00:00:00 IGIHE NETWORK KN KINYARWANDA EN ENGLISH FR FRANCAIS

Nyabihu: Impact Hope Rwanda yiyemeje gufasha urubyiruko rwacikishije amashuri gukabya inzozi

Yanditswe na Muhire Desire
Kuya 9 Ugushyingo 2022 saa 02:53
Yasuwe :

Urubyiruko rwacikishije amashuri kubera kubura ubushobozi, abangavu babyariye iwabo, abatuye mu nkambi, barashimira umuryango Impact Hope Rwanda wabashyiriyeho ishuri ryigisha imyuga, bakavuga ko bagiye guhindurirwa ubuzima n’ubumenyi bazahavoma.

Byagarutsweho ubwo uyu muryango watangizaga ishuri Center for Hope ry’imyuga riherereye mu Karere ka Nyabihu, mu Murenge wa Jenda, ryigisha ubudozi, ubutetsi, gutunganya imisatsi n’ubuhinzi.

Abiga muri iri shuri bamaze amezi ane biga, bemeza ko ryabakuye mu bwigunge. Harimo benshi bari barataye icyizere cy’ubuzima , harimo ababyaye inda z’imburagihe, abarangije amashuri y’icyiciro rusange n’ayisumbuye ntibabone ubushobozi bwo gukomeza n’abandi.

Umutoniwase Divine wiga ubuhinzi bw’imboga n’imbuto, yatewe inda itateguwe ageze mu mwaka wa gatanu w’amashuri yisumbuye.

Yemeza ko ubumenyi amaze kugira buzamufasha guhindura ubuzima bwe n’ubw’abaturanyi, abigisha guhinga imboga n’imbuto, imwe mu mbogamizi abaturage bagifite inatuma ikibazo cy’igwingira gikomeza kuba ingorabahizi.

Yagize ati “Namenye gukoresha inzu y’ubuhinzi [green house] n’ahandi nagera hose nashobora kuyikoreramo. Nari nsanzwe nkunda ubuhinzi ariko mbikora ku buryo bujagaraye, nta makuru, ariko ubu twungutse ubumenyi, twize ko mu buhinzi ibyo abandi babonamo ibibazo twe tubibona nk’ibisubizo.”

Yungamo ati “ Twize byinshi nko gukora akarima k’igikoni turwanya igwingira, uburyo bwo kugakorera, ubwo bumenyi bwose buzadufasha gufasha abaturage bacu kumenya kurwanya igwingira, tubabwira ko ridafata abana gusa ahubwo n’abakuru bashobora kugiwingira, tunabakangurire gukoresha cyane ifumbire y’imborera kuko imvaruganda yangiza ubutaka.”

Abanyeshuri bo mu nkambi bahawe amahirwe yo kwiga imyuga muri iri shuri bashima Impact Hope Rwanda kuko ngo mu nkambi birirwaga bicaye, ariko ngo nyuma yo kwiga imyuga bazabasha kwibeshaho bafashe n’imiryango yabo.

Nkurunziza Bénjamin wiga ubutetsi bw’umwuga, ubarizwa mu nkambi ya Kigeme yagize ati “ Ubutetsi bw’umwuga ndikubwiga sindabusoza, ariko nzi neza ko kubera gushyiramo imbaraga. Mfite abarimu beza, nzabimenya kuko naje mbishaka. Guteka by’umwuga bitunze abantu benshi muri iki gihe, ndashimira uyu muryango uri kubidufashamo kuko ubuzima tuba turimo mu nkambi nk’urubyiruko rudafite akazi ntibuba bworoshye.”

Ishimwe Bienfait wiga ubudozi ati “ Ubuzima bwo mu nkambi ni ubuzima buba bugoye cyane kuko uba uriho utegereje guhabwa, none cyane nka twe b’urubyiruko tuba twararangije amashuri tutarabona akazi, uba utekereza uburyo warangije kwiga, umubyeyi na we ari aho ategereje gufashwa, ukibaza uko uzamusaba inkweto, ipantalo bikakuyobera. Ndashima cyane uyu mushinga kuko ubudozi nizeye ko nzamwiga neza kandi bukambeshaho njye n’umuryango wanjye.”
Abanyeshuri baturutse mu nkambi zitandukanye zo mu gihugu ni 76 muri 183 biga muri iri shuri. Muri bo hari abazahabwa amahugurwa y’amezi atandatu nk’abiga ubutetsi, gusuka n’ubuhinzi mu gihe abiga ubudozi bazahabwa amahugurwa y’umwaka.

Mutamuliza Judith, umuyobozi wa Impact Hope Rwanda yasabye avuga ko intego nyamukuru y’iri shuri ari ugufasha urubyiruko kwigira ntirutege amaboko, rukiteza imbere ndetse n’igihugu muri rusange.

Yagize ati “ Uyu mushinga icyo ugamije ni ugufasha urubyiruko rwacikirije amashuri n’abarangije ayisumbuye ntibabashe gukomeza kaminuza, tubaha ubumenyi-ngiro kugira ngo rubashe kwigira kandi bahangane ku isoko ry’umurimo.”

Yabwiye uru rubyiruko, ati “Aya masomo tubaha ni ukugira ngo mubashe kwigira, ni mwe Rwanda rw’ejo mugomba kubaka imiryango yanyu, mukubaka abaturanyi ndetse n’igihugu muri rusange, ibyo byose muzabigeraho ari uko mwifitiye icyizere, nta cyizere ibyo byose ntimwabigeraho.”

Hans Thygeson uri mu bashinze umuryango Impact Hope nk’umuryango ushingiye ku iyobokamana, yifashishije umugani wa Yesu wo muri Matayo 25, ukuiyemo igitekerezo cy’abo Yesu yabwiye ko bamufunguriye ubwo yari ashonje, abandi bakamwambika ubwo yari yabuze umwambaro.

Yabwiye aba abadozi ko nibabasha kwiyambika bakambika n’abandi, abatetsi bakabikora neza bakagaburira abanyarwanda bazaba bari mu murongo mwiza wo kubahiriza icyatumye uyu muryango ushingwa.

Ubuyobozi bw’Akarere ka Nyabihu bwashimiye Impact Hope Rwanda kuba yaratekereje gushinga ishuri ry’imyuga kuko ngo bihuye na gahunda z’aka Karere ndetse n’iz’igihugu cyane ko intego aka Karere kari kihaye muri 2017-2024 yo kugera kuri 60% z’abiga imyuga itazagerwaho kuko ubu bageze kuri 11,3%.

Ubuyobozi bwa Impact Hope Rwanda buvuga ko buteganya gushyira ishuri nk’iri muri buri ntara y’u Rwanda, bakazahera mu ntara y’Uburasirazuba umwaka utaha.

Umushinga Impact Hope Rwanda uzatwara ingengo y’imari ikabakaba miliyari 5 Frw mu gihe cy’imyaka itanu. Watangiriye mu karere ka Nyabihu ariko harateganywa kubakwa ibindi bigo muri buri ntara.

Abanyeshuri biga gutunganya imisatsi n'inzara
Abanyeshuri biga imyuga inyuranye kuri iri shuri bavuga ko ahazaza habo hizewe
Bagira umwanya wo gukora imyitozo hagamijwe ubuzima bwiza, kwirwanaho n'ikinyabupfura
Bamwe mu banyeshuri biga ubutetsi w'umwuga
Uyu muhango wari witabiriwe na Hans Thygeson n'umuryango we, nk'umwe mu bashinze umuryango Impact Hope Rwanda
Umunyeshuri wiga ubutetsi aha yerekanaga ibyo amaze kwiga
Imyambaro yadozwe n'abanyeshuri ba Center for Hope i Nyabihu
Umuyobozi wa Impact Hope Rwanda ageza ijambo ku bitabiriye ibirori
Umuyobozi w'Akarere ka Nyabihu wungirije ushinzwe imibereho myiza ari kumwe na Hans watangije Impact Hope
Abiga ubudozi bamaze kugira ubumenyi buhambaye
Itorero gakondo rya Center for Hope TVET ryasusurukije abitabiriye umuhango wo gutaha iri shuri
Hans yagiriye inama abanyeshuri ko bakwiye kwibuka no kwiragiza Imana
Umuyobozi w'akarere ka Nyabihu wungirije na we yasabye abanyeshuri kuzabyaza umusaruro ubumenyi bahawe
Abashyitsi banafashe umwanya basura ibikorwa bikorerwa muri iki kigo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .