Nyagatare: Hasobanuwe uko byagenze ngo Rusanganwa akurwe mu mitungo bivugwa ko yahuguje umukwe we

Yanditswe na Evariste Nsengimana
Kuya 6 Gashyantare 2020 saa 08:45
Yasuwe :
0 0

Ubuyobozi bw’Akarere ka Nyagatare bwakuyeho urujijo ku muturage wako witwa Rusanganwa Nathan umaze igihe avuga ko bwamurenganyije bukamukura mu mitungo ye ku ngufu, busobanura ko yashatse kwigomeka mu gihe cyo gushyira mu bikorwa icyemezo cy’urukiko rukuru rwategetse ko ayikurwamo igahabwa uwayitsindiye.

Amakuru agera kuri IGIHE avuga ko iki kibazo cyatangiye ubwo umuturage witwa Kareba Benon, na we wo muri Nyagatare yaguraga ubutaka bungana na hegitari 12 n’umuryango wa Rusanganwa [uvukamo umugore wa Kareba].

Nyuma yo kubugura Kareba yaje kujya gukorera mu Karere ka Rwamagana ariko ubutaka bwe busigara bukoreshwa no kwa sebukwe, igihe cy’isaranganya ry’ubutaka mu Burasirazuba, babwibaruzaho ntibagaragaza ko Kareba na we abufiteho uburenganzira ngo na we agire ubwo agenerwa.

Kareba amaze kubimenya yabajije uko byagenze, bamukatiraho hegitari enye ntiyanyurwa, ahita atanga ikirego mu Bunzi, banzuye ko asubizwa hegitari 12 ze zose.

Umuryango wa Rusanganwa wahise ujujirira icyemezo cy’Abunzi mu Rukiko rw’Ibanze rwa Nyagatare, rutesha agaciro icyemezo cy’Abunzi, Kareba na we ahita ajuririra mu Rukiko rwisumbuye na we aratsinda.

Icyaje guteza urukijijo hagati aho ni uko buri cyemezo cy’Urukiko cyafatwaga, uwabaga yatsinze yahitaga yihutira kuzana umuhesha w’inkiko w’umwuga ngo bashyire mu bikorwa icyemezo cyafashwe ariko bikaza kurangira urukiko rujuririwe rubivuguruje.

Kuva urukiko rukuru rufashe icyemezo kivuga ko Kareba asubizwa ubutaka bwe ariko aho guhabwa hegitari 12, rwemeza ko ziba esheshatu gusa, zivuye mu butaka bwa Rusanganwa, nta n’umwe mu baburanyi wigeze awujuririra, uhinduka itegeko.

Inkundura yaje kurota ubwo hatangira urugendo rwo gushyira mu bikorwa umwanzuro wa nyuma utarigize ujuririrwa ariko Rusanganwa ntiyabyumva, ashaka kurwanya ubuyobozi bw’Umurenge kugeza n’ubwo yari agiye gufungwa.

Kubera intege nke yari afite, yararekuwe ariko akibwira ko bivuze ko yatsinze urubanza, bakamwigisha ntiyumva, bituma inzego z’umutekano mu karere n’ubuyobozi bwako bujya gufasha umurenge gushyira mu bikorwa icyemezo cy’urukiko, Rusanganwa akurwa mu butaka ku ngufu.

Gusa uyu musaza w’imyaka 80 ntiyanyuzwe kuko ngo afatanyije n’abana be basubiye inyuma bagakuramo imbago zashyizweho zigaragaza ubutaka bwahawe Kareba, inka ze zarimo bazikuramo.

Byatumye we n’umuhungu we bakatirwa n’inkiko ku cyaha cyo kurandura imbago no kwigomeka ku mwanzuro w’urukiko ariko umusaza akomeza gukurikiranwa adafunze kubera afite intege nke.

Rusanganwa yabwiye IGIHE ati “Umuyobozi w’Akarere yaraje anyambura ubutaka bwanjye ku ngufu, bamfungira n’umwana.”

Uyu musaza yashimangiye ko inkiko zose bagiyemo yagiye atsinda ariko bikarangira yambuwe ubutaka bwe ku ngufu yari yarabutsindiye.

Uyu musaza avuga ko ngo yasabye icyemezo cyerekana ko ubutaka bwe buhawe Kareba bakakimwima.

Umuyobozi w’Akarere ka Nyagatare, Mushabe David Claudian, yabwiye IGIHE ko ibyo uyu musaza amushinja ari ukumuharabika kuko ikibazo cye kimaze igihe ndetse yahageze ari kumwe n’izindi nzego bagiye gufasha ubuyobozi bw’umurenge kurangiza urubanza nk’uko amategeko abiteganya, kubera ko Rusanganwa yari yigometse.

Ati “Icya mbere ntabwo ari njye warangije urubanza, uwarurangije ni umuhesha w’Inkiko.”

Uyu muyobozi avuga ko Rusanganwa akomeje kugenda amuharabika ko ariwe wambuwe ubwo butaka kandi abeshya kuko yakuwe mu butaka hashingiwe ku myanzuro y’urukiko ruheruka kugifataho umwanzuro.

Avuga ko uyu musaza ari ukwinangira kuko yagiye yitabaza inzego zitandukanye zirimo n’urw’Umuvunyi zikamugira inama ariko akabyirengagiza.

Kareba Benon yabwiye IGIHE ko ibyo Rusanganwa wamuhuguje ubutaka avuga ari amatakirangoyi kuko atigeze ajuririra icyemezo cy’urukiko rukuru kigendarwaho kugeza uyu munsi.

Yavuze ko umuyobozi w’akarere yazanye n’abandi bayobozi baje guhagararira Umunyamabanga Nshingwabikorwa w’Umurenge kugira ngo ashyire mu bikorwa icyo cyemezo.

Umushinjacyaha w’Urukiko rwisumbuye rwa Nyagatare akaba n’Umujyanama wako mu by’amategeko, Rusanganwa Augustin, yabwiye IGIHE ko yakomeje kubagira inama umuryango w’uwo musaza z’uko niba batanyuzwe bakwiye kwandikira Urukiko rw’Ubujurire bagaragaza akarengane bakorewe ntibabikora.

Ati “Iyo rubonye bifite agaciro, rurategeka bigasubirwamo ku ngingo runaka ariko ntabyo bakoze, bavuga ngo baratsinze. N’ubu nta wamenya iby’urukiko, bashobora kugaragaza impamvu batabikoreye igihe bakumva.”

Uyu musaza agirwa inama yo kwegera izindi nzego akareka gukomeza gusebya ubuyobozi.

Hasobanuwe uko byagenze ngo Rusanganwa akurwe mu mitungo bivugwa ko yahuguje umukwe we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .