bisaba ko yanahagarara. Biracyari mu nzira y’ihagarika ry’amasezerano mu kugera ku musozo kwabyo haganirwaho ku mpande zombi kureba uburyo ababerewemo umwenda bakwishyurwa nyuma nitumara kubona gukoresha inama zagutse bizaganirwaho kandi bibonerwe igisubizo.’’

Yavuze ko “hari amafaranga akarere kazaba kamugomba [rwiyemezamirimo], ibyo bizaba biri mu buryo bwiza bwo gutuma ikibazo cyabo baturage gikemuka.”

Abaturage bavuga ko bagera mu 170 bambuwe bemeza ko iyi sosiyete ibabereyemo umwenda ukabakaba miliyoni 20 z’amafaranga y’u Rwanda.

Akarere ka Nyamasheke kiyemeje gufasha abaturage bamaze amezi arindwi batarahembwa kubona amafaranga yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .