00:00:00 IGIHE NETWORK KN KINYARWANDA EN ENGLISH FR FRANCAIS

Nyabihu: Abasezerewe mu ngabo bagabiye inka 13 bagenzi babo batishoboye

Yanditswe na Claude Bazatsinda
Kuya 3 September 2022 saa 02:47
Yasuwe :

Bamwe mu bahoze ari abasirikare basezerewe mu ngabo boroje bagenzi babo bari mu cyiciro cya mbere cy’ubudehe n’abamugariye ku rugamba, bemeza ko bazakomeza kugira uruhare mu bikorwa byubaka igihugu no kuzamura imibereho myiza y’abo bafatanyije kukibohora.

Inka 13 zose zahawe abahoze ari ingabo bakaza gusezererwa bo mu Karere ka Nyabihu ndetse n’umwe muri bo uherutse kwicirwa inka n’abagizi ba nabi.

Umuyobozi wa Koperative yoroje bagenzi babo, Gasarasi Jaribu Justin, avuga ko iyi gahunda yo koroza bagenzi babo izakomeza kuko icyo batojwe ari uguharanira ko imibereho n’iterambere bigera kuri buri wese.

Yagize ati"Twafashe iya mbere kugira ngo dufashe bagenzi bacu batari bishoboye, tubahaye inka kandi tuzakomeza kubaba hafi kuko icyo twatojwe ni uguharanira ko imibereho ya bose yaba myiza bityo bakagera ku iterambere. Turabasaba ko izi nka bazorora neza zikabateza imbere kuko ni byo twese twifuza."

Bamwe mu borojwe izo nka, bashimiye bagenzi babo babazirikanye bemeza ko zigiye kubabera intangiriro y’iterambere ryabo, imiryango yabo n’igihugu muri rusange kuko usibye kuba zizabaha amata bakarwanya imirire mibi, zizabafasha no mu iterambere kandi ko nabo bazoroza abandi.

Majyambere Celestin, ni umwe mu bamuhariye ku rugamba, yagize ati" Ndishimye cyane kandi ndashimira na bagenzi banjye twafatanyije urugamba rwo kubohora igihugu kuba batuzirikanye bakatworoza. Inka ni ubukungu ngiye kuyorora neza impe amata mu muryango n’abaturanyi turwanye imirire mibi kandi nanjye niteguye kuzoroza abandi nizororoka."

Mpizi Lazare we yashumbushijwe kuko inka ye ye yiswe n’abagizi ba nabi, nawe yagize ati" Iki gikorwa kiranshimishije cyane kandi ndashimira bano batuzirikanye kuko biradufasha kutazimya igicaniro, tuzahora tuzirikana ibyiza igihugu cyacu kigeraho kuko nibyo twaharaniye tuyobowe na Perezida wacu Paul Kagame. Tugiye kwivana mu bukene kandi tuzahora dukorera igihugu cyacu."

Umuyobozi w’Akarere ka Nyabihu wungirije ushinzwe imari, ubukungu n’iterambere, Habanabakize Jean Claude avuga ko uru ari urugero rwiza rugaragaza ko abasezerewe mu ngabo batanga umusanzu ufatika mu kubaka igihugu kandi ko nabo bazakomeza gufatanya nabo mu guteza imbere abaturage.

Perezida wa Komisiyo y’Igihugu yo gusezerera no gusubiza mu buzima busanzwe abari ingabo, Nyirahabineza Valerie, yashimiye abo bahoze ari ingabo boroje bagenzi babo avuga ko icyo gikorwa cy’ubumuntu ari urugero n’ikimenyetso cy’umurage bakesha Umugaba w’Ikirenga w’Ingabo z’u Rwanda.

Yagize ati" Turashimira cyane aba basezerewe kuba bazirikana bagenzi babo barimo abatishoboye n’abamugariye ku rugamba bakabafasha. Iki ni igikorwa cyiza cy’ubumuntu n’urugero rwiza n’ikimenyetso cy’umurage bakesha Umugaba w’Ikirenga w’Ingabo z’u Rwanda, Paul Kagame uhora ashakira ibyiza n’iterambere Abanyarwanda, natwe rero biraza kudufasha kumva ko abo twari dufite babayeho nabi bari kugenda bagabanyuka."

Abasezerewe mu ngabo mu Karere ka Nyabihu, bagira uruhare runini mu ikorwa ry’amaterasi mu misozi miremire, kubungabunga inzuri za Gishwati barwanya ubushimusi bw’amatungo n’ishyamba rya Gishwati ryangirizwaga n’abatutizi, abatwika amakara n’abakoramo ubucukuzi butemewe ariho bakura ubushobozi bwo gufasha bagenzi babo.

Abasezerewe mu ngabo batishoboye bahawe inka na bagenzi babo
Abasezerewe mu ngabo bagabiye inka 13 bagenzi babo batishoboye
Majyambere wamugariye ku rugamba yishimiye inka yahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .