Nyamagabe: Ibitaro bya Kigeme byabaye bihagaritse serivise ku bivuza bataha

Yanditswe na Prudence Kwizera
Kuya 16 Nyakanga 2020 saa 03:11
Yasuwe :
0 0

Ibitaro bya Kigeme mu Karere ka Nyamagabe byabaye bihagaritse by’agateganyo serivise ku barwayi bivuza bataha, ariko birinze gusobanura impamvu nyamukuru yabiteye.

Ni nyuma y’uko abatuye mu Kagari ka Kigeme mu murenge wa Gasaka ibyo bitaro biherereyemo bashyizwe muri gahunda ya Guma mu Rugo hagamijwe gukumira ikwirakwira ry’icyorezo cya COVID-19 cyagaragaye kuri bamwe mu bagatuye mu minsi mike ishize.

Mu itangazo Ibitaro bya Kigeme byashyize ahagaragara kuri uyu wa Gatatu, byasabye ababigana bivuza bataha ko serivise z’ubuvuzi n’izindi bazaga kuhasaba bajya kuzisaba ku bigo nderabuzima bibegereye.

Riragira riti “Ibitaro bya Kigeme biherereye mu Ntara y’Amajyepfo mu Karere ka Nyamagabe biramenyesha ababigana bose ko guhera tariki ya 15 Nyakanga 2020 saa Sita z’ijoro bibaye bihagaritse serivise zose ku bantu bivuza bataha (Services Ambulatoires)”.

“Abakenera izo serivise barasabwa kugana Ibigo Nderabuzima bibegereye, kugeza igihe bazamenyesherezwa indi tariki izo serivise zizongera gutangirwa.”

Iryo tangazo ryashyizweho umukon n’Umuyobozi Mukuru w’Ibitaro bya Kigeme, Dr Nzabonimana Ephraim, rivuga ko ‘Indembe zonyine zirakomeza kwakirwa’.

Umuyobozi Mukuru w’Ibitaro bya Kigeme, Dr Nzabonimana Ephraim, avugana na IGIHE, yirinze kuvuga impamvu nyamukuru yatumye basubika gutanga serivise ku bivuza bataha.

Ati “Birasanzwe ko dusubika serivise runaka nyuma tukongera kuyisubukura.”

Umunyamakuru amubajije niba ntaho bihuriye na gahunda ya Guma mu Rugo yashyizweho mu gace ibitaro bya Kigeme biherereyemo, yasubije ko ibyo byabazwa Minisiteri y’Ubuzima.

Turacyagerageza kuvugisha Umuvugizi wa Minisiteri y’Ubuzima, Kayumba Malick, kugira ngo atangaze mpamvu nyamukuru yatumye Ibitaro bya Kigeme bihagarika serivise ku barwayi bivuza bataha.

Gusa yavuze ko abakozi b’ibitaro ayoboye bagera ku 160 bose bari kuza ku kazi kandi bari kubahiriza ingamba zo kwirinda icyorezo cya COVID-19 giterwa n’agakoko ka Coronavirus.

Tariki ya 14 Nyakanga 2020 Minisiteri y’Ubutegetsi bw’Igihugu yatangaje ko tumwe mu tugari two mu Turere twa Nyamagabe na Nyamasheke twasubijwe muri Guma mu rugo mu gihe cy’iminsi 15, kubera icyorezo cya Coronavirus cyatugaragayemo.

Utwo muri Nyamagabe twashyizwe muri Guma mu Rugo Akagari ka Kigeme mu Murenge wa Gasaka (aho Ibitaro bya Kigeme biherereye) n’Akagari ka Ruhunga mu murenge wa Kibilizi.

Ibitaro bya Kigeme biherereye mu Karere ka Nyamagabe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .