Nyagatare: Yabyaye umwana amuta mu musarane abaturage bamukuramo akiri muzima

Yanditswe na Hakizimana Jean Paul
Kuya 23 Mata 2019 saa 12:07
Yasuwe :
0 0

Umukobwa w’imyaka 24 wari ucumbitse mu Mudugudu wa Mirama II, Akagari ka Nyagatare, Umurenge wa Nyagatare, yabyaye umwana w’umuhungu ahita amuta mu musarane kubw’amahirwe abaturage barahagoboka bamukuramo akiri muzima.

Ibi byabaye kuri uyu wa Mbere ahagana saa kumi z’umugoroba, ubwo Ingabire Solange yashakaga kwihekura ariko abaturage bakahagoboka.

Umunyamabanga Nshingwabikorwa w’Umurenge wa Nyagatare Andrew Ndamage, yabwiye IGIHE ko babimenye Saa kumi babibwiye n’abaturage.

Ati “Ahagana saa kumi twahamagawe n’abaturage batubwira ko Ingabire Solange wari ucumbitse mu mudugudu wa Mirama II yabyaye umwana agahita amujugunya mu musarane. Abo baturage kuko bari bari hafi bahise bafatirana bamukuramo akiri muzima duhita tumujyana ku bitaro bya Nyagatare ari kwitabwaho n’abaganga."

Uyu muyobozi yakomeje avuga ko na Ingabire warugiye kwihekura nawe yafashwe agashyikirizwa abaganga kugira ngo bamwiteho nyuma akazashyikirizwa inzego z’ubutabera zigakora akazi kazo.

Ndamage yasabye abaturage kwirinda kwihekura bagaharanira kubyara abo babashije kurera. Akomeza avuga ko muri aka kagari ka Nyagatare mu kwezi kumwe hafatiwe abagore inshuro ebyiri bose bashaka kwihekura.

Bivugwa ko Ingabire ashobora kuba yarabyaye mu ma saa yine za mugitondo, akabyarira aho acumbitse hanyuma akamutamo saa cyenda n’indi minota mike abaturanyi bamubona saa kumi.

Icyabibwiye abaturage ngo umwe yagiye mu musarani yumvamo umwana uri kurira ahita ahamagara abandi baraza barawusenya bamukuramo. Uyu musarani ngo ntabwo urengeje metero 10.

Ingabire nta mugabo afite ni umukobwa watewe inda, abaturanyi bakaba banemeza ko nta burwayi afite bushobora gukekwa ko bwamuteye gushaka kwihekura.

Nyuma yo gukuramo uyu mwana Ingabire bamusanze iwe mu rugo aryamye bahita bamujyana kwa muganga. Kugeza ubu ntiharamenyekana impamvu yatumye ashaka kwihekura.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza