00:00:00 IGIHE NETWORK KN KINYARWANDA EN ENGLISH FR FRANCAIS

Nyamagabe: Imiryango itagira ubwiherero yatangiye kubwubakirwa

Yanditswe na Prudence Kwizera
Kuya 30 Ugushyingo 2021 saa 11:15
Yasuwe :

Mu Karere ka Nyamagabe habarurwa imiryango 2,352 ifite ikibazo cyo kutagira ubwiherero bwujuje ibisabwa, bitewe n’impamvu zitandukanye zirimo ubukene no kutabyitaho.

Ni ikibazo ubuyobozi bw’ako karere buvuga ko bwiyemeje gukemura mu gihe cy’umwaka umwe ku bufatanye n’abaturage ndetse n’abafatanyabikorwa.

Umuyobozi w’Akarere ka Nyamagabe wungirije ushinzwe Imibereho myiza y’Abaturage, Uwamaliya Agnes, yavuze ko bihaye umuhigo w’uko muri Kamena 2022, nta rugo na rumwe ruzaba rudafite ubwiherero bwujuje ibisabwa.

Ati “Muri uyu mwaka w’imihigo twahize ko icyo kibazo kizaba cyakemutse, twizeye ko bitarenze Kamena umwaka utaha, nta muryango wo mu Karere ka Nyamagabe uzaba udafite ubwiherero.”

Kuri uyu wa Kabiri tariki ya 30 Ugushyingo 2021, umuryango mpuzamahanga ukora ibikorwa bijyanye n’isuku n’isukura witwa Water Aid ku bufatanye n’ubuyobozi bw’Akarere ka Nyamagabe, watanze amabati yo gusakara ubwiherero ku miryango 100 yo mu Murenge wa Uwinkingi.

Bamwe mu baturage bo mu Murenge wa Uwinkingi bayahawe, bavuze ko bari babangamiwe no kutagira ubwiherero bwujuje ibisabwa, ariko icyo kibazo kigiye gukemuka.

Muhawenimana Jacqueline ati “Icyari kimbangamiye ni uko nari mfite ubwiherero budasakaye ku buryo iyo imvura yagwaga, umuntu yaburaga uko ajya kwiherera. Nishimiye ko bampaye amabati icyo kibazo kikaba kigiye gukemuka.”

Nyiratabaro Agnes we yavuze ko kutagira ubwiherero bwujuje ibisabwa byabateye indwara zikomoka ku mwanda.

Ati “Narwaje macinya kubera umwanda, abana banjye babiri ni bo bayirwaye nanjye ndayirwara. Ubwo twagiye kwa muganga kuko nari mfite ubwisungane mu kwivuza baratuvura. Twarwaye bitewe no kutagira ubwiherero busakaye kuko amasazi yabuvagamo yazaga mu nzu.”

Usibye imiryango 2352 itagira ubwiherero bwujuje ibisabwa, mu Karere ka Nyamagabe habarurwa imiryango 715 ikibana n’amatungo mu nzu. Hari kandi inzu 459 zikeneye gusanwa. Ubuyobozi bw’Akarere bwiyemeje ko ku bufatanye n’abaturage ndetse n’abafatanyabikorwa, ibyo bibazo bizakemuka muri uyu mwaka w’ingengo y’imari wa 2021/22.

Abaturage bo mu Karere ka Nyamagabe bahawe amabati azatuma biyubakira ubwiherero

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .