Nyamagabe: Umudugudu uherutse kugabwaho igitero na FLN ubangamiwe no kutagira ibikorwa remezo

Yanditswe na Prudence Kwizera
Kuya 16 Nzeri 2020 saa 04:23
Yasuwe :
0 0

Abatuye mu Mudugudu wa Subukiniro wo mu Kagari ka Rugogwe mu Murenge wa Uwinkingi mu Karere ka Nyamagabe, bavuga ko babangamiwe no kutagira ibikorwa remezo birimo amashanyarazi, amazi meza n’imihanda.

Kugera muri uwo mudugudu uvuye kuri kaburimbo biragoranye cyane kuko umuhanda werekezayo wa kilometero zigera kuri 15 unyura mu ishyamba rya Nyungwe udakoze; urimo ibinogo kandi ni muto cyane ku buryo imodoka ebyiri zidashobora kubisikana.

Ikindi kibazo abawutuye bagaragaza ni icyo kutagira amashanyarazi, bakavuga ko basa n’abari mu bwigunge.

Uwo mudugudu wegereye ishyamba rya Nyungwe, wagabweho igitero n’inyeshyamba za FLN ku wa 13 Mata 2019 zisiga zisahuye abaturage ibiribwa n’amatungo zinabakomeretsa bamwe.

Bamwe mu bawutuye babwiye IGIHE ko kuri ubu umutekano uhari kandi bari kwitabira umurimo bagamije kwiteza imbere. Bagaragarije ubuyobozi ko bifuza kugezwaho amashanyarazi kugira ngo batangire gucana no gukora imirimo ijyanye nayo.

Niyonsaba Marie ati “Ikintu cya mbere dusaba Leta ni amashanyarazi kugira ngo natwe abatuye Subukiniro tubashe gucana, tubone n’aho dukura umuriro wa telefone tuve mu bwigunge.”

Nkurunziza Aloys we avuga ko habonetse amashanyarazi abiganjemo urubyiruko bayoboka imirimo irimo kogosha, gusudira n’iyindi.

Ati “Muri uyu mudugudu tubonye amashanyarazi abenshi cyane cyane urubyiruko bahanga imirimo nko kogosha, gusudira n’iyindi ikenera amashanyarazi, iterambere rikatugeraho.”

Niyonsaba avuga ko kubera kutagira umuhanda, bahura n’imbogamizi zirimo kutagerwaho n’imodoka ije gupakira ibirayi, cyangwa bakagorwa no kugeza kwa muganga umubyeyi ugiye kubyara.

Ati “Cyane cyane nk’iyo imvura yaguye, ntitubasha kugenda kuko no gutega moto uva kuri kaburimbo kugira ngo ugere hano ntibishoboka. Turasaba ubuyobozi kutwunganira bagakora uyu muhanda ukaba nyabagendwa.”

Umuyobozi w’Akarere ka Nyamagabe, Uwamahoro Bonaventure, yabwiye IGIHE ko uwo mudugudu utuye mu gice kigoranye ku buryo kuwugezamo amashanyarazi bigoranye ariko bari gushaka uko babanza gutuza abaturage neza.

Ati “Nk’uko mwabibonye uriya mudugudu wubatse hafi y’ishyamba ndetse kuhagera biragoye, kuvuga ko twahita tuhajyana amashanyarazi ubu biragoye […] ahubwo icyo turi kureba ni uburyo abantu barushaho gutura neza, noneho muri uko gutura neza n’ibikorwa remezo by’amazi asanzwe ahari akabasha kubageraho neza ndetse n’amashanayarazi.”

Akomeza agira ati “Ariko ubu kuvuga ko twahita tujyanayo amashanyarazi ukurikije uko wabonye hameze biraruhije, ahubwo turi gukora ibishoboka byose kugira ngo barusheho gutura ahegereye ibyo bikorwa kandi haberanye no gutura kurushaho. Icyo gihe rero n’ibikorwa by’amazi n’amashanyarazi n’ibindi byabagezwaho, ariko ubu kugeza ubu uriya mudugudu igisubizo tuwubonera ku bijyanye n’amashanyarazi ni ay’imirasire y’izuba kuko mwabonye ko no ku ishuri rihari ahari.”

Agaruka ku kibazo cy’umuhanda werekeza mu Mudugudu wa Subukiniro, Umuyobozi w’Akarere ka Nyamagabe, Uwamahoro Bonaventure, yavuze ko bisaba imbaraga nyinshi kuko imihanda ibiri ijyayo yose yangiritse bikomeye.

Umudugudu wa Subukiniro utuwe n’ingo 227 zirimo abaturage barenga igihumbi.

Umudugudu wa Subukiniro wegereye ishyamba rya Nyungwe
Abatuye mu Mudugudu wa Subukiniro bavuga ko babangamiwe no kutagira ibikorwa remezo birimo amashanyarazi, amazi meza n’imihanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .